Шу кунларда Интернет ва ижтимоий тармоқларда Ўзбекистон мусулмонлари идораси раиси, муфтий Усмонхон Алимов ҳазратларининг саломатликлари тўғрисида турли асоссиз ва ҳақиқатга тўғри келмайдиган хабарлар тарқатилаётгани кузатилмоқда.
Маълум қиламизки, муфтий Усмонхон Алимов ҳазратларининг саломатликларини яхшилаш учун навбатдаги даволаниш муолажалари амалга оширилмоқда. Малакали тиббиёт мутахассислари ва шифокорлар томонидан ҳазратнинг соғлиқлари мунтазам кузатиб борилмоқда ҳамда даволаниш босқичлари ўтказилмоқда. Аллоҳ таолога шукрки, айни пайтда муфтий ҳазратларининг сиҳатлари барқарордир.
Одамлар орасида ҳар хил асоссиз ва воқеликка тўғри келмайдиган ёлғон хабарларни тарқатиш муборак Ислом динимизда гуноҳ саналиши, қонунчиликда эса жавобгарликка сабаб бўлишини яна бир бор эслатамиз.
Аллоҳ таоло барчамизни тўғри йўлда собитқадам айласин.
Ўзбекистон мусулмонлари идораси Матбуот хизмати
Бугун 17 июнь 2026 йил Хожа Бухорий ўрта махсус ислом таълим муассасасининг 2025-2026- ўқув йили битирувчи курс талабалари учун якуний аттестация имтиҳонлари Умумтаълим фанлари: Ўзбекистон тарихи, Миллий ғоя ҳамда Ўзбекистонни ривожлантириш стратегияси фанлари бўйича бошланди.
Мазкур имтиҳонларда Якуний аттестация комиссияси раиси, Ўзбекистон мусулмонлари идорасининг Қашқадарё вилоятидаги вакили, вилоят бош имом-хатиби, Уламолар кенгаши аъзоси Раҳматилло домла Усмонов иштирок этиб, битирувчи талабаларга муваффақият тиладилар ҳамда уларнинг келгусидаги илмий-маърифий фаолиятига оид тавсия ва насиҳатлар бердилар.
Якуний аттестация имтиҳонлари белгиланган тартиб ва мезонлар асосида давом этмоқда.