30 Август, 2026, 17 Рабиъул аввал, 1448
30 Август, 2026, 17 Рабиъул аввал, 1448
Расулуллоҳ соллаллоҳу алайҳи васаллам инсоният ичида Аллоҳ таолодан энг кўп қўрққан ва Унга нисбатан энг тақводор зот эдилар. Зеро ул ҳазрат Аллоҳ таолонинг Азамати ва Қудратини барчадан кўра яхшироқ таниган зот бўганлар. Шунинг учун ҳам олдингию кейинги гуноҳлари кечирилишига қарамай, гоҳ Робб таолодан қўрқиб гоҳида эса умматлари учун раҳмат ва шавқатдан йиғлаганлар. Расули акрам соллаллоҳу алайҳи васалламнинг муборак кўзларидан тақво, меҳр ва ташналик ёшлари оқишига сабаб бўлган ҳолатларга сиз ҳам гувоҳ бўлинг.
Уммат учун куйиниб йиғлаганлари
Абдуллоҳ ибн Масъуд розияллоҳу анҳудан ривоят қилинади: “Менга Набий соллаллоҳу алайҳи васаллам “Менга қироъат қилиб бер!”, дедилар. Мен эса: “Сизга нозил бўла туриб, мен ўқиб берайми?”, дедим. У зот “Ҳа”, дедилар. Мен Нисо сурасидан ўқий бошладим ва “Ҳар бир умматдан бир гувоҳ келтириб, сени уларнинг ҳаммасига гувоҳ этиб келтирган чоғимизда ҳол қандоқ бўлур?!”, оятига етганимда, “Энди кифоя қилади!”, дедилар. У зотга қарасам, йиғлаётган эканлар!”
Абдуллоҳ ибн Амр ибн Ос розияллоҳу анҳудан ривоят қилинади: “Набий соллаллоҳу алайҳи васаллам Аллоҳ таолонинг Иброҳим алайҳиссалом ҳақидаги “Эй Роббим, албатта у(санам)лар одамлардан кўпини адаштирдилар. Бас, ким менга эргашса, у мендандир.” оятини ва Исо алайҳиссалом “Агар уларни азоблайдиган бўлсанг, бас, албатта, улар Сенинг бандаларинг. Агар уларни мағфират қиладиган бўлсанг, бас, албатта, Сенинг Ўзинг ғолиб ва Ҳикматли Зотдирсан.”, деган сўзи ҳақидаги оятини тиловат қилдилар ва икки қўлларини кўтардилаб: “Ё Аллоҳ! Умматим, умматим!”, дедилар ва йиғладилар!” Шунда Аллоҳ азза ва жалла айтди: “Эй Жаброил! Муҳаммадга бор, ҳолбуки Роббинг билувчироқдир, ундан, сени нима йиғлатди, деб сўра”, деб амр қилди. Бас, Жаброил алайҳиссалом у зотнинг олдиги келиб сўради ва Аллоҳ таолога у зотнинг айтган гаплари хабарини берди. Ҳолбуки, У биливчироқдир. Аллоҳ таоло эса: “Эй Жаброил! Муҳаммадга бор ва унга, албатта сени умматинг борасида рози қилурмиз”- деб айт, деди”.
Абу Довуднинг бошқа бир ривоятида бу воқеа кусуф намозида бўлгани ва у зот саждаларининг охирида “уфф, уфф” деб пуфлаб, кетидан шундай дуо қилганлари ривоят қилинади: “Эй Роббим! Мен улар орасида эканман, уларни азобламасликка ваъда бермабмидинг?! Эй Роббим! Истиғфор айтиб турсалар, уларни азобламасликка ваъда бермабмидинг?!”.
Умматларини соғиниб йиғлаганлари
Кунларнинг бирида Расулуллоҳ соллаллоҳу алайҳи васаллам йиғладилар. Буни кўрган саҳобалар: “Ё Расулуллоҳ! Сизни нима йиғлатди?”, деб сўрашди. У зот эса: “Биродарларимни соғиндим!”, деб жавоб бердилар. Саҳобалар: “Бизлар биродарларингиз эмасмизми, ё Расулуллоҳ?”, дейишди. Шунда ул Маҳбуб алайҳис салом: “Йўқ. Сизлар асҳобларимсиз. Биродарларим мендан кейин келадилар, мени кўрмасдан туриб менга иймон келтирадилар!”, дедилар.
Фарзандлари Иброҳим алайҳиссалом учун йиғлаганлари
Анас ибн Молик розияллоҳу айтадилар: “Биз Расулуллоҳ соллаллоҳу алайҳи васаллам билан бирга Абу Сайфнинг олдига бордик у Иброҳим алайҳиссаломнинг энагаси эди. Расулуллоҳ соллаллоҳу алайҳи васаллам Иброҳимни қўлларига олдилар ва уни ўпиб, ҳидладилар. Сўнг биз унинг олдига кирдик. Иброҳим жон бераётган эди. Расулуллоҳ йиғлай бошладилар. Шунда Абдурраҳмон ибн Авф: “Ё Расулуллоҳ, йиғлаяпсизми?!”, деб сўради. Расулуллоҳ соллаллоҳу алайҳи васаллам: “Бу раҳматдир эй ибн Авф”, дедилар ва яна: “Албатта кўзлар ёш тўкади, қалб маҳзун бўлади лекин биз фақатгина Роббимиз рози бўладиган гапларни айтамиз! Биз сенинг фироқингдан маҳзунмиз, эй Иброҳим!”, дедилар.
Аёллари Хадича розияллоҳу анҳо учун йиғлаганлари
Расулуллоҳ соллаллоҳу алайҳи васаллам марҳамат қилдилар: “Инсонлар менга куфр келтирганда, Хадича менга иймон келтирди. Исонлар мени ёлғончига чиқарганда, у мени тасдиқлади. Инсонлар мени маҳрум қилганида, у мени молига шерик қилди. Аллоҳ таоло ундан менга фарзандлар берди, бошқаларидан эса, йўқ!” Имом Аҳмад ривояти.
Абу Ҳурайра розияллоҳу анҳудан ривоят қилинади: “Жаброил алайҳиссалом Набий алайҳиссалоту вассаломнинг олдига келиб: “Ё Расулуллоҳ! Бу Хадича. Олдингизга келаяпти. Унинг қўлида идиш бор. Унинг ичида зировар ёки таом ёки сув ёки ичимлик бор. Агар у олдингизга келса, унга Роббисидан салом йўлланг ва яна тиллодан бўлган унда шовқин ва машаққат бўлмаган Жаннат башоратини беринг!”, дедилар.
Онамизнинг касаллари оғирлашди. Тун узоқ ва кўзёш билан ўтди. Саҳар вақти яқинлашганда у зотнинг кўзлари очилди ва Расулуллоҳ соллаллоҳу алайҳи васалламга ҳамда қизларига узоқ тикилдилар. Бу тикилиш билан онамиз ўз суюклиларидан узоқ ва ортга қайтмас риҳлатлари учун озуқа олдилар. Сўнг, ўзлари учун ваъда қилинган, абадий неъматлар билан бурканган ўринларини кўриб, розилик билан табассум қилган ҳолда кўзларини юмдилар. Шу тариқа, Аллоҳ таолонинг йўлида, Унинг дийни ривожи учун тинимсиз ҳаракат қилган бу тана таскин топди. Расулуллоҳ соллаллоҳу алайҳи васалламнинг кўзларидан ёш қуйилди! Бу ҳолатдан бутун ҳовлини йиғи овози тутди! Тонгда пок тобут узра покиза жасадни кўтариб боришарди. Ушбу покиза жасадни қабр ёнига қўйдилар. Расулуллоҳ соллаллоҳу алайҳи васаллам қабр ичига тушиб муборак қўллари билан уни текисладилар сўнг покиза танани олиб, унга сўнгги бор маҳзунлик ва ўкинч ёшлари қуйилиб турган кўзлари билан боқдилар ва секин қабрга қўйдилар!
Зайд ибн Ҳориса розияллоҳу анҳунинг вафотига йиғлаганлари
Абдуллоҳ ибн Масъуд розияллоҳу анҳудан ривоят қилинади: “Зайд қатл қилинганда Усома ибн Зайд Набий алайҳиссаломдан узилиб қолди. У кейинроқ Набий алайҳиссаломнинг олдиларига келди. Келди-ю йиғлаб юборди. Уни кўриб Набий алайҳиссалом ҳам йиғладилар ва: “Эй Усома! Биздан узилиб қолиб, кейин келиб бизни маҳзун қиляпсан!”, дедилар. Эртаси куни у Набий алайҳиссаломнинг олдига яна келди. Шунда У зот: “Мен сени кечагидан ҳам бошқачароқ ҳолда кўряпман?!”, дедилар. Усома у зотга яқинроқ келиб яна йиғлаб юборди. Бундан Расулуллоҳ соллаллоҳу алайҳи васаллам ҳам йиғладилар!”
Усмон ибн Мазъун розияллоҳу анҳуга йиғлаганлари
Усмон ибн Мазъун Расулуллоҳ соллаллоҳу алайҳи васалмага эмикдош ини эдирлар. У киши жоҳилият даврида ҳам ўзлари учун хамрни ҳаром қилгандилар. Исломга ўн тўртинчи бўлиб кирдилар. Ҳабашистонга қилинган ҳижратда мусулмонларга амирлик қилганлар. Бадрда иштирок этганлар.
Усмон Ибн Мазъун Бадр жангидан кейин кўп яшамадилар. Шаъбон ойига келиб у зотнинг дардлари оғирлашди.
Уммул муъминин Оиша розияллоҳу анҳо айтадилар: “Усмон ибн Мазъун жонсиз ётганида Расулуллоҳ соллаллоҳу алайҳи васаллам уни ўпдилар ва йиғладилар. У зотнинг муборак кўзёшлари Усмоннинг яноқларига оқарди!”
Ибн Аббос розияллоҳу анҳу айтадилар: “Расулуллоҳ соллаллоҳу алайҳи васалламнинг қизларидан бири вафот этганда ул зот: “Яхши салафимиз – Усмон ибн Мазъунга бориб қўшилгин!”, дедилар”.
У Мадинада вафот этган биринчи муҳожирлардан ва энг аввал Бақиъга дафн қилинган зот эди. Яна Расулуллоҳ соллаллоҳу алайҳи васаллам у киши ҳақида: “Аллоҳ сени Раҳматига олсин, эй Усмон! Сен дунёдан ҳеч нима олмадинг, дунё ҳам сендан ҳеч нима ололмади!”, дедилар.
Саъад ибн Убода розияллоҳу анҳу касал бўлганда йиғлаганлари
Абдуллоҳ ибн Умар розияллоҳу анҳу айтадилар: “Саъад ибн Убоданинг касали оғирлашиб қолди. Набий соллаллоҳу алайҳи васаллам уни кўргани келдилар. У зот билан Абдурраҳмон ибн Авф, Саъад ибн Абу Ваққос ва Абдуллоҳ ибн Масъуд ҳам келишди. Расулуллоҳ Саъаднинг олдига кирганларида уни оила аъзолари қуршаб олган ҳолда кўрдилар ва ҳаяжон билан: “У вафот этдими?!”, деб сўрадилар. Оиласи: “Йўқ, ё Расулуллоҳ!”, дейишди. Шунда Ул зот алайҳиссалоту вассалом йиғладилар! Набий алайҳиссаломнинг йиғлаганларини кўриб, қавм ҳам йиғлади. Сўнг, Ул хазрат қавмга қарата: “Эшитмаганмисиз, Аллоҳ таоло кўз ёши учун ёки қалб маҳзунлиги учун азобламайди! Лекин мана бунинг учун Азоблайди – деб тилларига ишора қилдилар – ёки маҳрум қилади. Албатта маййит аҳлиниг унга “айтиб” йиғлашидан азобланади!”, дедилар.
Мусъаб ибн Умайр розияллоҳу анҳуни кўриб йиғлаганлари
Барро айтадилар: “Бизнинг олдимизга биринчи келганлар Мусъаб ибн Умайр ва ибн Умму Мактум эди. Улар бизга Қуръон ўқиб берардилар”.
Мазкур саҳобани Набий алайҳиссалом биринчи Ақаба байъати иштирокчилари билан бирга Қуръон ўқиб, уни ўргатиш учун Мадинага жўнатгандилар. У зот Маккада яшаган вақтларида бой бадавлат бўлиб яшаганлар. Мадинага ҳижратларидан сўнг фақирликда кун кечирдилар.
Муҳаммад ибн Каъаб саҳобаларнинг биридан қуйидагича ривоят қиладилар: “Масжидда ўтирганимизда Мусъаб ибн Умайр кириб келди. Унинг эгнида бир мунча ямоғ солинган кўйлаги бор эди. Унинг илгари қандай бойликлар ичида яшагани-ю ҳозир эса қай ҳолатга тушиб қолганини кўриб, Расулуллоҳ соллаллоҳу алайҳи васаллам йиғлаб юбордилар!”
Ҳамза розияллоҳу анҳу учун йиғлаганлари
Уҳуд ғазотидан кейин Расулуллоҳ соллаллоҳу алайҳи васаллам жанг майдонига тушдилар. Жангда шаҳид бўлган мусулмонларни дафн қилиш ҳаракати бошланганди. Шу орада рўпараларидан амакилари Ҳамза ибн Абдулмуттолибнинг жонсиз жасади чиқиб қолди. Унинг бурни ва икки қулоғи кесиб олинган, жигари суғуриб олинган ҳатто бир чети тишланган ва яна танасига найза санчилган эди. Расулуллоҳ соллаллоҳу алайҳи васаллам қаттиқ йиғладилар. У зотнинг бу йиғлашларидан асҳоблар ҳам йиғлашди!
Абдуллоҳ ибн Масъуд розияллоҳу анҳу айтадилар: “Биз Расулуллоҳ соллаллоҳу алайҳи васалламнинг Ҳамза учун йиғлаганларидан кўра қаттиқроғ йиғлаганларини ҳеч ҳам кўрмаганмиз! Уни қибла томонга қўйдилар сўнг жаноза ўқидилар. Йиғилари кучайиб ҳатто ҳунграган овозлари эшитилди. У кундаги шаҳидларнинг кўриниши жуда даҳшатли эди!”
(Уҳуд жангидан кейин мушрикларнинг аёллари кўплаб шаҳидларнинг қулоқ, бурун ва бошқа аъзоларини кесиб олишганди.)
Мўъта жанги куни йиғлаганлари
Мўьта жанги мусулмонлар учун жуда оғир жанг эди. Расулуллоҳ соллаллоҳу алайҳи васалламнинк кўрсатмалари билан уч минг кишилик қўшин Румлик насароларнинг икки юз минг кишилик қўшинига қарши курашиши керак эди. Аслида, Румликларнинг ўзлари Расулуллоҳ соллаллоҳу алайҳи васаллам тарафларидан улар учун элчи қилиб юборилган саҳобий Хорис ибн Умайрни қатл қилишди ва мусулмонларга қарши жанг учун ўз қўшиларини йиғишда давом этишди. Расулуллоҳ соллаллоҳу алайҳи васаллам мусулмон лашкарларга Зайд ибн Ҳориса розияллоҳу анҳуни амир этиб тайинладилар. Агар Зайдга бирор гап бўлса, мусулмонларга Жаъфар ибн Абу Толиб, агар унга ҳам бирор гап бўлса, Абдуллоҳ ибн Равоҳа бошчилик қилишини айтдилар. Шу тариқа мусулмонлар йўлга чиқди. Рум аскарларига пешвоз чиқиб, шиддатли жанг бошлашди. Бу орада Набий соллаллоҳу алайҳи васаллам Мадинада қолган кишиларга ушбу жангнинг ҳолатидан хабар бериб турдилар.
Анас ибн Молик розияллоҳу анҳудан ривоят қилинади: “Набий соллаллоҳу алайҳи васаллам Зайд, Жаъфар ва ибн Равоҳанинг хабари келишидан аввал одамларга уларнинг ўлганлигини билдирдилар. У зот: “Байроқни Зайд олди. У мусибатга учради. Сўнгра байроқни Жаъфар олди. У ҳам мусибатга учради. Энди байроқни ибн равоҳа олди. Бас, у ҳам мусибатга учради”, дер ва кўзларидан дув-дув ёш тўкилар эди!
“Ниҳоят байроқни Аллоҳнинг қиличларидан бир қилич олди ва уларга фатҳу нусрат келди”, дедилар.
Аллоҳ таоло Ул муҳтарамга саловат ва саломларимизни етказсин!
Интернет маълумотлари асосида
“Мулла Абдуғаффор ҳожи” жоме масжиди имом хатиби
Икром Каримов тайёрлади
“Янги Ўзбекистон” газетасининг шу йил 27 август кунги 175-сонида Ўзбекистон мусулмонлари идораси раиси, муфтий, “Олий Даражали Имом Бухорий” ордени соҳиби Шайх Нуриддин ХОЛИҚНАЗАР ҳазратларининг “Қадр-қимматимиз улуғланаётган юрт” номли мақоласи чоп этилди.
Эзгулик, бағрикенглик марказига айланаётган мамлакатимизда диний-маърифий соҳада эришилаётган тарихий ютуқлар эътирофига бағишланган қиёсий-таҳлилий мақоланинг тўлиқ матни билан қуйида танишишингиз мумкин:
Бисмиллаҳир Роҳманир Роҳийм.
Бутун халқимиз томонидан катта шодиёна қилинаётган, ўз тақдирини шу азиз Ватан тақдири билан боғлаган қирқ миллионга яқин юртдошимиз қалбини чексиз фахр-ифтихор туйғуларига тўлдираётган мустақиллик байрами – истиқлолимизнинг 35 йиллик айёми билан барчани чин қалбимдан муборакбод этаман.
Аллоҳ таолога беҳисоб шукрки, мамлакатимизда сўнгги йиллардаги жадал ва кенг кўламли ислоҳотлар қаторида эътиқод эркинлигини таъминлаш ҳамда мўмин-мусулмонлар эмин-эркин тоат-ибодат қилиши учун яратилаётган шароитлар янги босқичга кўтарилди.
Бунёдкорлик ва маънавий тикланиш солномаси
Сўнгги ўн йиллик солномасига қарайдиган бўлсак, юртимизнинг ҳар бир ҳудудида улкан бунёдкорлик ишларига гувоҳ бўламиз. Уларнинг энг маҳобатлилари, шубҳасиз, пойтахтимиздаги Ислом цивилизацияси маркази ва Самарқанддаги Имом Бухорий мажмуасидир.
Бундан 9 йил олдин Ислом цивилизацияси марказини барпо этиш ҳақида махсус қарор қабул қилиниб, амалий ишлар бошланган эди. Ниҳоят жорий йилда қадимдан Тошкентнинг маънавий маркази бўлиб келган Ҳазрати Имом мажмуаси ёнида миллий руҳ ва замонавий шароитларга эга муҳташам иншоот барпо этилди. Марказнинг асосий зали, таъбир жоиз бўлса, қалби, ҳеч шубҳасиз, муқаддас Қуръон залидир. Бу ерда дунёдаги энг қадимий Ҳазрати Усмон Мусҳафи юксак мақомига яраша муносиб ўрин топди.
Бу масканда Ўзбекистон мусулмонлари идораси ҳам янги қароргоҳига эга бўлди. Президентимизнинг оқ фотиҳаси билан биз ҳам шу ерда фаолиятимизни давом эттиряпмиз.
Имом Бухорий мажмуаси қурилиши 2019 йилда бошланган эди. Қарийб 45 гектар майдонни қамраб олган ҳудудда улкан мақбара, 10 минг кишилик масжид, инновацион музей, кутубхона, меҳмонхоналар ва бошқа зарур инфратузилма иншоотлари барпо этилди.
Шу муаззам мажмуа фойдаланишга топширилаётганида хаёлимга бир фикр келди. Биласиз, Имом Бухорий бобомиз илм талаб қилиш йўлида қанча машаққатлар чекиб дунё кездилар. Буюк муҳаддис бўлиб Ватанимизга қайтиб келдилар. Лекин унга ҳозиргидек эътибор, эҳтиром, эъзоз кўрсатилмаганди. Давлатимиз раҳбари ташаббуси билан Имом Бухорий ҳазратларининг бой илмий меросини юксак даражада қадрлаш ва тарғиб этишга янги босқичда кенг имкониятлар яратилди. Ҳозир бутун ислом олами, барча мусулмонлар шу мажмуага талпинмоқда.
Шунингдек, Фарғонадаги Бурҳониддин Марғиноний янги мажмуаси, Намангандаги Султон Увайс Қараний зиёратгоҳи, Андижон бош масжиди, Сурхондарёдаги термизийлар мақбаралари, Қашқадарёдаги Абу Муин Насафий зиёратгоҳи, Бухородаги Мир Араб олий мадрасаси, Нукусдаги Имом Эшон Муҳаммад, Урганчдаги Охун бобо масжидлари, Тошкентдаги Сузук ота, Шайх Муҳаммад Содиқ Муҳаммад Юсуф масжид-мажмуалари, Тошкент вилоятидаги Зангиота зиёратгоҳини ҳам санаб ўтиш мумкин.
Юртимизнинг шаҳару қишлоқларида, энг чекка ҳудудларида 130 тага яқин янги масжид очилди. 500 дан зиёд жоме бутунлай қайтадан бунёд этилди. 3 та олий ва 1 та ўрта махсус мадраса ташкил этилди. Жумладан, 500 йиллик тарихга эга Мир Араб олий мадрасасининг тарихий мақоми тикланди ва уни дунёга машҳур ал-Азҳар мажмуаси даражасига етказиш ишлари давом этмоқда.
Самарқандда Ҳадис илми мактаби, Сурхондарёда Имом Термизий номидаги ислом институти, шунингдек, Имом Термизий номидаги ўрта махсус ислом таълим муассасаси фаолият бошлади. Тошкент ислом институтида магистратура ташкил қилиниб, бу йил илк битирувчилар соҳанинг нуфузли идораларида меҳнат фаолиятига киришди.
Қуръони карим ва тажвид ўқув курслари сони 30 дан ошди. Машғулотларни 100 мингдан зиёд тингловчи якунлаб, Аллоҳнинг каломини ўқиш бахтига эришди. Бундан ташқари, интернет орқали онлайн қироат сабоқлари йўлга қўйилди.
Диний идорамиз ҳузурида Марказий Осиёда ягона бўлган Фатво маркази ташкил этилди. Бу ерда диний уламоларимиз ҳар йили юртдошларимизнинг 300 мингдан ортиқ саволига жавоб бериб келмоқда. Эътиборлиси, ишлаш ё ўқиш мақсадида чет давлатда бўлиб турган ватандошларимизнинг саволларига мобил илова ва ижтимоий тармоқлар орқали ҳам жавоб бериш имконияти яратилган.
Имом Бухорий, Имом Термизий, Имом Мотуридий ва Баҳоуддин Нақшбанд номидаги 4 та халқаро илмий-тадқиқот маркази таъсис этилиб, нодир илмий-маърифий асарлар тадқиқ қилинмоқда.
Зиёрат ва ижтимоий қўллаб-қувватлаш
Ҳаж ва умра сафарларига кенг йўл берилди. Ҳаж квотаси 3 баравар, яъни 5 мингдан 15 мингга кўпайган бўлса, умрага қўйилган квота чекловлари олиб ташланди. Натижада ҳар йили 1 миллионга яқин ҳамюртимиз Аллоҳнинг байтини зиёрат қилишга муваффақ бўлмоқда.
Бу йилдан бошлаб Президент ҳожилари дастури жорий этилиб, эл-юртимизга сидқидилдан хизмат қилган 100 нафар юртдошимиз ҳаж сафарига имтиёзли бориб келди.
Рамазон ойи, икки ҳайит байрами ҳақиқий маънода катта айёмга айланди. Бу муборак саналарни Президент қарори билан кенг нишонлаш дунё мамлакатлари тажрибасида йўқ. Айниқса, жорий йилги айёмларда давлатимиз раҳбари ташаббуси билан амалга оширилган улкан воқеликларни алоҳида таъкидлаш керак: Рамазон ойида 1 триллион 100 миллион сўм, Қурбон ҳайитида 700 миллиард сўм маблағ хайрия ишларига йўналтирилди.
Диний соҳа ходимларига бугунгидек эътибор, ижтимоий, моддий қўллаб-қувватлаш илгари кузатилмаган эди. Айниқса, 15 уламонинг Имом Бухорий ордени билан мукофотланиши тарихий воқеа бўлди.
Имом-хатибларимиз хорижий тажриба алмашиш ва малака ошириш учун чет давлатларга бормоқда. Хусусан, АҚШ, Россия, Буюк Британия, Европа мамлакатлари, Саудия Арабистони, Миср, БАА, Туркия, Жанубий Корея сингари давлатларда малака ошириш курслари, Қуръони карим хатмлари, диний-маърифий суҳбатларда иштирок этмоқда. Албатта, бундай юксак эҳтиром ва кенг имкониятлар қалбларимизда чексиз шукроналик туйғусини уйғотади. Зеро, Аллоҳ таоло Қуръони каримда шукр қилувчиларга неъматларини янада зиёда этишни ваъда қилиб, бундай марҳамат қилади:
“Ва Роббингиз сизга: “Қасамки, агар шукр қилсангиз, албатта, сизга зиёда қилурман. Агар куфр келтирсангиз, албатта, азобим шиддатлидир”, деб билдирганини эсланг” (Иброҳим сураси, 7-оят).
Ушбу илоҳий ваъдага мувофиқ, тинч ва фаровон кунларимизнинг қадрига етиш, юртимизда амалга оширилаётган хайрли ва эзгу ишларга шукроналик келтириш неъматларнинг бардавом ва янада зиёда бўлишига сабабдир. Зотан, шукр фақат тилда эмас, балки меҳр-оқибат, саховат ва эзгу амалларда намоён бўлиши билан ўз маъносини топади.
Буюк саодатнинг ифодаси
Мамлакатимиздаги очиқлик сиёсати натижасида Ўзбекистон мусулмонлари идорасининг ислом олами билан алоқалари ривожланмоқда. Халқаро ташкилотлар билан ҳамкорлик мустаҳкамланди. Туркий давлатлар муфтийлари кенгаши, Абу Даби тинчлик форуми, Халқаро мусулмон уламолари кенгаши, Мусулмон донишмандлар кенгаши, Исломий фиқҳ академияси, Ислом олами уюшмаси, Подшоҳ Салмон номидаги Ҳадиси шариф академияси ва Халқаро ислом фиқҳи академияси каби нуфузли ташкилотлар шулар жумласидан.
Яқинда мамлакатимизда I халқаро ислом цивилизацияси форуми ўтказилди. У бутун дунё эътиборини яна бир бор Ўзбекистонга қаратди. Форум доирасида кўплаб нуфузли олимлар, уламолар юртимизга ташриф буюриб, амалга оширилаётган ижобий ўзгаришларнинг шоҳиди бўлди.
Юртимиздан етишиб чиққан буюк мутафаккир алломаларнинг ҳаёти ва илмий меросини ўрганиш юзасидан 600 дан ортиқ китоб, монография, рисола, роман нашр қилинди.
Умуман олганда, инсон қадрини улуғлашга қаратилган халқпарвар сиёсат аҳолининг турмуш сифатини янада ошириш, илгари адашган йўлидан қайтиб, соғлом ҳаёт кечириш йўлини танлаган шахсларни афв этиш каби савобли ишларда намоён бўлаётир.
Буларнинг бари Аллоҳ таолонинг инояти билан эришилган истиқлол шарофатидандир. Тикланган маънавий қадриятлар, кенг очилган эътиқод имкониятлари янги Ўзбекистонда инсон қадри нақадар юксак даражага кўтарилганининг ёрқин мисолидир. Бу ишлар маърифат, бағрикенглик ва эзгулик тамойиллари атрофида бирлашган халқимизнинг келажакка ишончини янада мустаҳкамлайди.
Зеро, Пайғамбаримиз соллаллоҳу алайҳи васаллам ўз таълимотларида инсон учун энг улуғ саодат тинчлик-осойишталик, тансиҳатлик ва хотиржамлик эканини алоҳида таъкидлаганлар:
“Сизлардан ким аҳли-оиласи тинч, тани соғ ва бир кунлик егулиги бор ҳолда тонг оттирса, гўёки унга бутун дунё тўлалигича берилибди” (Имом Термизий ривояти).
Бугун юртимизда ҳукм сураётган тинчлик ва эмин-эркинлик мана шундай улуғ саодатнинг амалий ифодасидир.
Аллоҳ таоло жонажон Ватанимиз истиқлолини абадий, тинчлигимизни барқарор айласин! Юртимиз ривожи ва халқимиз фаровонлиги йўлида сидқидилдан хизмат қилаётган Президентимиз ва барча мутасаддиларга куч-ғайрат, мустаҳкам соғлиқ ва улкан зафарлар ёр бўлсин. Эл-юртимиз аҳил-иноқлиги, хонадонларимизнинг қут-баракаси ҳеч қачон аримасин!
Шайх Нуриддин ХОЛИҚНАЗАР,
Ўзбекистон мусулмонлари идораси раиси, муфтий, “Олий Даражали Имом Бухорий” ордени соҳиби
Иймон 
Намоз 
Рўза 
Закот 
Ҳаж 
Қуръон 
Ислом сабоқлари 
Aлоқа 