Қозоғистон бош масжиди зиёрати ва қардош халқларга чиройли мавъиза
Қозоғистон сафари асносида Ўзбекистон мусулмонлари идораси раиси, муфтий Шайх Нуриддин Холиқназар ҳазратлари бугунги жума намозини адо этиш учун қардош муфтийлар билан бирга Остона шаҳридаги Қозоғистон бош масжидига келдилар. Дастлаб мартабали меҳмонлар мазкур маҳобатли масжидда намозхонларга яратилган шароит ва имкониятлар билан яқиндан танишдилар.
Шундан сўнг Қозоғистон бош муфтийси Наврўзбай ҳожи муҳтарам меҳмонларни намозхонларга таништириб, Шайх Нуриддин Холиқназар ҳазратларига сўз берди.
Ўзбекистон муфтийси масжидга йиғилган мўмин-мусулмонларга ўзларининг салом ва илиқ тилакларини билдирган ҳолда, дўсту биродарлик фазилати, тинчлик-осойишталик неъмати ҳақида сўз қилдилар. Қозоғистон мезбонлигидаги Туркий давлатлар муфтийлари кенгаши йиғилиши ва унинг доирасидаги тадбирлар юқори савияда муваффақиятли ўтгани, учрашув ва ҳамкорлик алоқалари қардош халқлар дўстлигига улкан ҳисса қўшишини алоҳида қайд этдилар.
Жума намози давомида қардош давлатлар муфтийлари минглаб намозхонлардан иборат катта жамоат билан Ҳақ таолодан бутун дунёда тинчлик-осойишталик бўлиши, диндош ва қондош халқларимиз аҳллиги бардавом бўлишини сўраб хайрли дуолар қилдилар.
Ўзбекистон мусулмонлари идораси
Матбуот хизмати
Индонезия ҳаж ва умра асоссиациялари делегацияси юртимизда
Бугун, 25 июн куни Индонезия ҳаж ва умра асоссиацияларининг доктор Муслим Искандар бошчилигидаги вакиллари Ўзбекистон мусулмонлари идорасида бўлишди. Меҳмонлар билан диний идора раисининг биринчи ўринбосари Ҳомиджон домла Ишматбеков учрашув ўтказди.
Саккиз нафар делегация аъзолари: Доктор Муслим Искандар, Асип Бисма Суприатна, Заид Муслим Искандар, Мустаин Хаттоб, Муҳаммад Атсир Абдулазиз, Жаннатул Маъво, Муҳаммад Иқбол ҳамда Ҳилман Парифий бирма-бир ўзларини таништириб, “Умра +” лойиҳасини ўрганиш мақсадида 3400 та турфирма номидан вакил бўлиб келишганини билдиришди.
Учрашув аввалида Ҳомиджон домла меҳмонларни ташриф билан қутлаб, келганлари учун миннатдорлик билдирди. Сўнгги йилларда юртимизда диний-маърифий, туризм ва бошқа соҳаларда бўлаётган янгиланишлар ҳақида айтиб ўтди. Хусусан, 2017 йилда тамал тоши қўйилган Ислом цивилазияси маркази, қайта бунёд этилаётган Имом Бухорий мажмуаси, Ҳазрати Имом даҳасида олиб борилаётган бунёдкорлик ишларига тўхталди.
Ўз навбатида делегация раҳбари Муслим Искандар уларга бу таклифни билдирган “Real Dreams” сайёҳлик фирмасидан миннатдор эканликларини айтиб, Ўзбекистон ҳақида жуда ҳам ижобий таассуротларда эканини таъкидлади. Биргина Тошкент шаҳридаги ўрганишлари натижасида Ўзбекистонда зиёрат туризми соҳаси истиқболли экани, ҳали Самарқанд, Бухоро, Хива каби қадим ва навқирон шаҳарларни ҳам бориб кўришларини, лекин ҳозирданоқ “Умра +” лойиҳаси жуда истиқболли эканига амин бўлганини баён этди.
Делегация аъзоси, “Kasturi” бирлашмаси раҳбари Муҳаммад Атир 2017 йилда ҳам Ўзбекистонга келганини, ўша пайт билан орадан ўтган қисқа вақтдаги улкан ўзгаришлардан ҳайратда эканини айтиб, бу ишлар юртнинг алламоларига, илмий-маърифий меросга бўлган эътиборидан дарак эканига урғу бериб ўтди.
Шунингдек, делегациянинг бошқа аъзолари – Индонезиянинг “Amphuri”, “Hagatama”, “NRA Group Ltd.” “Jannatul Ma’wah”, “Himpuh” каби минглаб турфирмаларни бирлаштирган асоссиациялари раҳбарлари ҳам мусулмон сайёҳлар эътибори ва оқимини Ўзбекистонга бемалол йўналтириш мумкинлигини, бу хайрли иш икки давлат учун ҳам ҳар томонлама манфаат келтиришини таъкидлашди.
Ўзбекистон мусулмонлари идораси
Матбуот хизмати
