Кексаларни эъзозлаш – олий қадрият (Фотолавҳа)
Ёши улуғ инсонларни эъзозлаш, уларга ҳурмат-эҳтиром кўрсатиш ҳам динимиз талаби, ҳам миллий қонунларимиз инъикосидир. Зеро, Абдуллоҳ ибн Амр розияллоҳу анҳу ривоят қилган ҳадисда Набий алайҳиссалом: «Кичикларимизга раҳм қилмаган, катталаримиз ҳақларига риоя қилмаган киши биздан эмас», деб марҳамат қилганлар (Имом Абу Довуд ривояти).
Тошкент шаҳар бош имом-хатиби Абдуқаҳҳор домла Юнусов пойтахтимиздаги Ижтимоий қўллаб-қувватлаш марказига ташриф буюриб, у ерда доимий яшаётган ўзгалар кўмагига муҳтож кекса отахону онахонлар ҳолидан хабар олдилар.
Абдуқаҳҳор домлани Фарангиз Акрамова кутиб олди.
Вазирлар Маҳкамасининг "Кексалар ҳафталиги" доирасида ўтказилаётган ушбу тадбир ёши улуғларимизни мамнун этмоқда.
Шундан сўнг отахону онахонлар эъзозу эҳтиром ила махсус автобусларда «Tashkent city» кўнгилочар масканига олиб борилиб, саёҳат уюштирилди.
Ёши улуғ инсонлар пойтахтимизнинг қоқ марказидаги обод масканларни айланиб, томоша қилиб, кўнгиллари тоғдек кўтарилди. Юртимизда амалга оширилаётган бунёдкорлик ва ободлик ишларига юксак баҳо бериб, бу эзгу ишларнинг бошида турган азиз инсонларнинг ҳақларига хайрли дуолар қилдилар.
Сўнгра азиз меҳмонлар «Райҳон» миллий таомлари ошхонасида тушлик қилишди.
Автобусларда ёши улуғ инсонлар яна ўз манзилларига етиб олишди. Уларга Тошкент шаҳар вакиллиги жамоаси томонидан совғалар, ҳадялар улашилди.
Ҳа, кексаларимизнинг ҳолидан хабар олиш, уларнинг хизматини қилиш – катта савоб. Чунки бир инсоннинг кўнглини кўтариш, оғирини енгил, узоғини яқин қилишдан банда-ку севинади, Яратган ҳам рози бўлади.
Аллоҳ таоло хайрсевар инсонлардан рози бўлсин.
Ўзбекистон мусулмонлари идораси
Матбуот хизмати
Мурожаатларга амалий ечим топилмоқда
Бугун, 2 сентябрь чоршанба куни Ўзбекистон мусулмонлари идораси раиси ўринбосари Муҳаммадолим домла Муҳаммадсиддиқов навбатдаги фуқаролар қабулини ўтказиб, юртдошларимизнинг мурожаат ва таклифларини атрофлича тинглади.
Очиқ ва самимий руҳда кечган қабул жараёнида Тошкент шаҳри, Наманган, Фарғона, Андижон, Тошкент ва Қашқадарё вилоятларидан келган фуқароларнинг диний таълим муассасаларига ўқишга кириш, Умра зиёрати тартиби ҳамда масжидлар фаолиятига доир мурожаатлари бирма-бир кўриб чиқилди.
Учрашув давомида билдирилган масалалар юзасидан фуқароларга шаръий ва ҳуқуқий тушунтиришлар берилиб, баъзи муҳим масалалар бўйича тегишли масъул ходимларга мурожаатларни қисқа фурсатларда қонуний ҳамда ижобий ҳал этиш бўйича аниқ топшириқлар юклатилди.
Эслатиб ўтамиз, аҳоли билан очиқ мулоқотни таъминлашга қаратилган бу каби фуқаролар қабуллари Ўзбекистон мусулмонлари идораси, унинг ҳудудий вакилликлари ҳамда юртимиздаги барча жоме масжидларида ҳар ҳафтанинг чоршанба куни мунтазам равишда ўтказиб келинмоқда.
Ўзбекистон мусулмонлари идораси
Матбуот хизмати
