Сайт тест ҳолатида ишламоқда!
17 Ноябр, 2026   |   7 Жумадул сони, 1448

Тошкент шаҳри
Бомдод
05:51
Қуёш
07:13
Пешин
12:13
Аср
15:21
Шом
17:05
Хуфтон
18:22
Bismillah
17 Ноябр, 2026, 7 Жумадул сони, 1448
Мақолалар

09.09.2024   3691   3 min.

ЁШЛАРДА ЁТ ҒОЯЛАРГА ҚАРШИ МИЛЛИЙ ВА ДИНИЙ ҚАДРИЯТЛАРНИ ШАКЛЛАНТИРИШ МАСАЛАЛАРИ

Ҳозирги даврда ёшларни ёт ғоялардан асраш, уларни салбий таъсирлардан ҳимоя қилиш долзарб масалага айланди. Бунга ёшларнинг диний-ахлоқий тарбияси, ватанпарварлигини кучайтириш, миллий ва диний қадриятларимизга ҳурматни шакллантириш орқали эришиш мумкин.

Айниқса, адашган оқимларга қарши курашишда ёшларда миллий ва диний қадриятларни шакллантириш ўта муҳим ва керакли жараёндир. Ушбу қадриятлар ёшлар ва жамият учун асосий қоидаларни белгилаб бериш баробарида уларни ёт ғояларга қарши муҳофаза қилади. Қуйидаги омиллар ушбу жараёнда муҳим аҳамиятга эга.

  1. Турли адашган тоифалар ҳақида халқимизга, хусусан, ёшларимизга маълумот бериб бориш: Бу ёшларда диний билимларни ошириш, динлараро ўзаро ҳурмат ва бағрикенгликни ривожлантиришда, уларни адашган оқимлардан огоҳлантириш учун жуда муҳимдир.
  2. Миллий ва диний қадриятларни рағбатлантириш: Ёшларга халқимизнинг маданий мероси, диний анъана ва урф-одатларини ўргатиш. Бу қадриятларни ёш авлодга етказиш ва уларнинг миллий идентификациясини мустаҳкамлайди (яъни миллий ва диний қадриятлар ёшларнинг ўз халқига, маданиятига динига ва тарихига бўлган муҳаббатини шакллантиради. Бу ҳиссиёт ёт ғояларга қарши туруш қобилиятини кучайтиради).
  3. Илм-фан ва диний билим: Ёшлар ўртасида диний билимлар билан бирга, илмий ва рационал ёндашувларни ҳам тарғиб қилиш. Яъни танқидий фикрлашга ўргатиш. Ёшларга миллий ва диний қадриятлар асосида мустақил фикрлаш, муҳокама қилиш ва ёт ғояларни таниб олишни ўргатиш. Бу ёшларни хатарли оқимлардан ҳимоялашда ёрдам бериши мумкин. Шунингдек, таълим даргоҳларида миллий ва диний қадриятлар ҳақида дарслар ташкил этиш, ёшларнинг саводхонлигини ошириш уларнинг соғлом дунёқарашини шакллантиришга хизмат қилади.
  4. Оила ва жамиятда дини-ахлоқий тарбия: Ёшларни оилада, таълим даргоҳлари ва жамоат ташкилотларида диний-ахлоқий тарбия қилишга, уларни маънавий жиҳатдан ривожлантиришга эътибор қаратиш лозим. Шунингдек уларга миллий ва диний қадриятларни таълим беришда яхши намуна бўлиш ҳам муҳим рол ўйнайди.
  5. Тинчлик ва кўпмиллатлиликни тарғиб қилиш: Бу дегани турли миллат ва диний конфессиялар орасида тинчлик, барқарорликни, ҳамжиҳатликни таъминлаш. Бу жамиятдаги турли маданиятлар ўртасидаги муносабатларни мустаҳкамлаш учун муҳим аҳамиятга эга. Бу радикализмнинг олдини олишда самарали восита бўлиши мумкин. Шунингдек, жамиятдаги бирдамлик ўта муҳим. Миллий ва диний қадриятлар жамиятда бирликни таъминлайди. Бирлашган жамият ёт ғояларга қарши самарали курашишда юқори потенциалга эга бўлади.
  6. Диний-маърифий тадбирлар: Ёшлар ўртасида миллий қадриятларни тарғиб қилишга қаратилган диний-маърифий тадбирлар, конференциялар ўтказиш, уларни миллий минталитетимизга хос бўлган кўргазмаларга жалб этиш уларнинг билим доирасини кенгайтиришга ёрдам беради. Бу ёшларни ўзига хос ижобий моделларга йўналтиришда муҳим рол ўйнайди.
  7. Масс-медиа: ОАВ, телевидения, радио ва интернет орқали миллий ва диний қадриятларни тарғиб этиш лозим. Бу ёшларга ўз қадриятларини англашда ёрдам беради.

Хулоса қилиб айтганда, ёшларда ушбу омилларни шакллантириш орқали ёт ғояларга қарши самарали курашишда муваффақиятли натижаларга эришиш мумкин.

 

Манбалар асосида тайёрланди

Ўткирбек СОБИРОВ 
Ўзбекистон мусулмонлари идораси 
Бош мутахассиси

Мақолалар
Бошқа мақолалар
Янгиликлар

Ўмон Маданий мутолаа уйи раҳбари: «Марказ нашрлари мени ниҳоятда ҳайратлантирди»

16.11.2026   4681   3 min.
Ўмон Маданий мутолаа уйи раҳбари: «Марказ нашрлари мени ниҳоятда ҳайратлантирди»

Ўмон Султонлигининг Масқат шаҳрида ўтказилган Ўзбекистондаги Ислом цивилизацияси маркази Ўмон Маданий мутолаа уйи вакили Марказ нашрларининг бадиий безаклари ва тарихий мазмунидан катта таассурот олганини билдириб, икки мамлакат ўртасидаги маданий ҳамкорлик Маҳмудхўжа Беҳбудий меросига бағишланган адабий учрашувлар орқали аввалроқ бошланганини таъкидлади, хабар бермоқда iccu.uz.

Ўмон Султонлигининг Масқат шаҳрида ташкил этилган Ўзбекистондаги Ислом цивилизацияси марказининг тақдимот тадбири икки мамлакат ўртасидаги маданий-маърифий ҳамкорликнинг яна бир мулоқот майдонига айланди.

Тадбир доирасида Ўмон Маданий мутолаа уйи вакили Ўзбекистон билан аввалдан йўлга қўйилган адабий алоқалар, мамлакатга амалга оширилган маданий сафар ва Ислом цивилизацияси маркази нашрлари ҳақидаги таассуротлари билан ўртоқлашди.

Ҳалима ал-Балуший, Ўмон Султонлиги Маданий мутолаа уйи («Байт ал-Қироа ас-Сақофий») раҳбари

Ўзбекистон билан ҳамкорлигимиз бугун бошлангани йўқ. Аввалроқ Ўзбекистоннинг Масқатдаги элчихонасида Маҳмудхўжа Беҳбудий ҳақидаги китоблардан бирининг муҳокамасини ташкил этган эдик. Бу жуда мазмунли ва самарали мулоқот бўлган. Тадбир Ўзбекистоннинг Ўмондаги элчиси жаноблари мезбонлигида ўтказилган эди.

Шундан сўнг икки мамлакат элчихоналари — Ўзбекистоннинг Масқатдаги ва Ўмоннинг Тошкентдаги дипломатик ваколатхоналари билан ҳамкорлик ва келишув асосида Маданий мутолаа уйи аъзоларининг Ўзбекистонга ташрифини ташкил этишга қарор қилдик.

Бу ташриф ташкилотимиз амалга оширган энг ажойиб сафарлардан бири бўлди. Унда биз Ўзбекистоннинг бой маданияти билан яқиндан танишдик. Таассуротларимиз ниҳоятда ҳайратланарли бўлди. Аъзоларимиз Тошкент, Самарқанд ва Бухоро шаҳарларини жуда яхши кўриб қолишди. Биз учта шаҳарда бўлдик ва уларнинг ҳар бири бизга аввалгисидан ҳам гўзалроқ туюлди.

Айрим жойлар Ўмоннинг баъзи шаҳарларига жуда ўхшаш экани ҳам эътиборимизни тортди. Айниқса, Бухородаги қадимий тарихий масканлар, тор кўчалар, эски уйлар, деразалар ва анъанавий меъморий иншоотлар бизга ўзгача таассурот бағишлади.

Сафар иштирокчилари Ўзбекистоннинг улкан маданий бойликларга, қадимий Ислом цивилизацияси ва юксак тарихий меросга эга мамлакат эканини чуқур ҳис этдилар. Бу жиҳатлар икки мамлакат маданияти ўртасидаги яқинлик ва муштаракликни янада яққол намоён этди.

Ҳатто айрим аъзоларимиз Тошкентдан уй сотиб олиш истагини ҳам билдиришди. Улар Ўзбекистонга тез-тез бориб туришни хоҳлашмоқда. Ўзбек таомлари уларга жуда-жуда ёқди. Ўзбекистон бозорлари, уйлари, саройлари, тарихий ёдгорликлари, шаҳарлари ва табиати — мамлакатга хос барча жиҳатлар уларни мафтун этди.

Ислом цивилизацияси марказига келадиган бўлсак, биз Ўзбекистонга ташриф буюрган пайтимизда Марказ ҳали очилмаган эди. Аммо у ҳақида эшитган эдик ва уни кўришни жуда истаганмиз. Бизга марказ кейинроқ очилиши ҳақида маълум қилишган эди.

Мана, бугун эса Ислом цивилизацияси марказининг очилиши муносабати билан ушбу масжиднинг муҳташам залида турибмиз. Бизни таклиф этишгани ва ушбу гўзал кўргазмани томоша қилиш имконияти яратилганидан жуда хурсандмиз.

Очиғини айтсам, марказ нашрлари мени ниҳоятда ҳайратлантирди. Китоб муқоваларининг ранглари, уларнинг безаклари, китоблар ичидаги гўзал манзаралар ва тарихий обидалар тасвири менда катта таассурот қолдирди.

Масқатдаги тақдимот Ўзбекистондаги Ислом цивилизацияси марказининг илмий-маърифий фаолияти ва нашрларини хорижий жамоатчиликка таништириш билан бир қаторда, Ўзбекистон ва Ўмон ўртасида аввалдан шаклланган адабий-маданий алоқаларнинг давомийлигини ҳам намоён этди.

Ўзбекистон мусулмонлари идораси Матбуот хизмати

 

Ўзбекистон янгиликлари