Imom Ibn Annahviy rahimahulloh aytadilar: Bir kuni Ibn Atoulloh Iskandariyning ilm majlislariga keldim. O'sha vaqtda u zot o'z zamonasining tasavvuf ahli orasida ENG katta ulamolardan edilar. U kishiga qarab turib ilmlariga havasim keldi va ichimda: bu zot qaysi maqomda ekanlar-a? – deb o'z-o'zimga aytdim. Shu vaqt shayx gapdan to'xtab menga qaradilarda: Ey, Ibn Annahviy! Osiy va gunohkorlarning maqomidaman, dedilar. Bu gapni eshitib xayratda qoldim va salom berib sekin ketdim. O'sha kechasi Rasululloh sollallohu alayhi vasallamni tushimda ko'rdim. U zot bir tepalikning ustida turibdilar, sahobalar u kishining atroflarida, odamlar to'plangan. Shu payt Rasululloh sollallohu alayhi vasallam: Qani Tojuddin ibn Atoulloh? - dedilar. Ibn Atoulloh: Men shu erdaman, deb javob berdilar . Rasululloh sollallohu alayhi vasallam unga: Tur o'rningdan va gapir. Alloh taolo sening gapingni yaxshi ko'radi, dedilar . Ibn Atoulloh Allohning muhabbati haqida gapira boshladilar.
Alahsib o'rnimdan turdim va shu zahoti Ibn Atoullohning huzurlariga yugurdim. Qarasam u kishi Rasululloh sollallohu alayhi vasallamning huzurlarida gapirayotgan gaplarini aytib turgan ekanlar. O'zimga o'zim: Mana bu yuksak maqom ekan, dedim. Shunda Ibn Atoulloh menga tabassum bilan boqib: Ey, Ibn Annahviy! Senga maxfiy bo'lganlari bundan ham buyuk, dedilar.
Homidjon domla Ishmatbekov,
O'zbekiston musulmonlari idorasi
raisining birinchi o'rinbosari.
Mir Arab o‘rta maxsus islom ta’lim muassasasida ustoz va talabalar ishtirokida ikki yangi asarning taqdimoti o‘tkazildi. Tadbirda O‘zbekiston musulmonlari idorasi raisi, muftiy Shayx Nuriddin Xoliqnazar hazratlarining «Ey, bandalarim» asari hamda Toshkent islom instituti katta o‘qituvchisi Abdulazim domla Saidahmedovning «Nurul yaqin» asari ikkinchi qismi o‘quvchilarga tanishtirildi.
Tadbirda bilim yurti mudiri Jaloliddin Saburov ushbu kitoblar talabalar ma’naviy kamolotida katta xizmat qiluvchi muhim manbalar ekanini ta’kidladi.
Abdulazim domla ham so‘zga chiqib, «Nurul yaqin» asarining yangi qismidagi asosiy mavzular, uni yozish jarayoni o‘quvchi uchun qanday foydalari borligi haqida so‘zlab berdi.
O‘zbekiston musulmonlari idorasi
Matbuot xizmati