Kecha, 15 yanvar kuni O‘zbekiston musulmonlari idorasi raisi, muftiy Shayx Nuriddin Xoliqnazar hazratlari va Din ishlari bo‘yicha qo‘mita raisi Sodiqjon Toshboyev Misr Arab Respublikasining mamlakatimizdagi elchisi Tamer Fathi Abdussalom Hammadni qabul qildilar. 

Muloqot chog‘ida ikki davlat Rahbarlarining do‘stona munosabatlari tufayli O‘zbekiston va Misr o‘rtasida yaqin hamkorlik aloqalari izchil rivojlanib borayotgani, ayniqsa, mana shunday iliq munosabatlar natijasida ko‘p qirrali hamkorlik va keng ko‘lamli sheriklik kengaygani, shuningdek, diniy-ma’rifiy sohadagi hamkorlik yangi bosqichga ko‘tarilgani qayd etildi. 

Ayniqsa, O‘zbekiston musulmonlari idorasi va Misrning diniy muassasalari – Azhari sharif, Vaqflar vazirligi va Dor al-ifto o‘rtasidagi hamkorlik aloqalari jadal rivojlangani, xususan, diniy ta’lim yo‘nalishida malakali kadrlarni jalb qilish, imom-xatiblar malakasini oshirish, xalqaro anjuman-ko‘rgazmalarda ikki tomonlama faol ishtirok va hamkorlik qilinayotgani kabi jihatlarga urg‘u qaratildi. 

Elchi janoblari samimiy qabul uchun minnatdorlik bildirib, ikki yurtni chuqur tarixiy do‘stlik, tamaddun va madaniy rishtalari bog‘lab turishi, xususan, buyuk vatandoshimiz Ahmad al-Farg‘oniy Misrda Nil daryosi suvining miqdorini o‘lchaydigan “Nilometr” asbobi ixtirosi va asli o‘zbekistonlik Ahmad ibn Tulun homiyligida Misr diyori ilm-fan va madaniyatiga beqiyos hissa qo‘shgani, shuningdek, mamlakatdagi “O‘zbekiya” nomli daha go‘zal bog‘lari bilan ajralib turishini alohida qayd etdi. 

Tomonlar mutaxassislar kasb mahoratini oshirish, ilmiy-tadqiqot, tajriba almashish, anjumanlar o‘tkazish va jaholatga qarshi kurashish yo‘nalishida o‘zaro hamkorlikni yanada rivojlantirishga kelishib oldilar.

Do‘stona ruhda o‘tgan uchrashuvda o‘zaro esdalik sovg‘alari almashildi. 

O‘zbekiston musulmonlari idorasi
Matbuot xizmati