27 Октябр, 2026, 16 Жумадул аввал, 1448
27 Октябр, 2026, 16 Жумадул аввал, 1448
Мамлакатимиз мўмин-мусулмонлари муборак ҳаж ва умра ибодатларини адо этишлар учун йилдан-йилга қулай шарт-шароитлар ташкил этиб келинмоқда. Сўнгги йилларда зиёратчиларга кўрсатиладиган тиббиёт, транспорт, меҳмонхона хизматлари ва ибодат масалаларидаги ёрдамлар савияси сезиларли даражада ошганини алоҳида қайд этиш керак.
Яна бир хурсандчилик, ҳаж сафарига бориш истагини билдираётганлар сони ошиб бораётганини инобатга олиб, 2017 йилдан юртимиздан ҳаж зиёратига борувчилар сони 7200 нафар қилиб белгиланди (илгари 5200 нафар эди). Бу хушхабар барча юртдошларимизга катта қувонч бахш этди.
Шу кунларда Ҳаж ишлари бўйича Ўзбекистон делегацияси Саудия Арабистонида хизмат сафарида бўлиб, бир қатор вазирлик ва идоралар билан 2017 йилги ҳаж мавсумини намунали ташкил этиш бўйича музокаралар ўтказмоқда. Куни кеча Саудия Арабистони Ҳаж ва умра ишлари вазири Солиҳ Бантин билан учрашув бўлиб ўтди. Унда ўтган Ҳаж мавсумидаги ютуқлар ва келаётган мавсумга тайёргарлик, уни янада яхши ташкил этишга доир фикрлар билдирилди. Мазкур учрашув якунида икки томон ўртасида имзоланган шартномага кўра, жорий йил Ҳаж мавсуми учун Ўзбекистонга 7200 та квота ажратилишига эришилди.
Куннинг иккинчи ярмида Ҳаж ишлари бўйича Ўзбекистон делегацияси Саудия Арабистони Фуқаро авиацияси бош бошқармаси раҳбарияти билан Жидда шаҳрида учрашув ўтказди. Музокараларда ҳаж ва умра зиёратларини ташкил этиш доирасидаги ташкилий масалалар, жумладан, Мадина ва Жидда шаҳарлари халқаро аэропортлари орқали зиёратчиларни ташиш, кўрсатиладиган хизматлар муҳокама этилди. Саудия Арабистони Фуқаро авиацияси бош бошқармаси Ўзбекистон ҳаж ишчи гуруҳи ва “Ўзбекистон ҳаво йўллари” миллий авиакомпанияси иш фаолиятига юқори баҳо берди.
Шундан сўнг Ҳаж ишлари бўйича Ўзбекистон делегацияси ташриф дастури доирасида Саудия Арабистони Транспорт корхоналари бош вакиллиги масъуллари билан учрашди. Учрашувда бош вакиллик раҳбари Форуқ Бухорий Ўзбекистон томонидан ҳаж ва умра тадбирларини юқори даражада ташкил этиб келаётгани, ўзбекистонлик ҳожилар замонавий транспорт воситалари билан таъминлангани, шартномавий келишувлар Ўзбекистон томонидан тўлақонли бажарилаётганини алоҳида таъкидлади. Форуқ Бухорий сўзининг якунида Ўзбекистон ҳаж делегацияси аъзоларига юқори даражадаги ташкилий ишлар учун самимий миннатдорлик билдирди.
Ўзбекистон мусулмонлари идораси
ахборот хизмати
Покистоннинг машҳур “Discover Pakistan” телеканалида буюк муҳаддис, ислом оламининг кўзга кўринган олимларидан бири Имом ал-Бухорийнинг ҳаёти ва бой илмий-маънавий меросига бағишланган ҳужжатли фильм эфирга узатилди, деб хабар бермоқда “Дунё” АА.
Махсус кўрсатув телеканал ижодий гуруҳининг Ўзбекистоннинг Покистондаги элчихонаси кўмагида мамлакатимизга қилган сафари чоғида суратга олинган. Фильмда Ўзбекистон Президенти Шавкат Мирзиёев ташаббуси билан Самарқанд вилоятидаги Имом ал-Бухорий мажмуасининг архитектура қиёфаси тубдан янгилангани қайд этилган. Шунингдек, мажмуанинг ўзига хос маънавий муҳити ва ушбу муқаддас қадамжонинг мусулмонлар ҳаётидаги ўрни ҳақида сўз юритилган.
Томошабинларга Ўзбекистонда буюк мутафаккирларнинг илмий меросини ўрганиш ва оммалаштириш, тарихий-маданий ёдгорликларни сақлаш, муқаддас қадамжоларни ободонлаштириш ва зиёрат туризмини ривожлантириш борасида амалга оширилаётган ишлар ҳақида маълумот берилди.
Кўрсатув муҳаррирининг сўзларига кўра, Имом ал-Бухорий нафақат ўзбек халқи, балки бутун мусулмон уммати учун улкан маънавий аҳамиятга эга мерос қолдирган. “У ҳадис илми тараққиётига беқиёс ҳисса қўшди ва ислом оламида юксак эътирофга сазовор бўлган “Ал-Жоми ас-саҳиҳ” асарини яратди. Асрлар давомида ушбу китоб мусулмонлар томонидан энг муҳим диний-маърифий манбалардан бири сифатида қадрланиб келинмоқда”, — деди журналист.
Фильмда мажмуа шунчаки тарихий ёдгорлик эмас, балки ислом цивилизациясининг бой илмий ва маънавий анъаналарини ўзида мужассам этган ҳамда турли мамлакатлардан келган зиёратчиларни бирлаштирадиган муқаддас маскан сифатида таърифланган. Мажмуанинг замонавий архитектура ечими, ободонлаштирилган ҳудуди ва зиёратчилар учун яратилган шароитлар Ўзбекистоннинг тарихий меросга бўлган эътиборини акс эттириши таъкидланган.
“Discover Pakistan” телеканалида намойиш этилган ҳужжатли фильм халқаро аудиторияга Ўзбекистоннинг бой тарихий-маданий мероси, унинг муқаддас қадамжолари ва жаҳон цивилизацияси, хусусан, ислом илм-фани тараққиётига қўшган ҳиссаси ҳақида маълумот етказишга ёрдам беради. Бу, шунингдек, Покистон аҳолиси ўртасида Ўзбекистонга зиёрат туризмини тарғиб қилишга хизмат қилади.
Ўзбекистон мусулмонлари идораси Матбуот хизмати
Иймон 
Намоз 
Рўза 
Закот 
Ҳаж 
Қуръон 
Ислом сабоқлари 
Aлоқа 