Таниқли уламо Шайх Юсуфхон тўра Шокиров хотирланди
Китoб туманидаги Хожа Бухорий ўрта махсус ислом таълим муассасасида таниқли уламо, кўп йиллар давомида диний-маърифий соҳада фидокорона хизмат қилган Шайх Юсуфхон тўра Шокиров таваллудининг 100 йиллигига бағишланган маънавий-маърифий тадбир бўлиб ўтди.
Тадбирнинг муҳим жиҳатлари:
– Анжуманда алломанинг фарзанди, кўп йиллар диний соҳада самарали меҳнат қилган Муҳаммад Акмалхон домла Шокиров иштирок этди.
– Таълим муассасаси мудири Ўткир Ғузаров Шайх ҳазратларининг илм-фан ва маърифат ривожига қўшган беқиёс ҳиссасини алоҳида қайд этди.
– Муҳаммад Акмалхон домла оталарининг ҳаёт йўли, илмга бўлган ихлоси ва жамият манфаати йўлидаги ибратли фаолияти ҳақида сўзлаб берди.
Тадбир давомида талабаларга:
– Илм олишнинг юксак мақоми;
– Одоб-ахлоқ меъёрларига риоя қилиш;
– Илм соҳибига хос масъулиятни ҳис этиш борасида қимматли насиҳатлар берилди.
Тадбир якунида Қуръон тиловат қилиниб, ўтганлар ҳақига дуолар қилинди.
Эзгу ниятлар билан юртимиз тинчлиги ва халқимиз фаровонлиги сўралди.
Xojabuxoriy.uz
Туркий давлатлар муфтийлари Боку шаҳрида жамланади
Жорий йилнинг 13–16 сентябрь кунлари Озарбойжон пойтахти Боку шаҳрида Туркий давлатлар муфтийлари кенгашининг навбатдаги VII йиғилиши ҳамда унинг доирасидаги бир қатор тадбирлар бўлиб ўтади.
Йиғинларда туркий дунёнинг етакчи дин пешволари – Ўзбекистон мусулмонлари идораси раиси, муфтий Шайх Нуриддин Холиқназар, Кавказ мусулмонлари идораси раиси, Шайхулислом Аллоҳшукур Пошшозода, Туркия Диёнат ишлари бошқармаси раиси Сафи Арпагуш, Қозоғистон мусулмонлари диний бошқармаси раиси, бош муфтий Наврўзбай ҳожи Тағанули, Қирғизистон мусулмонлари диний назорати раиси, муфтий Абдулазиз қори Закиров, Туркманистон муфтийcи Раҳмон Қурбонмуродов кабилар бошчилигидаги туркий давлатлар уламоларидан иборат делегациялар иштирок этади.
Мамлакатимиз делегацияси сафидан Ўзбекистон мусулмонлари идораси Уламолар Кенгаши, Фатво маркази, ҳудудий вакилликлар ҳамда олий диний таълим муассасаларидан вакиллар жой олган.
Тадбирлар доирасида уламолар мусулмон уммати учун муҳим бўлган шаръий масалалар, замонавий фатволар ва муштарак ташаббусларни муҳокама қилиб, якуний ҳужжатларни имзолайдилар. Шунингдек, илмий-амалий анжуман, икки томонлама музокаралар ҳамда табаррук қадамжолар зиёрати ҳам режалаштирилган.
Ўзбекистон мусулмонлари идораси Матбуот хизмати
- «
- »