“Katta Langar Qur'oni” Luvr muzeyidagi ko'rgazmada taqdim etiladi
Joriy yilning 24 noyabrdan 2023 yilning 6 martgacha Parijdagi Luvr muzeyida “O'zbekiston vohalari xazinalari. Karvon yo'llari chorrahasida” ko'rgazmasi bo'lib o'tadi. O'zA xabariga ko'ra, unda mamlakatimiz tarixi va madaniyatiga oid eng sara topilmalar, nodir eksponatlar namoyish etiladi. O'zbekistonni dunyoga tanitish yo'lida qo'yilgan ushbu katta qadam har tomonlama samarali bo'lishi va hamkorlik uchun yangi eshiklarni ochishi kutilmoqda.
Ko'rgazmaning ahamiyati va unga tayyorgarlik jarayonlari haqida O'zbekistonda Islom tsivilizatsiyasi markazi rahbari Shoazim Minovarov so'zlab berdi.
– 2018 yilda davlatimiz rahbari Frantsiyaga tashrif buyurdi. Bu – Yevropa davlatlariga birinchi rasmiy davlat tashrifi edi. Buning ramziy tomonlari ham bor: Frantsiya O'zbekiston kabi boshqa davlatlar bilan aloqalarda madaniy hamkorlikka juda katta ahamiyat beradi. Frantsiyaga tashrif doirasida davlatimiz rahbari Luvrga borishga vaqt topdilar. Bu jahondagi eng katta muzeylardan biri ekanligini barchamiz yaxshi bilamiz. Luvr – butun jahon durdonalarini o'zida saqlovchi xazina.
Insonni tom ma'noda inson qilib tarbiyalashda madaniyat, ma'naviyatning o'rni katta. Prezidentimizning Frantsiyaga tashrifi chog'ida O'zbekiston Respublikasi Vazirlar Mahkamasi huzuridagi Madaniyat va san'atni rivojlantirish jamg'armasi va Luvr muzeyi bilan ko'rgazma tashkil qilish to'g'risida shartnoma imzolangan edi. Oradan vaqt juda tez o'tdi va “O'zbekiston vohalari xazinalari. Karvon yo'llari chorrahasida” ko'rgazmasi boshlanishiga oz fursat qoldi. Nomidan ko'rinib turibdiki, u o'zida butun tariximiz, eng Qadimgi Varaxsha, Afrosiyob devoriy suratlaridan tortib, hozirga qadar madaniyat va san'at sohasiga tegishli osori-atiqalarni mujassam etadi. Bularning orasida alohida ta'kidlashga loyiq bo'lgan diniy, ma'naviy ahamiyatga ega eksponat – “Katta Langar Qur'oni”. Uning tarixi deyarli afsonaviy, chunki hali atroflicha o'rganish kerak bo'lgan jihatlari etarli. U VIII-X asrga oid deb taxmin qilinyapti. Hatto, Usmon Mushafidan oldinroq yozilgan bo'lishi mumkin, degan farazlar ham bor. Biz ko'rgazmaga olib boriladigan ushbu Qur'on sahifalariga dunyo miqyosida qiziqish juda katta. Umumiy hisobda 320 dan ortiq eng yaxshi eksponatlarimizni olib boryapmiz. Bu ko'rgazma juda samarali bo'ladi, deb o'ylayman. Chunki madaniyat sohasidagi hamkorlik mamlakatni, xalqni dunyoga juda tez tanitadi. Frantsiyaga bir yilda 60 million turist tashrif buyuradi. Luvrning o'ziga 10 milliondan ko'proq odam keladi. Ko'rgazma davomida u erda o'zimizni ko'rsatishimiz bizni yanada ko'proq e'tirof etishlariga, O'zbekistonga, uning madaniyati va tarixiga nisbatan qiziqish ortishiga sabab bo'ladi. Bu turizmni rivojlantirishda katta reklama vazifasini o'taydi. Odamlar ko'rgazmalar, o'zaro muloqot orqali bir-birini qanchalik yaxshi tanisa, o'rtadagi ishonch ham shunchalik mustahkam bo'ladi. Ishonch esa hamkorlikning boshqa yo'nalishlari uchun eshiklarni ochadi, – dedi Shoazim Minovarov.
O'zbekiston musulmonlari idorasi matbuot xizmati
Tarixni buzib ko‘rsatmaslik uchun
Vazirlar Mahkamasi huzuridagi Imom Buxoriy xalqaro ilmiy-tadqiqot markazida "Islom ma’rifati, hadis ilmi va Imom Buxoriy merosi" o‘quv kursi o‘tkazildi. Mutaxassislar tomonidan yodgorlik majmuasi gid-ekskursovodlari uchun o‘tkazilgan mashg‘ulotlar doirasida ekskursiya faoliyati bilan bog‘liq huquqiy, nazariy va amaliy masalalar ko‘rib chiqildi, xabar bermoqda “Samarkandskiy vestnik” nashri.
- Bu yerga tashrif buyurgan har bir ziyoratchi faqat ibodat qilish uchun emas, balki ma’naviy "oziq" olish uchun ham borishi kerak, - deydi Imom Buxoriy xalqaro ilmiy-tadqiqot markazi direktori Sh.Ziyodov. - Bu yerda faoliyat yuritayotgan gidlarning malakasini oshirish tizimini yo‘lga qo‘yar ekanmiz, ularga Imom Buxoriyning bizga qoldirgan merosini, bu merosning tarixiy manbalarini chuqur o‘rgatishimiz shart.
Kurs doirasida majmuaga birinchi marta tashrif buyurgan mehmonlar bilan muloqotning o‘ziga xos xususiyatlari muhokama qilindi. Xorijlik ziyoratchilarga nafaqat Imom al-Buxoriy hayotidagi faktlar va diniy qadriyatlarimizni yetkazish, balki boy madaniy merosimizni asrab-avaylash va yetkazish kabi dolzarb masalalar ko‘tarildi.
Gid-ekskursovodlar ham o‘z tajribalari bilan o‘rtoqlashib, kelgusidagi ishlarni tashkil etish bo‘yicha takliflar berdilar. Bu bevosita ekskursiyalarni o‘tkazish paytida yuzaga keladigan masalalarni muhokama qilish imkonini berdi.
Kurs O‘zbekiston Respublikasi Vazirlar Mahkamasi huzuridagi Din ishlari bo‘yicha qo‘mita, Diniy ta’lim sohasida kadrlar malakasini oshirish va qayta tayyorlash instituti, Imom Buxoriy xalqaro ilmiy-tadqiqot markazi, viloyat hokimligi hamda Imom Buxoriy yodgorlik majmuasini saqlash va uning atrofini obodonlashtirish departamenti tomonidan tashkil etildi.
Tarixiy obidalar va ziyoratgohlar turizm salohiyatining muhim qismi bo‘lgan Samarqand viloyati uchun malakali mutaxassislarni tayyorlash alohida ahamiyatga ega. Mehmonga tashrif buyuriladigan joyning tarixi qanchalik to‘liq va tushunarli ochib berilishi gidning professionalligiga bog‘liq. Shuning uchun ham gid-ekskursovodlarning malakasini muntazam oshirib borish, ularning kasbiy bilim va ko‘nikmalarini takomillashtirish hamda zamonaviy xizmat ko‘rsatish standartlarini joriy etish Samarqandda turizm xizmatlari sifatini oshirishda ustuvor yo‘nalishlardan biri bo‘lib qolmoqda.
O‘zbekiston musulmonlari idorasi Matbuot xizmati
- «
- »