Сайт тест ҳолатида ишламоқда!
16 Ноябр, 2026   |   6 Жумадул сони, 1448

Тошкент шаҳри
Бомдод
05:50
Қуёш
07:12
Пешин
12:13
Аср
15:22
Шом
17:06
Хуфтон
18:23
Bismillah
16 Ноябр, 2026, 6 Жумадул сони, 1448

Сизнинг беҳуда ишларга вақтингиз йўқ!

06.05.2026   14042   1 min.
Сизнинг беҳуда ишларга вақтингиз йўқ!

Тўлин ой нур сочар, юлдузлар чароғон,
Бизни қандай ўлдиролсин ташвишу ғам?!

 

Турли хил эҳтимоли бўлган фойдасиз тортишув ва баҳсларга киришишдан сақланинг. Чунки бу нарса кўнгил сиқилиши ва хаёлнинг тарқоқ бўлишига олиб боради. Турли хил назарий кўринишларни қабул қилиши мумкин бўлган масалаларда ҳаммани ишонтиришга уринманг. Фикрларингизни сокинлик билан баён қилинг, шовқин-сурон, бир фикрда маҳкам туриб олиш ва талвасага тушишни бутунлай тарк этинг.

Ҳаммага раддия бериб танқид қилавериш қалбингиз роҳатини йўқотади ва сизни ўзингиз лойиқ бўлмаган ҳолга тушириб қўяди. Мулойим ва инсонларга суюкли сўзларингизни юмшоқлик ҳамда сокинлик билан гапиринг. Шунда инсонларнинг қалбини эгаллайсиз, уларнинг руҳларига жон бағишлайсиз.

Шунингдек, инсонларни ғийбат қилиш, уларни мазаҳ қилиб мулзам этиш уларнинг қалбига маҳзунлик ва ғам солади. Бу эса сизнинг ажр-савобларингизни кетказиб, гуноҳларни елкангизга юклайди, хотиржамлигингизни йўқотади.

Инсонларнинг айбларини қўйиб, ўзингизни айбларингизни тўғирлаш билан машғул бўлинг. Чунки Аллоҳ таоло бизларни камчиликсиз ва бегуноҳ қилиб яратмаган, ҳаммамизнинг ҳам айбларимиз ва гуноҳларимиз бор. Ўзининг айбини тўғрилаш билан банд бўлган, бошқаларнинг айбини қидиришдан тийилган инсонга жаннат бўлсин!

Шуъла: Фарзанди йиқилиб тушган аёл бақир-чақир қилиб, йиғлаб вақтини зое қилмаслиги, аксинча, унинг жароҳатини боғлашга интилиши лозим.


Доктор Оиз ал-Қарнийнинг
"Дунёдаги энг бахтли аёл" китобидан

 

Бошқа мақолалар
Янгиликлар

Бағрикенглик - бирдамлик ва тотувлик белгиси

16.11.2026   1377   1 min.
Бағрикенглик - бирдамлик ва тотувлик белгиси

Бирлашган Миллатлар Ташкилоти Бош Ассамблеяси қарорига мувофиқ ҳар йили 16 ноябрь - Халқаро бағрикенглик куни сифатида кенг нишонланади.

Ўзбекистонда ушбу сана муносабати билан анъанавий равишда “Бағрикенглик ҳафталиги” ўтказилади.

ЎзА хабарига кўра, ҳафталик тадбирлари доирасида бугун Ўзбекистон Республикаси Миллатлараро муносабатлар ва хориждаги ватандошлар масалалари бўйича қўмитаси ва бир қанча ташкилотлар вакиллари “Янги Ўзбекистон” боғида Мустақиллик монументи пойига гулчамбар қўйиб, халқимизнинг озодлик йўлидаги жасоратига эҳтиром билдирди.

Сўнг “Яшил макон” умуммиллий лойиҳаси доирасида дарахт кўчатлари экилди. Кўчат экиш тадбири турли миллат вакилларини атроф-муҳитни асраш ва яшил ҳудудларни кенгайтиришдек умумий мақсад йўлида бирлаштирди.

Шунингдек, ҳафталик доирасида “Диний бағрикенглик” кўкрак нишонини топшириш маросими ҳам бўлиб ўтди. Дин ишлари бўйича қўмитада бир гуруҳ юртдошларимиз “Диний бағрикенглик” кўкрак нишони билан тақдирланди.

Тадбирда вазирлик ва идоралар, жамоат ташкилотлари, диний конфессиялар вакиллари, миллий маданий марказлар фаоллари, диний бағрикенглик ва миллатлараро тотувликни мустаҳкамлашга муносиб ҳисса қўшиб келаётган ҳамюртларимиз, шунингдек ОАВ вакиллари иштирок этди.

Ҳафталик доирасида ўтказилаётган тадбирлар 130 дан ортиқ миллат ва элат, 16 та диний конфессия вакиллари ўртасидаги мулоқотни кенгайтириш, ёшларни мамлакатимиздаги маданий хилма-хиллик билан яқиндан таништириш ҳамда жамиятда ўзаро ҳурмат ва ҳамжиҳатликни мустаҳкамлашга қаратилган.

Ўзбекистон мусулмонлари идораси Матбуот хизмати

Ўзбекистон янгиликлари