Янги ўқув йили 9 сентябрдан бошланади
Мамлакатимиз истиқлол байрамининг 33 йиллигини муносиб кутиб олиш, талаба ёшларга қулай шарт-шароит яратиш мақсадида, Ўзбекистон мусулмонлари идорасининг буйруғига асосан Олий ва ўрта махсус ислом таълим муассасаларида янги ўқув йили жорий йилнинг 9 сентябрь, душанба кунидан бошланиши белгилаб қўйилди.
Диний таълим муассасаларида янги ўқув йилига пухта тайёргарлик кўрилиб, аудиториялар, талабалар турар жойлари, ошхона ва спорт мажмуалари таъмирланиб, талабаларни янги ўқув йилида кўтаринки руҳда қабул қилиш учун шай ҳолатга келтирилди.
Эътиборлиси, бу йилги қабул имтиҳонлари юқори савияда ташкил этилиб, куни кеча мандат натижалари эълон қилинди. Етти мингга яқин абитуриентлар ўзларига қулай бўлган 6 та ҳудудлардан бирида тест имтиҳонларини топширдилар. Ўзбекистон мусулмонлари идораси тизимида илк бор электрон шаклда ўтказилган қабул имтиҳонларидан муваффақиятли ўтган ёшлар талабалик бахтига муяссар бўлдилар.
Янги ўқув йилини бошлаш арафасида турган талабаларнинг илмларига барака, таълим берадиган устозларига ғайрат ато қилишини Аллоҳ таоло сўраб қоламиз!
Ўзбекистон мусулмонлари идораси
Матбуот хизмати
Таиланддаги халқаро ҳалол маҳсулотлар кўргазмасида Ўзбекистон миллий павильони ташкил этилди
Ўзбекистон Бош консулхонаси вакиллари Таиланднинг Шаҳзода Сонгкхла университетида бўлиб ўтаётган 15-Бутунжаҳон ҳалол маҳсулотлар кўргазмаси ва “World HAPEX 2026” халқаро анжуманида иштирок этмоқда, деб хабар беради “Дунё” АА.
Тадбирда Таиланд, Саудия Арабистони, Баҳрайн, Малайзия, Покистон, Бангладеш ва Хитойнинг давлат идоралари, бизнес, илмий доиралар ҳамда саноат вакиллари қатнашмоқда.
Панель муҳокамасида сўзга чиққан Ўзбекистон бош консули Фахриддин Султонов мамлакатимиз 2019 йилдан буён Ислом мамлакатлари стандартлар ва метрология институти (SMIIC) аъзоси эканини қайд этиб, Президент Шавкат Мирзиёев раҳбарлигида ислом дунёси давлатлари билан очиқ, прагматик ва ўзаро манфаатли ҳамкорлик изчил ривожлантирилаётганини таъкидлади.
Шунингдек, кўргазма доирасида Бош консулхона томонидан мамлакатимизнинг туристик салоҳияти, бой миллий маданияти ва анъаналарига бағишланган миллий павильон ташкил этилди. Унда Амир Темур, Алишер Навоий, Заҳириддин Муҳаммад Бобур, Абу Али ибн Сино, Абу Райҳон Беруний ва Имом Бухорий каби буюк алломалар мероси, шунингдек, Тошкент шаҳридаги Ислом цивилизацияси маркази ҳақидаги китоблар ва видеоматериаллар намойиш этилмоқда.
Мазкур кўргазма 30 июлдан 2 августга қадар давом этади.
Ўзбекистон мусулмонлари идораси Матбуот хизмати