Хива шаҳрига янги бош имом-хатиб тайинланди
Хива шаҳар "Сайд Ниёз Шоликор" жоме масжиди имом ноиби бўлиб ишлаб келаётган Бектемир Ходжаев Хива шаҳар бош имом-хатиби ва ушбу масжид имом-хатиби этиб тайинланди.
Маълумот учун: Бектемир Исмоилович Ходжаев 1977 йилда Хива туманида таваллуд топган. 2001 йилда Тошкент ислом институтини тамомлаган. Ўтган давр мобайнида (2001–2026 йиллар) Ўзбекистон мусулмонлари идораси тизимида турли масъул лавозимларда самарали фаолият юритган.
Аллоҳ таолодан Бектемир Ходжаевга келгуси хайрли ишларида куч-қувват ва муваффақиятлар тилади.
Хоразм вилояти вакиллиги
Матбуот хизмати
Туркий давлатлар муфтийлари Боку шаҳрида жамланади
Жорий йилнинг 13–16 сентябрь кунлари Озарбойжон пойтахти Боку шаҳрида Туркий давлатлар муфтийлари кенгашининг навбатдаги VII йиғилиши ҳамда унинг доирасидаги бир қатор тадбирлар бўлиб ўтади.
Йиғинларда туркий дунёнинг етакчи дин пешволари – Ўзбекистон мусулмонлари идораси раиси, муфтий Шайх Нуриддин Холиқназар, Кавказ мусулмонлари идораси раиси, Шайхулислом Аллоҳшукур Пошшозода, Туркия Диёнат ишлари бошқармаси раиси Сафи Арпагуш, Қозоғистон мусулмонлари диний бошқармаси раиси, бош муфтий Наврўзбай ҳожи Тағанули, Қирғизистон мусулмонлари диний назорати раиси, муфтий Абдулазиз қори Закиров, Туркманистон муфтийcи Раҳмон Қурбонмуродов кабилар бошчилигидаги туркий давлатлар уламоларидан иборат делегациялар иштирок этади.
Мамлакатимиз делегацияси сафидан Ўзбекистон мусулмонлари идораси Уламолар Кенгаши, Фатво маркази, ҳудудий вакилликлар ҳамда олий диний таълим муассасаларидан вакиллар жой олган.
Тадбирлар доирасида уламолар мусулмон уммати учун муҳим бўлган шаръий масалалар, замонавий фатволар ва муштарак ташаббусларни муҳокама қилиб, якуний ҳужжатларни имзолайдилар. Шунингдек, илмий-амалий анжуман, икки томонлама музокаралар ҳамда табаррук қадамжолар зиёрати ҳам режалаштирилган.
Ўзбекистон мусулмонлари идораси Матбуот хизмати
- «
- »