Диний идора делегацияси Мисрдаги халқаро анжуманда қатнашмоқда
Шу йил 29-30 июль кунлари Қоҳирада "Тезкорлик билан ривожланиб бораётган дунёда фатво ва юксак ахлоқни шакллантириш" мавзуcидаги халқаро анжуман бўлиб ўтмоқда.
Нуфузли тадбирда Миср муфтийси Шавқи Иброҳим Аллам таклифига биноан Ўзбекистон мусулмонлари идораси раисининг биринчи ўринбосари Ҳомиджон домла Ишматбеков ва Диний идора Халқаро алоқалар бўлими мудири Шавкат Ҳамдамов иштирок этмоқда.
Миср Фатво уйи ташкил этган анжуманда фатво, яъни дин уламолари томонидан чиқарилган шариат ҳукми, шахслар ва жамиятни тўғри йўлга йўналтириш ва юксак ахлоқни шакллантиришда муҳим ўрин тутиши, тезкор ривожланувчи дунёда технологиялар ва жамият қийматлари ўзгариб бораётганда фатволар янги чақириқларга мослашиши ва диннинг асосий тамойилларига асосланган бўлиши зарурлигига алоҳида эътибор қаратилади.
Халқаро анжуманда дунёдаги олим ва соҳа мутахассислари мавзу юзасидан фикр-мулоҳаза алмашиш баробарида ўз маърузалари билан қатнашади.
Ўзбекистон мусулмонлари идораси
Матбуот хизмати
24–29 август кунлари Тошкентда “Ислом цивилизацияси: янги нигоҳ, янги кашфиётлар” мавзусида халқаро медиафорум бўлиб ўтади
24–29 август кунлари Ўзбекистон пойтахтида “Ислом цивилизацияси: янги нигоҳ, янги кашфиётлар” мавзусида халқаро медиафорум ўтказилади, деб хабар бермоқда “Дунё” АА.
Тадбирнинг асосий қисми Ўзбекистондаги Ислом цивилизацияси марказида ўтказилади. Унда хорижий оммавий ахборот воситалари вакиллари, халқаро экспертлар ва медиа соҳаси мутахассислари жам бўлади.
Форум дастуридан тантанали очилиш маросими, ялпи мажлислар, мавзуга оид медиа-кўргазмалар, матбуот анжуманлари ва икки томонлама учрашувлар ўрин олган. Шўба йиғилишлари доирасида ҳужжатли кино ва тарихий хотира, нашриёт лойиҳалари, замонавий технологиялар, шунингдек, медиа соҳасидаги халқаро лойиҳаларни ривожлантириш масалалари муҳокама қилинади.
Бундан ташқари, Ўзбекистон талабалари учун жаҳон медиа саноатининг етакчи мутахассислари иштирокида маҳорат дарслари ташкил этилади. Иштирокчилар замонавий журналистика, медиа маҳсулотлар яратиш ва халқаро ахборот маконида самарали фаолият юритиш борасида тажриба алмашади.
27 август куни форум қатнашчилари учун Самарқанд шаҳрига саёҳат уюштирилади. Дастур доирасида меҳмонлар Имом Бухорий мажмуасини зиёрат қилади ва шаҳарнинг тарихий-маданий мероси билан танишади. Шунингдек, Тошкент шаҳрида хорижий ОАВ вакиллари учун махсус медиа-тур ўтказилиши режалаштирилган.
Форум 28 август куни якуний ялпи мажлис ва тантанали ёпилиш маросими билан ўз ишини якунлайди. Хорижлик меҳмонлар, Ўзбекистон давлат мустақиллигининг 35 йиллигига бағишланган тадбирларда ҳам иштирок этади.
Ўзбекистон мусулмонлари идораси Матбуот хизмати
