O‘zbekistondagi Islom sivilizatsiyasi markazida xalqaro konferensiya o‘tkazilmoqda
Bugun, 5 may kuni O‘zbekistondagi Islom sivilizatsiyasi markazida “Islom sivilizatsiyasida ilmiy an’ana: manbalar, dolzarb masalalar va salohiyat” mavzusida nufuzli xalqaro konferensiya o‘z ishini boshladi. Ushbu nufuzli anjuman Prezidentimiz Shavkat Mirziyoyevning sivilizatsiyalar o‘rtasidagi muloqotni mustahkamlash, tinchlik va o‘zaro anglashuv madaniyatini rivojlantirish hamda ilm-fanni barqaror taraqqiyot asosi sifatida ilgari surishga qaratilgan xalqaro tashabbuslari ijrosi doirasida tashkil etilmoqda.
Tadbirda oliy martabali mehmon sifatida ishtirok etayotgan Malayziya Qirolichasi Oliy Hazratlari Radja Zarit Sofiya o‘z nutqida ikki davlat o‘rtasidagi ilmiy diplomatiya va xalqaro gumanitar hamkorlikning yangi bosqichi boshlanishini alohida qayd etadi. Anjuman davomida 300 nafardan ortiq mahalliy va xorijiy olimlar, davlat va jamoat arboblari hamda diniy soha vakillari islom ilmiy merosini o‘rganishning zamonaviy yondashuvlarini muhokama qiladi.
Anjuman doirasida O‘zbekiston va Malayziyaning yetakchi ilmiy-ta’lim muassasalari, xususan, Malayziya texnologiya universiteti hamda O‘zbekiston xalqaro islom akademiyasi, Imom Buxoriy va Imom Moturidiy xalqaro ilmiy-tadqiqot markazlari o‘rtasida hamkorlik memorandumlari imzolanadi.
Tadbirning muhim qismi sifatida Malayziya tomoni “Nasyrul Qur’an” markazida nashr etilgan 20 000 nusxa Qur’oni karimni yurtimizning “Vaqf” xayriya jamoat fondiga hadya qiladi. O‘z navbatida, Malayziya Qirolichasi Radja Zarit Sofiyaga “Malayziya Islom san’ati muzeyi to‘plami” nomli maxsus kitob-albom taqdim etiladi.
Konferensiya yakunida xorijlik ekspertlar va mehmonlar uchun Islom sivilizatsiyasi markazi ekspozitsiyalari bo‘ylab ekskursiya hamda Samarqand va Buxoro kabi tarixiy shaharlarimizga madaniy-ilmiy ziyoratlar tashkil etiladi. Mazkur tadbir nafaqat ikki davlat aloqalarini, balki butun islom olamida ilm-fan va ma’naviyat birligini mustahkamlash yo‘lida muhim qadam bo‘lib xizmat qiladi.
O‘zbekiston musulmonlari idorasi
Matbuot xizmati
Turkiy davlatlar muftiylari Boku shahrida jamlanadi
Joriy yilning 13–16 sentyabr kunlari Ozarboyjon poytaxti Boku shahrida Turkiy davlatlar muftiylari kengashining navbatdagi VII yig‘ilishi hamda uning doirasidagi bir qator tadbirlar bo‘lib o‘tadi.
Yig‘inlarda turkiy dunyoning yetakchi din peshvolari – O‘zbekiston musulmonlari idorasi raisi, muftiy Shayx Nuriddin Xoliqnazar, Kavkaz musulmonlari idorasi raisi, Shayxulislom Allohshukur Poshshozoda, Turkiya Diyonat ishlari boshqarmasi raisi Safi Arpagush, Qozog‘iston musulmonlari diniy boshqarmasi raisi, bosh muftiy Navro‘zbay hoji Tag‘anuli, Qirg‘iziston musulmonlari diniy nazorati raisi, muftiy Abdulaziz qori Zakirov, Turkmaniston muftiyci Rahmon Qurbonmurodov kabilar boshchiligidagi turkiy davlatlar ulamolaridan iborat delegatsiyalar ishtirok etadi.
Mamlakatimiz delegatsiyasi safidan O‘zbekiston musulmonlari idorasi Ulamolar Kengashi, Fatvo markazi, hududiy vakilliklar hamda oliy diniy ta’lim muassasalaridan vakillar joy olgan.
Tadbirlar doirasida ulamolar musulmon ummati uchun muhim bo‘lgan shar’iy masalalar, zamonaviy fatvolar va mushtarak tashabbuslarni muhokama qilib, yakuniy hujjatlarni imzolaydilar. Shuningdek, ilmiy-amaliy anjuman, ikki tomonlama muzokaralar hamda tabarruk qadamjolar ziyorati ham rejalashtirilgan.
O‘zbekiston musulmonlari idorasi Matbuot xizmati
- «
- »