Шу йил, 2 март куни Ўзбекистон мусулмонлари идораси раиси, муфтий Шайх Нуриддин Холиқназар ҳазратлари Тошкент шаҳар "Ракат" жоме масжидидаги таровеҳ намозида иштирок этиб, жамоатга Рамазони шариф фазилати, тинчлик-осойишталикни қадри тўғрисида гўзал суҳбат қилиб бердилар. 
 

Муфтий ҳазратлари масжидга йиғилган мўмин-мусулмонларга бу йил Рамазони шариф юртимизда ўзгача шукуҳда ўтаётгани, бир ойгина меҳмон бўлган ғанимат ойнинг раҳмат даҳаси ҳам тугаб, иккинчи ўн кунлик – мағфират даҳаси бошлангани, айни кунларда Аллоҳ таолодан кўпроқ офият сўраш лозимлиги, бу борада Пайғамбаримиз соллаллоҳу алайҳи васаллам: “Аллоҳдан афв ва офият сўранглар. Чунки бирор кишига иймондан кейин офиятдан-да яхшироғи берилмаган”, дея марҳамат қилганларини баён этдилар. 

Шунингдек, дуолар қабул бўладиган фурсатларда Ҳақ таолодан дунёнинг кўплаб ҳудудларидаги нотинчликлар тез орада барҳам топиши ва юртимиздаги тинчлик-осойишталикни бардавом бўлишини сўраш, ушбу неъматнинг қадрига етиш лозимлигини қайд этдилар.  

Манфаатли суҳбат якунида Муфтий ҳазратлари Аллоҳ таолодан барчага икки дунё саодатини насиб қилишини сўраб, элу юртимиз ҳаққига хайрли дуолар қилдилар.

#xabar #taroveh #muftiy

Ўзбекистон мусулмонлари идораси
Матбуот хизмати