20 Сентябр, 2024, 17 Рабиъул аввал, 1446
20 Сентябр, 2024, 17 Рабиъул аввал, 1446
Ўзбекистон элчихонаси ва Имом Бухорий халқаро илмий-тадқиқот маркази (ИБХИТМ) ҳамкорлигида Малайзия Ислом тушунчаси институти (IKIM) билан "Ислом ва замонавийлик" мавзусида вебинар ўтказилди, деб хабар бермоқда «Дунё»ахборот агентлиги.
Тадбир томонларнинг мусулмон дунёси олимлари ва мутафаккирларининг бой мероси, замонавий глобал муаммоларни ҳал этишда диннинг ролига бағишланган қўшма вебинарлар туркумини ишга тушириш бўйича музокаралари ортидан эришилган келишувларни амалга ошириш доирасида ташкил этилди.
Вебинар "IKIM" телеканалида ва институтнинг расмий Facebook саҳифаси орқали 13 мингдан ортиқ аудитория билан реал вақт режимида эфирга узатилди.
Тадбирда IKIM директори муовини Моҳд Зайди бин Исмоил, ИБХИТМ директори муовини Отабек Муҳаммадиев ва IKIM собиқ Бош директори, Малайя университети фахрий профессори Азизан бинти Баҳаруддин иштирок этдилар.
Вебинар давомида Ўзбекистон ҳукуматининг Ислом цивилизациясининг бой меросини ҳар томонлама ўрганиш, асраб-авайлаш ва кўпайтириш, бағрикенглик маданиятини ривожлантириш ва Ислом динининг инсонпарварлик моҳиятини оммалаштириш масалаларига ҳар томонлама ёндашуви қайд этилди.
Тингловчиларга Ўзбекистоннинг маданий ва интелектуал мероси, Ислом Уйғониш даврининг икки даврининг жаҳон цивилизацияси тарихидаги аҳамияти ва замонавий фан ва фалсафа тараққиёти ҳақида батафсил маълумот берилди. Ҳадис ва Ислом ҳуқуқи бўйича мутахассис Алоуддин Усмоний Самарқандийнинг илмий мероси, ИБХИТМ олиб борган асарларининг тадқиқот натижалари келтирилди.
Тадбир давомида турли маданият ва дин вакилларининг тинч-тотув яшашини таъминлаш, замонавий глобал муаммоларни ҳал этиш, хусусан, "яшил ўсишни" рағбатлантириш, иқлим ўзгариши қаршисида масъулиятли ва барқарор истеъмол маданиятини тарғиб қилишда диннинг ўрни ҳам муҳокама қилинди.
Маълумот учун: IKIM илмий Ислом соҳасида фундаментала ва чуқур тадқиқотларни режалаштириш ва ўтказиш мақсадида 1992 йилда ташкил этилган. Малайзиянинг собиқ бош вазири Абдуллоҳ Аҳмад Бадавий Директорлар Кенгашининг раиси ҳисобланади. 2020 йилда IKIM ва ИБХИТМ ўртасида ҳамкорлик шартномаси имзоланган.
Ўзбекистон мусулмонлари идораси Матбуот хизмати
Биз йўқлик даштида, жонимиз руҳият оламида эди. Отамиз ва онамиз сабабидан бизлар ёруғ оламни кўрдик. Бу дунёда неки мартабага эришсак, барчасида уларнинг ҳақлари бор. Ҳатто улар ўзларининг фарзанд олдидаги бурчларини адо қилмасалар ҳам, бизлар уларни фарзанд сифатида қадрлашга мажбурмиз.
Ҳаётда оталик бурчини адо қилмайдиган эркаклар, оналик меҳрини фидо қилмайдиган аёллар топилиб туради. Ҳатто сериаллар таъсирими, охирзамон аломатими, ҳар ҳолда “ўзим учун яшашим керак!” деган шиорлар аёлларда тобора кўпайиб бормоқда, буни тан оламиз. Бироқ улар нодон бўлса, фарзанд ҳам оқпадар бўлиш йўлини ихтиёр қилурми? Эртага нима бўлади, бу аҳволда?
Бугунги кунда барча соҳадаги асосий камчилик ҳар ким бировдан ўз ҳуқуқини талаб қилиб, унинг ҳақ ва ҳуқуқлари ҳақида деярли ўйлаб кўрмаслиги ва бошқалар ўз вазифаларини адо қилмаслиги ҳақида дунё айвонида (ижтимоий тармоқларда) бонг уриб, ўз вазифасини унутиб қўйишлиги бўлиб турибди.
Бу иллат оилада ҳам ўз ҳукмронлигини ўтказмоқда. Аёллар-ку, ожиза, уларни тушунса бўлади. Аммо эрлар ҳам уялмай-нетмай, заррача ор қилмай, бир хотинни йўлга сола олмай ҳокимиятгача боришмоқда.
Ўзим шахсан шундай тадбирларда қатнашганман. Юқори ташкилотларга бориб, “хотиним билан яраштириб қўйинглар” деганларни муҳокама қилганмиз. Уларнинг ишларини маҳалла фаоллари ҳам, масжид ходимлари ҳам ижобий ҳал қилишга ожиз. У тараф ҳам ўз ҳақини талаб қилади, бу тараф ҳам.
Шунингдек, ҳукуматдан ҳақ талаб қилиш ҳам бор. Ўзларини жабрдийда қилиб кўрсатади. Яхшилаб суриштирсангиз, ўзларининг фуқаролик бурчларини адо қилмайди.
Инсон аввало ўз нафси олдида адолатли бўлиши керак. Ана ундан кейин қайсидир сабаблар туфайли муаммоларга дуч келса, майли ҳаққини сўрасин. Аслида ҳамма ўз бурчи ва вазифасига содиқ бўлса, бунчалар муаммолар кўп бўлмас эди. Илло бўлса ҳам онда-сонда учрар эди.
Муқаддас Ислом дини таълимотларида ҳам жаннатдаги олий мартабаларга етишиш учун Аллоҳ таолога ибодат қилиш, бандаларнинг ҳаққига тажовуз қилмаслик шарти бор.
Агар сиз бурчингизни сидқидилдан адо қилсангиз, шунда барака топасиз, иншаАЛЛОҲ.
Улуғбек қори ЙЎЛДОШЕВ
Иймон 
Намоз 
Рўза 
Закот 
Ҳаж 
Қуръон 
Ислом сабоқлари 
Aлоқа