Азон садолари янграйди
Нью-Йорк мэри Эрик Адамс Рамазон ойи, жума ва шом намозларида ташқи овоз кучайтиргичлар орқали азон айтишга рухсат берувчи фармойишни имзолади. Фармойиш Нью-Йорк шаҳридаги масжидларга дахлдор ҳисобланади. Бу ҳақда “Ал Жазира” нашри хабар бермоқда.
Шаҳар мэри эндиликда жума ва шом намозига азонни ҳеч қандай эътироссиз айтиш мумкинлигини таъкидлади.
Андижонда имомлар ўртасида “Заковат” турнири бўлиб ўтди
Ўзбекистон мустақиллигининг 35 йиллиги муносабати билан Андижон вилоятида фаолият юритаётган имом-хатиб ва имом-ноиблар ўртасида “Қуръон тинчликка буюради” шиори остида “Заковат” интеллектуал мусобақаси ўтказилди.
Тадбирни Андижон вилояти бош имом-хатиби Мирзамақсуд домла Алимов очиб бериб, мазкур беллашув диний соҳа ходимларининг илмий-маърифий ва ҳуқуқий билимларини мустаҳкамлаш, улар ўртасидаги жамоавий ҳамжиҳатликни оширишда муҳим аҳамият касб этишини таъкидлади.
Вилоятнинг барча шаҳар ва туманларидан жамланган жамоалар қизғин ва муросасиз баҳслар олиб борди. Иштирокчилар Қуръони карим, ҳадиси шарифлар, ислом тарихи, шунингдек, мамлакатимиз қонунчилиги ва миллий қадриятларга оид саволлар орқали ўзларининг интеллектуал салоҳияти ҳамда тезкор фикрлаш қобилиятларини намоён этдилар.
Ҳакамлар ҳайъатининг хулосаларига кўра, энг билимдон жамоалар ғолибликни қўлга киритди:
-
1-ўрин — Жалақудуқ тумани;
-
2-ўрин — Қўрғонтепа тумани;
-
3-ўрин — Хўжаобод тумани.
Ғолиблар Ўзбекистон мусулмонлари идораси Андижон вилояти вакиллигининг махсус диплом ва эсдалик совғалари билан тақдирланди.
Илм-маърифат йўлида беллашган барча иштирокчиларни муборакбод этиб, уларнинг келгуси хайрли фаолиятларида Аллоҳ таолодан барака ва зафарлар тилаймиз!
Ўзбекистон мусулмонлари идораси
Андижон вилояти вакиллиги
Матбуот хизмати
