Вакилларимиз хабар қилади: Муборак сафар олдидан зиёрат
Қашқадарё вилоят ҳокимлиги ҳамда Ўзбекистон мусулмонлари идорасининг вилоятдаги вакиллиги ҳамкорлигида 24 июль куни Қашқадарёдан муборак ҳажга кетаётган зиёратчиларнинг 150 нафари сафар олдидан Бухорои шариф шаҳрига зиёратга боришди.
Зиёратчилар кеча эрта тонгда Қарши шаҳридаги “Хўжаи Жарроҳ” мажмуасида йиғилиб, Ўзбекистон мусулмонлари идораси бепул ташкил этган махсус автобусларда Бухоро шаҳрига йўл олдилар. Зиёратчиларга ҳажга гуруҳ раҳбари бўлиб кетаётган элликбошиларидан уч нафари ҳамда вилоят ҳокимлиги ва ОАВ вакиллари ҳамроҳлик қилишди.
Зиёратчилар Бухородаги “Мир Кулол” зиёратгоҳи, “Баҳоуддин Нақшбанд” мажмуаси, “Абу Ҳафс Кабир” ва “Чор Бакр” мажмуаларини зиёрат қилиб, бу хайрли тадбирларни ташкил этган мутасаддиларга миннатдорчиликларини изҳор этиб, жонажон Ўзбекистонимиз тинч, осмонимиз доимо мусаффо бўлишини Аллоҳ таолодан сўраб дуолар қилишди, деб хабар беради Қашқадарё вилояти вакиллиги Матбуот хизмати.
ЎМИ Матбуот хизмати
Яхшилик улашиб, кўнгиллар шод бўлмоқда
Ватанимиз мустақиллигининг 35 йиллик байрами арафасида Қорақалпоғистон Республикаси бўйича меҳр-оқибат, оқибат ва хайр-саховат марафонлари янгича суръат ва кенг ёйилмоқда. Инсон қадрини улуғлашни бош мақсад қилган ушбу эзгу ташаббуслар юртимиздаги ижтимоий ҳимояга муҳтож оилаларга, ёлғиз ва боқувчисини йўқотган фарзандларимизга меҳр улашишга қаратилган.
"Вақф" хайрия жамоат фонди Қорақалпоғистон бўлими томонидан "Имом эшон Муҳаммад" жоме масжидида ёлғиз ва боқувчисини йўқотган фарзандларимиз учун мактаб формаси ва ўқув қуролларини бериш тадбири ўтказилди.
Кўнгилларга умид, юракларга қувонч таратган тадбирда Қорақалпоғистон Республикаси Вазирлар Кенгаши Раисининг ўринбосари Алишер Алланиязов, Қорақалпоғистон мусулмонлари қозиёти қозиси Баҳрамаддин домла Разов ва "Вақф" хайрия жамоат фонди раиси А.Жоловшиевлар иштирок этиб, 35 болага мактаб формалари ва байрам совғаларини тантанали тарзда топширди.
Бундай ғамхўрлик тадбири фарзандларимизнинг кўзларида қувонч учқунини ёқиб, кўнгилларида чексиз фахр туйғусини уйғотди.
"Инсон қадри улуғланган, меҳр-оқибат устувор бўлган юртда доимо тараққиёт ва барака бўлади."
Қорақалпоғистон мусулмонлари қозиёти
