1944 йили Фарғона туманида туғилган. Ўрта мактабни битирганидан сўнг ҳарбий хизматга чақирилди. Кейин Олтиариқ тумани, Марғилон шаҳридаги турли идораларда хизмат қилди. 1975–79-йиллари Имом Бухорий номидаги Тошкент Ислом олий маъҳадида таҳсил олди. Олий маъҳадни битиргач, “Совет Шарқи мусулмонлари” журнали таҳририятида масъул котиб бўлди. 1980–81-йиллари Судан Республикаси Ислом университетида таҳсилни давом эттирди. 1982–2006 йиллари диний идора Фатво бўлими мудири, Абу Райҳон Беруний номидаги Шарқшунослик институтида илмий ходим, “Мовароуннаҳр” нашриёти мудири, Вазирлар Маҳкамаси ҳузуридаги Дин ишлари бўйича қўмита бўлим бошлиғи, Ўзбекистон Республикаси Президентининг давлат маслаҳатчиси, Тошкент Ислом университети проректори каби масъул лавозимларда хизмат қилди. 2006 йилдан буён Ўзбекистон мусулмонлари идораси раисининг ўринбосаридир.
Шайх Абдулазиз Мансур амалга оширган “Қуръони карим маъноларининг таржима ва тафсири” қайта-қайта нашр қилинди. Устоз “Саҳиҳи Бухорий”ни таржима ва шарҳ қилиб, икки жилдда нашр эттирган. Шайх Абдулазиз Мансур Ўзбекистон мусулмонлари идораси ҳузурида тузилган диний адабиётлар нашри бўйича махсус ҳайъат раисидир.
Шайх Абдулазиз Мансур Халқаро Ислом фиқҳи академияси, Мусулмон олимлари олий ҳайъати аъзоси. Кўплаб мақолалар, китоблар муаллифидир.
Тошкент ислом институти жамоаси Бухоро ва Самарқанд вилоятларига уч кунлик илмий сафарга чиқишди.
Муфтий ҳазратлари хайрихоҳлиги ва институт ректори ташаббуси билан йўлга қўйилган илмий сафарнинг биринчи кунида Абдулхолиқ Ғиждувоний, Саййид Мир Кулол, Баҳоуддин Нақшбанд, Абу Ҳафс Кабир ҳамда Чор Бакр каби тарихий обидалар, муқаддас қадамжолар зиёрат қилинди. Уламолар ҳаёти ва фаолияти билан яқиндан танишилди. Мир Араб мадрасасида ҳам талабалар билан учрашув ташкил этилди.
Анъанага мувофиқ, Муҳаммадрасул Абдуллаев, Фахриддин Маманосиров, Жаҳонгир Неъматов, Жаҳонгир Рўзиев ва бошқа ўқитувчилар иштирокида талабалар Масжиди Калонда Имом Бухорийнинг бухоролик устозларидан ривоят қилган ҳадисларни ўқишди.
Имом Бухорий мана шу масжидда минглаб талабаларга "Саҳиҳи Бухорий"дан дарс бергани тарихдан маълум. Айнан шу ерда таҳсил олиш бугунги талабалар учун илм баракасидан насибадор бўлишга умидворлик бор.
Тошкент ислом институти жамоасининг сафари Самарқандда давом этди. Устоз ва талабалар Ҳадис илми мактабида ҳам бўлишиб, “Саҳиҳул Бухорий” китобидан охирги ҳадисларни ўқишди. Шундан сўнг 70 дан ортиқ битирувчи курс талабаларига “Саҳиҳул Бухорий” бўйича ижоза шаҳодатномалари топширилди.
Қуръон хатмлари ниҳояланиб, халқимиз фаровонлиги ва юртимиз осойишталигини тилаб дуолар қилинди.
Маълумот учун, Тошкент ислом институтида диний таълимнинг “хатми кутуб” услуби бўйича ҳадис, фиқҳ, ақида, тафсир, фароиз, тасаввуф каби фанларга оид мўътабар китоблар дарс жараёнлари ва тўгаракларда тўлиқ ўқиб тугатилади. “Саҳиҳул Бухорий” китоби 2 йил мобайнида “Ҳадис ва ислом тарихи фанлари” кафедраси ўқитувчилари устозлигида ўқиб хатм қилинди. “Саҳиҳул Бухорий” бўйича ижоза шаҳодатномалари ҳар йили Бухоро ва Самарқанддаги илмий сафар якунида топширилади.
Ўзбекистон мусулмонлари идораси
Матбуот хизмати