Аллоҳни рози қиладиган амалларга шошилайлик!
Бисмиллаҳир Роҳманир Роҳийм
Фарғона вилояти Қўқон шаҳрида бўлиб турган Ўзбекистон мусулмонлари идораси раиси, муфтий Шайх Нуриддин Холиқназар ҳазратлари бошчиликлардаги бир гуруҳ уламолар аҳоли вакиллари билан мулоқотлар, намозхонлар билан учрашувлар ва жоме масжидларда мавъизалар қилмоқдалар. Бугун, Муфтий ҳазратлари Қўқон шаҳридаги “Зайнул Обидин” масжидига бориб, хуфтон намози аввалида мўмин-мусулмонларга мавъиза қилиб бердилар.
Шайх Нуриддин Холиқназар ҳазратлари жамоатга юртимизда диний соҳада олиб борилаётган ислоҳотлар, янги очилаётган масжид-мадрасалар, Қуръони карим курслари фаолияти, ҳаж-умра қилувчиларга кенг йўл берилаётганига шукрона келтириш кераклиги ҳақида сўзлаш баробарида Аллоҳ таолони рози қиладиган ва норози қиладиган амаллар ҳақида маъруза қилиб бердилар.
Шунингдек, Ўзбекистон мусулмонлари идораси раиси ўринбосари Зайниддин домла Эшонқулов ва бир гуруҳ таниқли уламолар Қўқон шаҳридаги марказий масжидларда пешин ва хуфтон намозларида жамоатга мазмунли суҳбат қилиб бердилар.
Қўқон сафари давом этади.
Ўзбекистон мусулмонлари идораси Матбуот хизмати
Озарбайжонлик журналистлар Самарқанддаги Имом Бухорий мақбарасини зиёрат қилди
"Report" хабарига кўра, ташриф Ўзбекистон бўйлаб медиа-тур доирасида бўлиб ўтди.
Имом Бухорий мақбараси Самарқанд вилоятидаги энг муҳим маънавий ва тарихий обидалардан биридир.
Ташриф давомида Озарбайжон оммавий ахборот воситалари вакиллари Имом Бухорий мақбараси, масжид, музей ва кутубхона вазифасини бажарувчи хонани ўз ичига олган ёдгорлик мажмуаси ҳудуди билан танишди. Журналистларга мажмуанинг яратилиш тарихи, Имом Бухорий ҳаёти ва илмий мероси, шунингдек, унинг ислом илм-фанидаги алоҳида ўрни ҳақида сўзлаб берилди.
Медиа-тур иштирокчилари мажмуанинг музей қисмига алоҳида эътибор қаратди. Бу ерда ислом маданияти ва Имом Бухорий меросига оид қўлёзмалар ва турли тарихий материаллар тақдим этилган. Шунингдек, музейда турли мамлакатлар вакиллари томонидан мажмуага совға қилинган Қуръони карим нусхалари ҳам сақланади.
Иштирокчиларга мажмуа турли мамлакатлардан келган диндорлар учун зиёратгоҳ ва алломанинг маънавий меросини асраб-авайлашнинг муҳим маркази эканлиги ҳақида сўзлаб берилди. Журналистлар мажмуанинг меъморий хусусиятлари ва ташриф буюрувчилар учун яратилган замонавий инфратузилма билан ҳам танишди.
Имом Бухорий энг нуфузли ислом уламоларидан бири ва ислом анъанасидаги энг муҳим ҳадис тўпламларидан бири бўлган "Саҳиҳ ал-Бухорий" ҳадислар тўпламининг муаллифи ҳисобланади.
Ўзбекистон мусулмонлари идораси Матбуот хизмати
