Мисрда “Энг узун Рамазон дастурхони” танлови давом этмоқда
Мисрнинг Шайх Зойд шаҳар ҳокимияти “Энг узун ифтор дастурхони” ташкил этилишини эълон қилди ва шаҳар аҳолисини ифторликка таклиф этди. Ифтор дастурхони тахминан икки километр қилиб тайёрланди.
Ифторлик “Қўшнингиз – сизнинг уйингиз” шиори остида бўлиб ўтди. Шайх Зойд шаҳар ҳокимияти иштирокчиларни жамоат бирдамлиги сифатида таомларини ўзлари билан олиб келишга ва ифторлик маросимини маҳалла аҳли билан баҳам кўришга ва очиқ ҳавода шаҳардаги энг узун дастурхон атрофида овқатланишга чақирди. Ифтор тадбиридан сўнг болалар учун кўнгилочар тадбирлар ташкил этилди.
Бу тадбир Рамазон ойида Шайх Зойд шаҳрида илк маратоба ташкил этилган бўлса-да, маҳаллий аҳоли фаол иштирок этди ва бу тадбир улар томонидан илиқ қарши олинди. Шу боис шаҳар ҳокимлиги бундай ифторлик дастурхонини келгуси йил ўтказишга қарор қилди.
“аш - Шарқ ал-Aвсат” нашрига берган хабарда Рамазон дастурхони дастлаб 2000 кишига етиши кутилгани аммо маҳалла аҳлидан келган иштирокчилар сони 5 мингдан ошиб кетгани таъкидланди.
Шаҳар ҳокимлиги баёнотида: “Биз бу тадбирни ташкил этиш (Aл-Матария ифтор дастурхони) билан рақобат қилишни режалаштирмаган эдик ва агар биз (Гиннес) китобига ифторлик дастурхонини энг узун зиёфат дастурхони сифатида ёзишни ўйлаган бўлсак, 5 минг рўзадорни жамлагани ҳолда бу рекордни янгилаган бўлардик. Келгусида шунга ҳаракат қиламиз”, дейилади.
Миср шаҳарлари орасида “Энг узун дастурхон” ташкил қилиш мавзуси давом этмоқда. Дақҳилия вилоятидаги (Шимолий Миср) Мансура шаҳри ҳам “Мансура аҳли ҳамжиҳатликда ифторлик қилади” шиори остида ифторлик дастурхонини (сешанба) ташкил қилиб, бу мусобақага қўшилди” ва Мисрнинг янги маъмурий пойтахти 2019 йилдаги каби "Дунёдаги энг узун ифторлик дастурхони" деб таърифлаган ифторлик дастурхонининг ташкил этилишини эълон қилди. Бу билан у "Гиннеснинг рекордлар китоби" танловига кирди, ифторлик дастурхони 3 минг метрдан ошди ва ифторликда 7 мингга яқин киши иштирок этди.
ЎМИ ходими И.Аҳмедов тайёрлади
Ўзбекистон сайёҳлик салоҳияти Малайзиядаги нуфузли кўргазмада намойиш қилинди
Малайзияда бўлиб ўтган “MATTA Fair” йирик сайёҳлик кўргазмасида Ўзбекистон Туризм қўмитаси томонидан миллий павильон ташкил этилди, деб хабар бермоқда “Дунё” АА мухбири.
Малайзия халқаро савдо ва кўргазмалар марказида намойиш этилган миллий павильон мамлакатимизнинг Куала-Лумпур шаҳридаги элчихонаси кўмагида амалга оширилди.
Кўргазмада Ўзбекистоннинг туризм салоҳиятига бағишланган тақдимотлар ўтказилди. Тадбир иштирокчиларига республикада туризм соҳасида олиб борилаётган кенг кўламли ислоҳотлар, зиёрат туризмини жадал ривожлантириш ва зиёратчилар учун қулай шарт-шароитлар яратиш бўйича амалга оширилаётган чора-тадбирлар ҳақида маълумот берилди.
Сўнгги йилларда виза режими соддалаштирилиши натижасида 90 дан ортиқ хорижий давлатлар, жумладан, Малайзия фуқаролари учун ҳам мамлакатга визасиз кириш тартиби амал қилаётгани алоҳида таъкидланди.
Сайёҳлар Бухоро, Самарқанд, Хоразм, Қашқадарё вилоятлари ва Тошкент шаҳрининг тарихий ва замонавий сайёҳлик марказлари, бой маданияти, бетакрор архитектураси ва санъати, миллий анъаналари билан яқиндан танишиш имконига эга бўлди.
Миллий павильонда Туризм қўмитаси, Қашқадарё вилояти ҳокимлиги, “Uzbekistan Airways” авиакомпанияси вакиллари ҳамда республиканинг қатор туркомпаниялари томонидан зиёрат туризми, тарихий-маданий туризм, гастрономик туризм, Умра+, қишки туризм каби сайёҳлик дастурлари “B2B” ва “B2C” форматларида кенг тарғиб қилинди.
“Uzbekistan Airways” авиакомпанияси вакиллари мамлакатимизга саёҳат қилувчилар учун яратилган қулайликлар, жумладан, Тошкент ва Куала-Лумпур шаҳарлари ўртасида тўғридан-тўғри авиақатновлар мавжудлиги ҳақида ахборот берди.
Тадбир давомида икки мамлакат туроператорларининг тўғридан-тўғри ҳамкорлиги доирасида республикага сайёҳлар оқимини ошириш бўйича аниқ келишувларга эришилди.
Ўзбекистон мусулмонлари идораси Матбуот хизмати
