Мақолалар

Динда саволим бор: Янги ой чиққан пайтда дуо қилиш тўғрими?

— Болаликда катталар шундай ўргатишгани учунми, янги ой чиққан пайтда дуо қилар эдик. Дуоимизда яхши ниятлар қилар эдик, албатта. Шу ишимиз кичик ширк бўлмаганми?

Янги ой кўрилганда дуо қилиш ширк эмас. Сўраладиган нарсани ойдан сўралмаса бўлди.

Қатода розияллоҳу анҳудан ривоят қилинади. Аллоҳнинг Набийси соллаллоҳу алайҳи васаллам қачон ҳилолни кўрсалар: “Ҳилолу хойрин ва рушдин. Ҳилолу хойрин ва рушдин. Ҳилолу хойрин ва рушдин” ва уч марта “Ааманту биллазии холақока”, дер эдилар. Сўнгра “Фалон ойни кетказиб, фистон ойни келтирган Аллоҳга ҳамд бўлсин”, дер эдилар (Имом Абу Довуд ривояти).

Дуонинг маъноси: “Яхшилик ва ҳидоятга чорловчи ой. Яхшилик ва ҳидоятга чорловчи ой. Яхшилик ва ҳидоятга чорловчи ой. Сени яратган Зотга имон келтирдим”.

Толҳа ибн Убайдуллоҳ розияллоҳу анҳудан ривоят қилинади: “Расулуллоҳ соллаллоҳу алайҳи васаллам қачон янги чиққан ойни кўрсалар, “Аллоҳим! Уни бизга хайр-барака, иймон, саломатлик ва Ислом ила чиқаргин. Роббим ва Роббинг Аллоҳдир”, дер эдилар” (Имом Термизий ривояти).

 

Муҳаммад Айюб домла Ҳомидов

447 марта ўқилди

Мақолалар

Top