Toshkent islom instituti Magistratura yo‘nalishi va Imom Termiziy nomidagi islom institutiga kirish imtihonlari 29-30 avgust kunlari bo‘lib o‘tadi
O‘zbekiston musulmonlari idorasi tasarrufidagi Imom Buxoriy nomidagi Toshkent islom instituti magistraturasiga hujjat topshirgan abiteriyentlar shu yilning 29 avgust kuni Teologiya (Islom ilohiyoti, falsafasi va moturidiylik ta’limoti) mutaxassisligi bo‘yicha Aqoid va islom falsafasi fanidan, Teologiya (Hadis ilmlari) mutaxassisligi bo‘yicha Hadis va Mustalahul-hadis fanidan ijodiy imtihon topshiradilar. Shuningdek, 30 avgust kuni chet tili fanidan test sinovidan o‘tadilar.
Toshkent islom instituti Modul ta’lim tizimiga hujjat topshirgan abituriyentlar esa 30 avgust kuni ixtisoslik fanlari hamda ijtimoiy-gumanitar fanlar bo‘yicha test sinovi topshiradilar.
Imom Termiziy nomidagi islom institutiga hujjat topshirgan abituriyentlar uchun joriy yilning 29 avgust kuni Hadis va Mustalahul-hadis fani bo‘yicha ijodiy imtihon, 30 avgust kuni Arab tili va O‘zbekiston tarixi fanlaridan test sinovlari o‘tkaziladi.
Imtihonlar Imom Buxoriy nomidagi Toshkent islom instituti binosida bo‘lib o‘tadi. Ijodiy imtihonlar soat 08:00 da, test sinovlari 06:30 da boshlanadi.
Abituriyentlarni ro‘yxatga olish jarayoni imtihonlar boshlanishidan yarim soat avval boshlanadi.
Hurmatli abituriyentlar, imtihonlarga kechikmagan holda, o‘z vaqtida ishtirok etishingizni so‘raymiz!
Ma’lumot o‘rnida: imtihon ruxsatnomalarini olish tartibi bo‘yicha qo‘shimcha ma’lumot beriladi!
O‘zbekiston musulmonlari idorasi
Namozim buzildimi?
Savol: Masjiddagi jamoatda ba’zan oldingi safdagi odamning kiyimi kalta bo‘lgani uchun sajdada orqasi qisman ochilib qoladi va bexosdan unga ko‘zimiz tushib qoladi. Shu holatda tahorat yoki namozimiz buzilmaydimi?
Javob: Bismillahir Rohmanir Rohiym. Ulamolar tahorat va namozni buzuvchi omillarni birma-bir sanaganlar. Ular ichida birovning avratiga ko‘z tushib qolish sababli buziladi, degan gap yo‘q. Birovning, xoh ayolning, xoh erkakning avratiga qarash sababli bavl yoki biror suyuqlik chiqmasa, tahorat sinmaydi. Ammo bu degani qarash, nazar solish mumkin ekan, deb tushunmaslik kerak. Chunki bunday ishlar aslo mumkin emas.
Bir narsani yodda tutish lozimki, namoz o‘qish uchun tayyorlanayotgan inson namoz o‘qish asnosida avratlari ochilib qolmasligining chorasini ko‘rishi kerak bo‘ladi. Chunki bir rukn (farz amali) miqdoricha avratining to‘rtdan biri ochilib tursa, uning namozi buziladi. Vallohu a’lam.
O‘zbekiston musulmonlari idorasi
Fatvo markazi
- «
- »