Сайфул Асрий: “Мутаассиб фикрларга қўшилишнинг оқибати яхшилик билан тугамайди”
Хива шаҳрида ўз ишини давом эттираётган “Ислом – тинчлик ва эзгулик дини” мавзусидаги халқаро илмий-амалий конференция хорижлик иштирокчиларда катта таассурот қолдирмоқда. Россиядаги Булғор ислом академияси Илоҳиёт кафедраси ўқитувчиси, Ислом ҳуқуқшунослиги ва замонавий фатволар бўйича мутахассис Сайфул Асрий бу ҳақда қуйидаги фикрларни билдирди:
– Юртингизда ташкил этилган “Ислом тинчлик ва эзгулик дини” мавзусидаги анжуманнинг барча иштирокчиларини тарихий воқеа билан чин дилдан қутлайман.
Олим сифатида ёшларга, ушбу анжуманни кузатиб борган соғлом фикрли кишиларга айтар сўзим шуки, мутаассиб фикрларга эргашаётганлар билиб қўйсин, ислом – эзгулик дини. У ҳеч қачон қон тўкишга, зўравонлик қилишга ундамайди. Муқаддас ислом номидан амалга оширилаётган хунрезликларнинг буюртмачилари мўминлардан эмас.
Ислом маърифатини, унинг инсонпарварлик ғояларини, бағрикенглик борасидаги тавсияларини ўрганмоқчи бўлганлар, бузғунчи тоифаларнинг етакчиларига эмас, соф тафсирга, Расулимиз саллолоҳу алайҳи васалламнинг суннатларига таянган ҳолда сабоқ бераётган, бирор-бир юртда фитнага ёки ихтилофларга сабаб бўлмаган, ҳур фикрли олимларимизнинг фикрларига эътибор қаратсинлар. Чунки, мутаассиб фикрларга қўшилишнинг оқибати яхшилик билан тугамайди. Ким динда чуқур кетса, у адашади.
Aллоҳ таоло Ўзининг каломи Қуръоннинг “Қурайш” сурасида, Қурайш қабиласига тинчлик, омонлик бергани ва Ислом динининг муҳаббатга ва саломатликка чорлаши ҳақида хабар берган.
Ислом номидан интернет орқали тарқатилаётган фитналардан ўз юртингиз уламоларининг фатволарига таянган, оқилона панд-насиҳатларидан баҳраманд бўлган ҳолда ёндашсангиз, омонда бўласиз. Бугунги анжуманда ҳам, бундан кейин ҳам соғлом фикрли ислом уламолари интернетдаги мутаассибларнинг фикрлари хато ва асоссиз эканини бот-бот такрорлайди.
Жаҳондаги бир қанча мамлакатларни катта ташвишларга солаётган бу фитналарга куч билан эмас, маърифий ёндашув билан ечим топишни таклиф этган Ўзбекистон Президентининг барча чақириқларини биз олимлар бир овоздан қўллаб-қувватлаймиз. Бир сўз билан айтганда, бу чақириқ фақат ислом уммати учун эмас, балки бутун башарият учун нажот садосидир.
Н.Усмонова,
ЎзА
Тошкент ислом институти магистратура ва модуль тизимига қабул эълон қилинади
#xabar #elon #modul #magistratura
Ўзбекистон мусулмонлари идораси Таълим ва илмий-тадқиқот бўлими 2025-2026 ўқув йили учун Тошкент ислом институти магистратура босқичи ва модуль таълим тизимига талабгорлардан ҳужжатларни қабул қилиш саналарини маълум қилади:
Модуль таълим тизимига 2025 йил 1 июлдан 20 июлгача;
Магистратура босқичига 2025 йил 1 июлдан 30 июлгача.
Хорижий давлатлардаги олий диний таълим муассасаларини тамомлаган ва мамлакатимизда нострификациядан ўтказилган дипломга эга бўлган абитуриентлар (Ўзбекистон Республикаси фуқаролари) ҳам ҳужжат топширишлари мумкин.
Имом Бухорий номидаги Тошкент ислом институтининг магистратура босқичига ўқишга кириш истагида бўлган талабгорлар Қабул ҳайъатига қуйидаги ҳужжатларни тақдим этади:
таълим муассасаси ректори номига ариза;
паспорт ёки ID карта нусхаси (асли кўрсатилади);
олий диний таълим муассасасини тамомлагани тўғрисидаги ҳужжат (диплом) ва унинг иловаси нусхаси (асли кўрсатилади);
3,5 х 4,5 ҳажмдаги 6 дона рангли фотосурат (сўнгги уч ойда олинган ва орқа фони оқ рангда бўлиши талаб этилади).
Имом Бухорий номидаги Тошкент ислом институти Модуль таълим тизимига ўқишга кириш истагида бўлган талабгорлар Қабул ҳайъатига қуйидаги ҳужжатларни тақдим этади:
таълим муассасаси ректори номига ариза;
паспорт ёки ID карта нусхаси (асли кўрсатилади);
ўрта махсус ислом таълим муассасасини тамомлагани тўғрисидаги ҳужжат (диплом) ва унинг иловаси асл нусхада;
3,5 х 4,5 ҳажмдаги 6 дона рангли фотосурат (сўнгги уч ойда олинган ва орқа фони оқ рангда бўлиши талаб этилади);
иш жойи бўйича Ўзбекистон мусулмонлари идорасининг Қорақалпоғистон Республикаси қозиёти, вилоятлар ва Тошкент шаҳар вакилидан тавсиянома;
меҳнат дафтарчаси нусхаси (тасдиқланган ҳолда).
Эслатиб ўтамиз: Модуль таълим тизимига ўрта махсус ислом таълим муассасаларини тамомлаган ҳамда тўрт йил ва ундан ортиқ муддат давомида Ўзбекистон мусулмонлари идораси тизимидаги масжидларда фаолият юритаётган имом-хатиб ва имом ноиблари танлов асосида ўқишга қабул қилинади.
2025-2026 ўқув йили қабул жараёнлари ҳақидаги сўнгги янгиликларни @qabulmuslimuz (https://t.me/qabulmuslimuz) телеграм саҳифасида кузатиб боринг.
Ўзбекистон мусулмонлари идораси
Матбуот хизмати
MUSLIM.UZ GA OBUNA BO'LING (https://t.me/+PSOPDevNs2Va-wt7) VA ULASHING (https://telegram.me/share/url?url=https://t.me/muslimuzportal)
YouTube (https://www.youtube.com/@Muslimuzz/featured) | Instagram (https://www.instagram.com/muslimuzportali/) | Facebook (https://www.facebook.com/muslimuzportal)