Ўз жонига қасд қилган илон
Кеч тушганда дурадгор устахонани ёпиб уйга кетди. Кечаси устахонага илон кирди. Қорни оч илон егулик топиш илинжида у ёқдан бу ёққа ўрмалаб юра бошлади. Қоронғу хонада у тўсатдан болтага урилиб кетди. Алам олиш ниятида у болтага ўралиб олиб уни чақишни бошлади, лекин унинг ҳужуми болтага мутлақо зарар етказмади, аксинча илоннинг оғзи жароҳатланиб қон оқишни бошлади. Илон душманига маҳкам чирмашиб олиб, уни бўғмоқчи бўлди. Кейинги куни дурадгор устахона эшигини очганда у ерда болтанинг тиғи устида қонга беланиб, чўзилиб ётган илонга кўзи тушди.
Илон кимнингдир айби билан ҳалок бўлмади, ўзининг жаҳли ва адовати туфайли вафот этди.
Қиссадан ҳисса, кўпинча биз жаҳлимиз чиққан пайтда атрофимиздагиларни ноҳақ азоблаб, дилига озор бериб қўямиз. Вақт ўтгач, ҳаммадан ҳам кўра ўзимизга кўпроқ зиён етказганимизни англаймиз.
Халқаро алоқалар бўлими
Моҳира Зуфарова
Банклар ва микромолия ташкилотлари ўз фаолиятини исломий банк фаолиятига ўзгартириши мумкин
Адлия вазирлиги Микромолия ташкилоти ва банк фаолиятини ўзгартириш тартиби тўғрисидаги низомга ўзгартириш ва қўшимчаларни давлат рўйхатидан ўтказди (рўйхат рақами 3656-1, 01.08.2026 й.), хабар бермоқда huquqiyaxborot Telegram канали.
Мазкур идоравий ҳужжат "Ўзбекистон Республикасининг айрим қонун ҳужжатларига Ўзбекистонда исломий банк фаолиятини жорий этишга қаратилган қўшимча ва ўзгартиришлар киритиш тўғрисида" 2026 йил 27 мартдаги ЎРҚ–1126-сон Қонунга мувофиқ айрим кредит ташкилотлари фаолиятини ўзгартиришнинг қуйидаги тартиб-таомилларини белгилайди:
- микромолия ташкилотини фақат исломий банк фаолиятини амалга оширувчи микромолия банкига ўзгартириш;
- фақат исломий банк фаолиятини амалга оширувчи микромолия банкини фақат исломий банк фаолиятини амалга оширувчи банкка ўзгартириш;
- фақат исломий банк фаолиятини амалга оширувчи банкни фақат исломий банк фаолиятини амалга оширувчи микромолия банкига ўзгартириш;
- фақат исломий банк фаолиятини амалга оширувчи микромолия банкини микромолия ташкилотига ўзгартириш;
- банкни фақат исломий банк фаолиятини амалга оширувчи банкка ўзгартириш.
Шунингдек, ўз фаолиятини фақат исломий банк фаолиятини амалга оширувчи банкка ўзгартиришга фақат исломий банк фаолиятини амалга оширувчи микромолия банки ҳақли.
Микромолия банкини давлат рўйхатидан ўтказиш ва банк фаолиятига доир тегишли лицензия (лицензиялар) олиш учун ногиронлиги бўлган шахслар учун микромолия банки биноларида шаҳарсозлик нормалари ва қоидаларида белгиланган талабларга мувофиқ қулай шарт-шароитлар яратилганлиги бўйича Қурилиш ва уй-жой коммунал хўжалиги соҳасида назорат қилиш инспекциясининг хулосаси мавжуд бўлиши керак.
Ташаббус Форс кўрфази мамлакатларидан инвестицияларни жалб қилишга қаратилган бўлиб, дастлабки ҳисоб-китобларга кўра, ушбу чора-тадбирларни амалга ошириш иқтисодиётга депозитлар ва тўғридан-тўғри инвестициялар кўринишида тахминан 1 миллиард доллар жалб қилиши мумкин. Мутахассисларнинг прогнозларига кўра, 2035 йилга бориб Ўзбекистон ушбу тизим ишга туширилгандан бери дунёда ислом молиясининг энг тез ўсишини намойиш этади.
Ўзбекистон мусулмонлари идораси Матбуот хизмати
