Кексаларни эъзозлаш – олий қадрият (Фотолавҳа)
Ёши улуғ инсонларни эъзозлаш, уларга ҳурмат-эҳтиром кўрсатиш ҳам динимиз талаби, ҳам миллий қонунларимиз инъикосидир. Зеро, Абдуллоҳ ибн Амр розияллоҳу анҳу ривоят қилган ҳадисда Набий алайҳиссалом: «Кичикларимизга раҳм қилмаган, катталаримиз ҳақларига риоя қилмаган киши биздан эмас», деб марҳамат қилганлар (Имом Абу Довуд ривояти).
Тошкент шаҳар бош имом-хатиби Абдуқаҳҳор домла Юнусов пойтахтимиздаги Ижтимоий қўллаб-қувватлаш марказига ташриф буюриб, у ерда доимий яшаётган ўзгалар кўмагига муҳтож кекса отахону онахонлар ҳолидан хабар олдилар.
Абдуқаҳҳор домлани Фарангиз Акрамова кутиб олди.
Вазирлар Маҳкамасининг "Кексалар ҳафталиги" доирасида ўтказилаётган ушбу тадбир ёши улуғларимизни мамнун этмоқда.
Шундан сўнг отахону онахонлар эъзозу эҳтиром ила махсус автобусларда «Tashkent city» кўнгилочар масканига олиб борилиб, саёҳат уюштирилди.
Ёши улуғ инсонлар пойтахтимизнинг қоқ марказидаги обод масканларни айланиб, томоша қилиб, кўнгиллари тоғдек кўтарилди. Юртимизда амалга оширилаётган бунёдкорлик ва ободлик ишларига юксак баҳо бериб, бу эзгу ишларнинг бошида турган азиз инсонларнинг ҳақларига хайрли дуолар қилдилар.
Сўнгра азиз меҳмонлар «Райҳон» миллий таомлари ошхонасида тушлик қилишди.
Автобусларда ёши улуғ инсонлар яна ўз манзилларига етиб олишди. Уларга Тошкент шаҳар вакиллиги жамоаси томонидан совғалар, ҳадялар улашилди.
Ҳа, кексаларимизнинг ҳолидан хабар олиш, уларнинг хизматини қилиш – катта савоб. Чунки бир инсоннинг кўнглини кўтариш, оғирини енгил, узоғини яқин қилишдан банда-ку севинади, Яратган ҳам рози бўлади.
Аллоҳ таоло хайрсевар инсонлардан рози бўлсин.
Ўзбекистон мусулмонлари идораси
Матбуот хизмати
“Сolombo Times”: Ўзбекистонда “Учинчи Ренессанс” ғоясини амалга ошириш давлат сиёсатига айланган
Шри-Ланканинг “Сolombo Times” нашрида “Ўзбекистонда Янги уйғониш даври: келажак технологиялари ёрдамида буюк ўтмишни қайта тиклаш” сарлавҳали таҳлилий мақола эълон қилинди, деб хабар бермоқда “Дунё” АА.
Шри-Ланкалик таниқли журналист Фазан Наваз томонидан ёзилган ушбу материалда сўнгги ўн йилда Ўзбекистонда Президент Шавкат Мирзиёев ташаббуси билан Янги Ўзбекистонни бунёд этиш, “Учинчи Ренессанс” ғоясини амалга оширишга қаратилган ислоҳотлар ва уларнинг самарали натижалари хусусида сўз юритилган.
Муаллифнинг ёзишича, Марказий Осиё марказида сокин, аммо улкан аҳамиятга эга инқилоб юз бермоқда. Бу кураш қурол-яроғ билан эмас, балки қўлёзмалар, музейлар ва микрочиплар ёрдамида амалга оширилмоқда.
Президент Шавкат Мирзиёев раҳбарлигида Ўзбекистон Самарқанд ва Бухоро каби шаҳарлар жаҳон илм-фани, шеърияти ва фалсафасининг етакчи марказлари бўлган Ўрта асрлардаги “Олтин аср” шон-шуҳратини қайта тиклашга интилмоқда.
Бу жараённинг ўзига хос жиҳати шундаки, Ўзбекистон минг йилдан зиёд тарихга эга маданий меросни асраш, қайта тиклаш ва кенг оммага етказиш учун сунъий интеллект ҳамда рақамли технологиялардан фаол фойдаланмоқда.
Нашрда Ўзбекистоннинг бой маданий ва тарихий мероси ҳамда уни сақлаш бўйича ислоҳотларга тўхталиб ўтилган. Қайд этилганидек, бу замин инсоният тарихидаги энг буюк алломаларга бешик бўлган. Астроном ва давлат арбоби Мирзо Улуғбек Самарқандда юлдузларни ҳайратланарли даражада аниқ кузатиш имконини берган расадхона барпо этган. Хоразмдаги Маъмун академияси олимлари эса Европада Ренессанс бошланишидан анча аввал математика ва тиббиёт соҳаларида юксак ютуқларга эришган эди.
Ўзбекистон етакчиси бу тарихий меросни тез-тез тилга олиб, Мирзо Улуғбекни нафақат буюк олим, балки илм-фанни энг юксак қадрият деб билган давлат арбоби сифатида таърифлайди. Давлат раҳбари бугунги янгиланиш жараёнини “Учинчи Ренессанс” деб атаб, уни Ўзбекистоннинг илму маърифат ва маданият маркази сифатидаги мавқеини қайта тиклашга қаратилган умуммиллий лойиҳа сифатида баҳолайди. Тарихчилар таъбири билан айтганда – бу атама минтақада аввал мавжуд бўлган икки буюк юксалиш давридан кейинги навбатдаги уйғониш босқичини англатади.
Муаллифнинг фикрича, Ўзбекистонда Учинчи Ренессанс ғоясини амалга ошириш шунчаки гап эмас, балки давлат сиёсатига айланган.
“Бу улкан мақсаднинг энг ёрқин рамзи жорий йил Тошкентда қад ростлаган Ислом цивилизацияси марказидир. 2026 йил март ойида 40 мамлакатдан ташриф буюрган 1500 дан ортиқ мутахассис иштирокида қуриб битказилган мазкур марказ ўз бағрида ислом оламининг энг ноёб ёдгорликларидан бири – VII асрга мансуб Усмон Мусҳафини сақлайди. Шунингдек, бу ерда илмий лабораториялар, реставрация устахоналари ва архивлар фаолият юритади. Марказ аллақачон дунёдаги энг чиройли янги музейлардан бири сифатида эътироф этилган”, – дея қайд этган журналист.
Материалда таъкидланишича, Ўзбекистон ёндашувининг бошқалардан ажратиб турадиган муҳим жиҳати – бу сунъий интеллектдан иқтисодий тараққиёт воситаси сифатидагина эмас, балки маданий меросни муҳофаза қилиш воситаси сифатида ҳам фойдалаётганидадир.
Сунъий интеллект туризм соҳасини ҳам тубдан ўзгартирмоқда. Бу ташаббус 2026 йилда мамлакатга 12 миллион сайёҳни жалб қилиш режасининг бир қисми ҳисобланади.
Фазан Наваз ўз мақоласини “Учинчи Ренессанс” ўз олдига қўйган мақсадларга тўлиқ эришадими-йўқми, буни вақт кўрсатади. Бироқ бугуннинг ўзидаёқ Ўзбекистон қандай йўлдан одимлаб бораётгани аниқ кўриниб турибди”, – деган сўзлар билан якунлаган.
Ўзбекистон мусулмонлари идораси Матбуот хизмати