1. Жанозани тезлатиш.

Расулуллоҳ соллаллоҳу алайҳи васаллам: “Маййитни сўнгги йўлга тезроқ олиб боринглар, чунки агар у аҳли солиҳлардан бўлса, уни кутилаётган жойга тезроқ олиб бормоқ даркор. Агар бундай бўлмаса, елкангизни нохуш юкдан тезроқ холи қилган бўласиз”, дедилар.

2. Жанозада иштирок этиш.

Жаноза намозини ўқиш, қабргача бирга бориш, дафндан кейин маййитнинг ҳақига дуо қилиш.

Абу Ҳурайра розияллоҳу анҳудан ривоят қилинади. Расулуллоҳ соллаллоҳу алайҳи васаллам: “Ким (маййит олиб чиқиб кетилишидан) аввал маййитнинг уйига келса, унга бир қийрот, жаноза ортидан эргашса, унга яна бир қийрот, жаноза намозини ўқиса, яна бир қийрот, сўнг дафн этилгунича кутса, унга яна қийрот бўлади”, дедилар (Имом Баззор ривояти).

Абу Ҳурайра розияллоҳу анҳудан ривоят қилинади. Расулуллоҳ соллаллоҳу алайҳи васаллам: “Ким иймон ва савоб умиди ила бир мусулмоннинг жанозасига қатнашса, жанозаси ўқилиб, дафнидан фориғ бўлингунча турса, икки қийрот ажр билан қайтади. Ҳар бир қийрот Уҳуд тоғичадир. Ким жанозани ўқиса ва дафн қилинмай туриб қайтса, бир қийрот билан қайтади”, дедилар (Имом Бухорий ривояти).

3. Жанозадан насиҳат олиш, ўлимни эслаш.

Жанозада иштирок этаётган одам турли гапларни гапириши, кулиши ёки дунё ташвиши билан овора бўлиши мумкин эмас.

4. Аёл кишининг тобути устини каттароқ мато билан тўсиш.

5. Тобутни кўтарганда қуйидаги дуони ўқиш: “Субҳана алҳай аллазий лаа ямуту”.

6. Тобутнинг ортидан бориш.

7. Тобут елкадан ерга қўйилганидан кейингина ўтириш.

Даврон НУРМУҲАММАД