Hamma narsaning odobi bo‘lganidek, taom yemoqning ham o‘ziga yarasha odobi bor. Ana shu odobni o‘rganib, unga amal qilish g‘oyat foydali amaldir.

Taom yeyish shartlari:

• Taomi halol bo‘lmog‘i kerak. Chunki duo va ibodatlarning qabul bo‘lishiga halol luqma sabab bo‘ladi;
• Rizqni Alloh taolodan deb bilish;
• Alloh taolo taqsimotiga rozi bo‘lish;
• Modomiki, yegan taomining quvvati badanida bor ekan gunoh ish qilmaslik.

Taom yeyish odoblari:

• Taom yeyishdan oldin ikki qo‘lini bo‘g‘imigacha uch marta yuvish;
• Taomni “Bismillahir-rohmanir-rohim” ni aytib boshlash;
• Taomni o‘ng qo‘li bilan yeyish. Payg‘ambarimiz Muhammad alayhissalom aytadilar: “Har biringiz o‘ng qo‘li bilan yeng va o‘ng qo‘l bilan iching va o‘ng qo‘l bilan bering. Chunki shayton chap qo‘l bilan yeydi, chap qo‘l bilan ichadi va chap qo‘l bilan beradi;
• Taom yeyishni tuz bilan boshlab, tuz bilan tugatmoq;
• Nonni ikki qo‘l bilan sindirmoq. Chunki non ulug‘ ne’matdir.
• Qo‘l bilan yeyiladigan taomni uch barmoq, yani, bosh barmoq, ko‘rsatkich barmoq va o‘rta barmoq bilan yemoq;
• Taomni o‘z oldidan yemoq;
• Taom yegan idishni yalamoq;
• Taom yegandan so‘ng “Alhamdulillah” demoq. Rasululloh alayhissalom taomdan so‘ng ushbu duoni aytardilar: “Bizlarni taomlantirgan va suv bilan qondirgan hamda bizlarni musulmonlar jumlasidan qilgan Alloh taologa hamdu sanolar bo‘lsin”;
• Taomdan so‘ng ikkala qo‘lini bo‘g‘imigacha uch marta yuvmoq;
• Sheriklari bilan taom yemoq. Rasululloh alayhissalom: “Jam bo‘lingizlar taomlaringizga-ki, Alloh taolo ushbu taomga baraka beradi”, deb marhamat qilganlar;
• Taomning oxirigacha sheriklari bilan birga yeb turmoq;
• Luqmani kichik olmoq;
• Tovoqning chetidan olmoq;

Shuni aytish kerakki, ovqatlanayotganda bosh va boshqa azolarni qashilamoq, og‘zida luqma bilan gaplashmoq, yonidagi sherigining ovqatlanishiga qaramoq, taomni issiq holda yemoq, taomni ayblamoq, taomni puflamoq, taom yurib ketayotib yemoq, tik turib taom yemoq nomaqbul amallardan.

Xulosa qilib aytganda, duo va ibodatlarning qabul bo‘lishi, komil va oqil farzandlarning dunyoga kelishi luqmai halolga bog‘liqdir.

N.NURMATOV,

Marhamat tumanidagi  «Sunna»  masjidi imom-xatibi