15 Январ, 2026, 26 Ражаб, 1447
15 Январ, 2026, 26 Ражаб, 1447
Хабарингиз бор, икки ойдан бери уламоларимиз кенг халқ оммаси билан учрашиб, чекка ҳудудлардаги аҳоли билан мулоқотлар, жоме масжидларда мавъизалар ва эҳтиёжманд оилаларга ёрдамлар кўрсатиб келмоқдалар.
Аллоҳга шукрки, Қуръони каримга мухлис халқимизнинг истакларини инобатга олган ҳолда юртимизда Аллоҳнинг каломини ўрганиш ва ўргатиш борасида жуда катта ишлар амалга оширилмоқда. Айниқса, она-Ватанимизда Мусҳафи Шариф чоп этилиши, қорилар мусобақалари ўтказилиши ва Қуръон курслари кенгайишини алоҳида қайд этиш мумкин.
Мана шундай қувончли воқеалар давом этиб, диёримиздаги малакали қори устозларга Қироат илми бўйича Ижоза тақдим этиш каби хайрли анаъна жорий этилди. Қироат илми устози, 10 та қироат соҳиби Шайх Aлижон қори Файзуллоҳ Махдум ўғли мана шундай хайрли ишни бошлаб бердилар.
Айтиш керакки, Шайх Алижон қори Қуръони карим ва тажвид илми матнлари бўйича энг мўътабар устозларнинг ижозаларини олган. Шунингдек, у дунёдаги машҳур қироат алломаларига Қуръони каримни табаррукона ўқиб берган. Шайх Алижон қори дунёнинг кўплаб қироат илми уламолари томонидан эътироф этилган забардаст қорилардан бири. У Қуръон таълимида минглаб шогирдларнинг устози саналади.
Мазкур сафарлар давомида Шайх Алижон қори Файзуллоҳ Махдум ўғли томонларидин Сурхондарё вилоятидаги Имом Термизий ўрта махсус диний таълим муассасасининг “Қуръони карим ва тажвид” курси ўқитувчиси Музаффар қори Aҳмедов, Қашқадарё вилоятидаги “Хожа Бухорий” ўрта махсус диний таълим муассасаси ўқитувчилари Саидмуҳаммад қори Муҳибуллаев, Акбархон қори Асқаров ва Қарши шаҳар “Кўк гумбаз” жоме масжиди ходимлари Яҳёхон қори Аҳмедов ва Абусаидхон қори Валиевга Қуръони каримнинг тегишли сура ва оятлари бўйича Ижоза шаҳодатномалари тақдим этилди.
Маълумот ўрнида, Ижоза – ижоза берувчи шайх (муқрий)дан ижоза олувчи толиб (қорий)га ўқиш ва ўқитиш учун бериладиган шаҳодатдир. Ижоза – авлоддан авлодга Қуръони каримни овоз ила нақл қилишлик амалиётидир. Унга кўра, ижоза берувчини «Албатта, ижоза олувчининг тиловати бир ривоят ёки ривоятларга кўра юз фоиз тўғри бўлди», деб гувоҳлик бериши ҳамда унга Қуръони каримни ўқиш ва ўзидан бошқасига ўқитиш учун изн (рухсат) беришидир.
Аллоҳ таоло қориларимизнинг илмларини янада зиёда қилсин, олган ижозаларини муборак айласин.
Ўзбекистон мусулмонлари идораси Матбуот хизмати
“14 январь – Ватан ҳимоячилари куни” муносабати билан Ўзбекистон Республикаси Мудофаа вазирлиги, Чақирувга қадар бошланғич тайёргарлик ва ёшлар билан ишлаш департаменти бошлиғи, полковник Бахром Зулфиқоров, Тарбиявий ва мафкуравий ишлар бош бошқармаси бош мутахассиси Урол Маматалиев ва ИИВ Профилактика катта инспектори, катта лейтенант Шерзод Қудратов иштирокида Тошкент ислом институти талабаларига “Миллий армиямиз – мустақиллик посбони” мавзусида давра суҳбати ўтказилди.
Тадбирнинг асосий мақсади ёшларни ватанпарварлик руҳида тарбиялаш, мустақиллик ва тинчликни асраш, Ватан туйғуси, уни ҳимоялаш, мардлик, жасорат ва садоқат каби инсоний туйғулар борасидаги масъулиятни оширишдир.
Қуролли Кучларимиз ташкил этилганининг 34 йиллиги арафасида ўтказилган мазкур тадбирда меҳмонлар ўз ҳаёт йўллари, эришган ютуқлари, шунингдек, Ўзбекистон Республикаси Қуролли Кучларини ташкил этилиши, бугунги кунда ҳарбий хизматни ўташ учун яратилган шарт-шароитлар, ватан ҳимояси учун бел боғлаган ҳарбийларнинг машаққатли ҳамда шарафли фаолиятлари, уларнинг қатъиятлилиги, меҳнатсеварлиги, юртга, миллат ва қадриятларга содиқликлари ҳақида жуда жўшқин, кўтаринки руҳда талаба ёшларга сўзлаб бердилар.
Исломда Ватан туйғуси олий қадриятлардан бири ҳисобланиб, юрт сарҳадларини қўриқлаш, душманлардан мудофаа қилиш, аскарлик ва осойишталикни таъминлаш йўлида хизмат қиладиганларга улкан ажр ва савоблар ваъда қилинган.
Тадбирда Ёшлар масалалари ва маънавий-маърифий ишлар бўйича проректор Ё.Бухарбаев, Ёшлар билан ишлаш, маънавият ва маърифат бўлими ходимлари ва талабалар иштирок этди.
Иймон 
Намоз 
Рўза 
Закот 
Ҳаж 
Қуръон 
Ислом сабоқлари 
Aлоқа 