“Рамазонни қандай ўтказяпсиз? Онлайн дарс беряпман”
Бугун рамазоннинг ўнин биринчи куни. Танамиз ва руҳиятимиз ҳар томонлама тарбияланмоқда. Шундай улуғ кунлардан унумли фойдаланаётган навбатдаги мактуб соҳиби Андижон вилояти, Зафаробод туманилик, мактаб ўқитувчиси Улуғбек ака Суяров.
Рамазон шукуҳи барчаларимизга сурур бағишламоқда. Ўзига шукр! Рамазон ойи карантин даврига тўғри келиши барчамизни оила даврасида бўлишимизга имкон бермоқда. Бу ҳам бир ҳикмат. Бундан тўғри ва оқилона фойдаланиш эса мусулмон учун катта бир бахт. Биз ҳам оиламиз билан саҳарликдан то ифторга қадар кунлик рамазон режасини тузиб шунга амал қилишга ҳаракат қилиб келмоқдамиз.
Саҳарликка турганимизда экран орқали бериб борилаётган Шайх Муҳаммад Содиқ Муҳаммад Юсуф ҳазратларининг “Анбиёлар қиссаси” туркум кўрсатувларини кузатиб боряпмиз.
Саҳарликдан сўнг Қуръони карим қироати билан шуғулланамиз. Икки ўғлим ҳам Қуръон ёдлашни бошлаган.
Бомдод намозидан сўнг катта ўғлим Шайх Муҳаммад Содиқ Муҳаммад юсуф ҳазратларининг “Соғлом бола” китобини мутолаа қилмоқда.
Ўзим ўзбек тили ва адабиёти фанидан дарс берганлигим сабабми, китоб ўқишни оилавий анъанага айлантирганмиз. Шу кунларда Алихон тўра Соғунийниг “Тарихи Муҳаммадий” асарини ўқияпман.
Соат 9 лардан мактабга онлайн дарслар бошланади. Мен ҳам ўзх фанимдан масофавий машғулот ўтяпман. Ўқувчиларга уйга вазифаларни бераман.
Пешиндан сўнг томорқамиздаги экинларга қараймиз. Спорт ва фойдали машғулотлар билан шуғулланамиз.
Шундан сўнг “Саҳоватли қўллар” хайрия гуруҳи билан биргаликда маҳалламиз ва туманимиздаги қабристонлар ободонлиги билан шуғулланамиз.
Шу билан ифторлик вақти бўлади. Ифторликдан сўнг таровеҳ намозигача оилавий суҳбат қиламиз.
Таровеҳдан сўнг мен яна адабиётлар билан шуғулланаман. Эртанги кун масофавий машғулотларига тайёргарлик кўраман.
Аллоҳ таоло барчамизни рамазон ойи барокатлари билан мукофотласин!
Саидаброр Умаров суҳбатлашди
18 август — Усмон Мусҳафи Тошкентга қайтган кун
18 август Тошкентнинг нафақат диний, балки маданий ва илмий мероси тарихида муҳим ўрин тутувчи сана. Қуръони Каримнинг энг қадимий қўлёзмаларидан бири сифатида эъзозланадиган Усмон Мусҳафи асрлар давомида Марказий Осиё тарихининг турли босқичларига гувоҳ бўлиб келган, хабар бермоқда iccu.uz.
Ушбу нодир қўлёзма йирик ҳажмдаги пергамент варақларга ёзилган бўлиб, матни қадимий Ҳижоз хатида битилган. Мусҳафда ҳозирги араб ёзувидаги нуқта ва ҳаракат белгилари мавжуд эмас. Манбаларда унинг сақланиб қолган қисми 338 ёки 353 варақдан иборат экани ҳақида турли маълумотлар учрайди. Айрим йўқолган пергамент варақлар кейинчалик қоғоз билан алмаштирилган. Қўлёзманинг аниқ санаси хусусида илмий адабиётларда турли қарашлар мавжуд.
Тарихий маълумотларга кўра, Мусҳаф узоқ йиллар Самарқандда сақланган. 1868–1869 йилларда у Санкт-Петербургга олиб кетилган ва Император халқ кутубхонасига топширилган. 1905 йилда қўлёзманинг 50 та факсимиле нусхаси кўчирилган. 1917 йилдаги сиёсий ўзгаришлардан кейин мусулмон уламоларининг талаби билан Мусҳаф аввал Уфага, кейин эса Ўрта Осиёга қайтарилиши жараёни бошланган.
1924 йилда Усмон Мусҳафи Татаристон, Бошқирдистон ва Туркистон уламоларидан ташкил топган махсус кузатувчилар ҳамроҳлигида махсус поезд орқали Уфадан Тошкентга олиб келинди. Тошкентга олиб келинганидан сўнг Мусҳаф бир муддат шаҳардаги масжидлардан бирида сақланди. Кейинчалик унинг асраб-авайланишини таъминлаш мақсадида Ўзбекистон тарихи давлат музейига топширилди.
1989 йил 14 март куни Тошкентда бўлиб ўтган Мусулмонларнинг IV қурилтойида Ўзбекистон ҳукумати қарори билан Усмон Мусҳафининг мусулмонлар ихтиёрига қайтарилгани эълон қилинди. Кейинчалик у Ўзбекистон мусулмонлари идораси ихтиёрига топширилди. Мусҳаф бир муддат Ҳазрати Имом мажмуасидаги «Мўйи Муборак» мадрасаси музей-кутубхонасида махсус шароитда ҳам сақланди.
Усмон Мусҳафининг тарихий ва маданий аҳамияти халқаро миқёсда ҳам эътироф этилган. 1997 йилда қўлёзма ЮНЕСКОнинг «Memory of the World» — «Жаҳон хотираси» дастури рўйхатига киритилган.
2025 йил 13 ноябрь — Усмон Мусҳафи тарихида яна бир муҳим сана. Айнан шу куни нодир қўлёзма Ўзбекистондаги Ислом цивилизацияси марказига олиб келинди. Бугун Қуръон залидаги асосий экспонатлардан бири сифатида алоҳида ўрин эгаллаб, юртимизнинг кўп асрлик диний, илмий ва маънавий меросини намоён этувчи бебаҳо ёдгорлик сифатида тақдим этилган. Шунингдек, Марказда турли даврларда Сомонийлар, Қорахонийлар, Хоразмшоҳлар ва Темурийлар даврида кўчирилган Қуръон нусхаларини ҳам кўриш мумкин. Усмон Мусҳафи тарихи бу фақат бир қўлёзманинг тарихи эмас. Бу асрлар оша сақланган илмий ва маънавий мерос, уни асраб-авайлаган авлодлар хотираси ва Ўзбекистон заминида шаклланган буюк ислом цивилизациясининг узвий давомийлиги ҳақидаги тарихдир.
Ўзбекистон мусулмонлари идораси Матбуот хизмати
