Ўзбекистон янгиликлари

Озарбайжонда Ўзбекистон зиёрат туризми салоҳияти намойиш қилинди

Мамлакатимизнинг Бокудаги элчихонаси Озарбайжон туризм ва менежмент университетида таҳсил олаётган ватандошимиз Маҳмуд Қораев кўмагида Ўзбекистон сайёҳлик салоҳиятининг онлайн-тақдимотини ўтказди. Унда Озарбайжон туризм ва менежмент университети раҳбарияти ва талабалари, «Yayra Tour» ва «More Tour» сайёҳлик компаниялари вакиллари қатнашди, деб хабар бермоқда “Дунё” АА.

Тақдимот иштирокчилари Ўзбекистонда туризм соҳасини ривожлантириш бўйича кўрилаётган чора-тадбирлар, шунингдек, мамлакат туризм саноатининг янги қиёфаси, унинг халқаро стандартларга жавоб берадиган ривожланган инфратузилмаси билан таништирилди.

Шунингдек, мамлакатимиз тарихи, ЮНEСКО Бутунжаҳон мероси рўйхатига киритилган Тошкент, Самарқанд, Бухоро, Хива, Шаҳрисабз ва Фарғона водийси шаҳарлари меъморчилиги ва маданиятининг энг қадимий ёдгорликлари ҳақида маълумот тақдим этилди.

Бундан ташқари, зиёрат туризми салоҳияти, янги виза сиёсати, сайёҳлик визалари беришнинг соддалаштирилган тартиби, туризм соҳасидаги сармоявий имкониятлар ҳақида сўзлаб берилди.

Элчихона ўзбекистонлик сайёҳларни Озарбайжонга ва озарбайжонлик сайёҳларни Ўзбекистонга етказиш учун икки томонлама чартер авиақатновларини ташкил этишга кўмаклашиш орқали Ўзбекистон ва Озарбайжон ўртасидаги сайёҳлик оқимини тиклаш бўйича амалий чоралар кўраётгани таъкидланди.

 

Ўзбекистон мусулмонлари идораси матбуот хизмати

376 марта ўқилди

Янгиликлар

Top