Ислом ҳамкорлик ташкилотига аъзо давлатлар учрашуви ўтказилади
Шу йил 27-28 ноябрь кунлари Нигер пойтахти Ниамей шаҳрида “Тинчлик ва тараққиёт йўлида терроризмга қарши курашда аҳдлашув” мавзусида Ислом ҳамкорлик ташкилоти Бош котибияти ташқи ишлар вазирлари кенгашининг 47-сессияси ўз ишини бошлайди.
Ташкилот Бош котиби доктор Юсуф бин Aҳмед ал-Усаймин 47-сессиянинг кун тартибига ислом дунёси долзарб мавзу ва масалалар, жумладан, исломофобияга қарши курашиш ва динлар шаънига билдирилаётган салбий фикрларга барҳам бериш бўйича ҳамкорлик қилиш ҳамда ташкилотга аъзо бўлмаган давлатлардаги мусулмон жамиятлари аҳволи ҳақидаги масалалар муҳокама қилинишини таъкидлади.
Шунингдек, Халқаро Суд маҳкамасида роҳинжалар тўғрисидаги масалани ўрганиш, маданият ва динлар ўртасидаги мулоқотни мустаҳкамлаш ва “ИҲТ 2025” иш дастурида эришилган ютуқларга оид мавзулар муҳокама этилади.
Халқаро алоқалар бўлими ходими
Илёсхон Аҳмедов тайёрлади.
Байрам шукуҳи Жиззахда ҳам давом этмоқда
Ўзбекистон Республикаси давлат мустақиллигининг 35 йиллиги арафасида “Вақф” хайрия жамоат фондининг Жиззах вилояти филиали томонидан хайрия тадбири ташкил этилди.
Вилоятнинг турли ҳудудларидан бўлган боқувчисини йўқотган 35 нафар боланинг хатна тўйи қилиб берилди.
Тадбирда болажонларга велосипед, костюм-шим ва кўйлаклар, ширинликлар қутиси совға қилиниб, байрам дастурхони ёзилди.
Болажонларга қўшилиб, уларнинг яқинлари ҳам қувончдан ташаккур айтиб, ташкилотчилар, Юртбошимиз ҳақларига дуолар қилишди.
Шунингдек, тадбир доирасида ижтимоий ҳимояга муҳтож, боқувчисини йўқотган ҳамда кам таъминланган оилалар фарзандларига эътибор ва ғамхўрлик кўрсатилиб, уларга ҳам ҳадялар улашилди.
Бундай эзгу ташаббуслар жамиятда ўзаро меҳр-оқибат, саховат ва ҳамжиҳатлик муҳитини мустаҳкамлаш, ёш авлод қалбида Ватанга муҳаббат ва инсонпарварлик туйғуларини юксалтиришга хизмат қилади.
Ўзбекистон мусулмонлари идораси
Матбуот хизмати
