Дунё янгиликлари

Қозоғистонда исломий карта ишга туширилди

Шариат қонунларига тўла мувофиқ келиш, бепул хизмат кўрсатиш, комиссияларсиз Apple pay ва Samsung pay орқали контактсиз тўловлар Tayyab биринчи рақамли исломий картанинг афзалликлари сирасига киради.

Forbes.kz хабар беришича, ислом молияси тамойилларига мувофиқлиги Shariyah Review Bureau халқаро шариат кенгаши (Саудия Арабистони), шунингдек, Қозоғистон мусулмонлари диний идораси томонидан тасдиқланди.
Мижозларнинг карталари бўйича қолдиқлар фоиз даромадини олиш учун ишлатилмайди, шунингдек, уларга ҳеч қандай фоизлар қўшиб ҳисобланмайди.

Apple Store ёки Play Market Tayyab мобиль иловасини ўрнатиб, бир дақиқада картани чиқариш мумкин. Дарҳол Apple Pay ва Samsung Pay ҳамёнидан фойдаланган ҳолда бутун дунё бўйлаб лаҳзали ўтказмалар ва контактсиз тўловларни амалга ошириш мумкин. Керак бўлганда етказиб бериш билан VISA пластик карточкасига буюртма бериш мумкин.
Пулни тўрт валюта: қозоғистон тангаси, АҚШ доллари, евро, россия рублида сақлаш мумкин. Дунёдаги ҳар қандай банкоматда нақд пулни ечиб олиш мумкин.

Карта Bank RBK ва VISA тўлов тизими билан ҳамкорликда Tayyab биринчи қозоқ ислом финтехи томонидан ишга туширилди. Tayyab институционал инвесторларидан бири Dubai Fintech Ventures венчур фонди ҳисобланади.

"Сўнгги жаҳон трендларига мос келувчи молиявий функциялардан фойдаланиш қулайлиги билан бир қаторда биз фойдаланувчиларимизга исломий ҳаёт тарзини амалда қўллаш учун қулай хизмат кўрсатамиз. Мисол учун, фақат Tayyab иловаси орқали сиз энг яқин масжид, намозхона ёки ҳалол кафени осонгина топишингиз мумкин. Шунингдек, иловада намоз ва азон вақти, қибла компаси, зикр ҳисоблагичи, закот ҳисоблагичи ва яна кўп нарсалар мавжуд", - дейди CEO Tayyab бош директори Дониёр Успанов.

Казино, шунингдек, ҳар қандай қимор ва лотерея бизнеси муассалари, спиртли ичимликлар ва тамаки маҳсулотларини сотишга ихтисослашган дўконларда тўлашга мўлжалланмаганлиги Tayyab биринчи рақамли исломий картанинг қўшимча ўзига хос хусусиятларидан ҳисобланади, ушбу чеклов маҳсулотларни сотиш бўйича универсал дўконларга тааллуқли эмас. Карта барлар ва тунги клубларнинг товарлари ва хизматлари учун тўлашга мўлжалланган эмас, бунда чеклов ресторанлар ва кафеларга тадбиқ этилмайди.

Ўзбекистон мусулмонлари диний идораси матбуот хизмати

327 марта ўқилди

Янгиликлар

Top