Имом Мотуридий халқаро илмий-тадқиқот марказида Самарқанд шаҳрида ташкил этилаётган Имом Мотуридий инновацион музейи экспозициясини такомиллаштириш масалаларига бағишланган илмий-ижодий гуруҳнинг навбатдаги йиғилиши бўлиб ўтди.
 

Мазкур тадбирда Дин ишлари бўйича қўмита раисининг биринчи ўринбосари, илмий-ижодий гуруҳ раҳбари Давронбек Махсудов, Марказ директори Комилжон Шермухамедов, Ўзбекистон мусулмонлари идораси раисининг биринчи ўринбосари Ҳомиджон домла Ишматбеков,Тошкент ислом институти ректори Уйғун домла Ғафуров ҳамда гуруҳ аъзолари бевосита ва масафавий тарзда иштирок этди.

Йиғилишда музейни ташкил этиш ишларининг бугунги ҳолати, экспозиция материалларининг мазмун-моҳияти ва илмий асослари атрофлича муҳокама қилинди. Унда Туркиянинг «Outdoor Factory» компанияси вакиллари томонидан экспозициянинг жорий ҳолати ҳамда музейга жойлаштирилиши режалаштирилган материаллар тақдимоти ўтказилди.

Тадбир давомида Тошкент ислом институти ректори Уйғун Ғафуров сўзга чиқиб, буюк аждодларимизнинг илмий-маънавий меросини ўрганиш, асраб-авайлаш ва халқаро миқёсда тарғиб этиш борасида мамлакатимизда амалга оширилаётган кенг кўламли ишларга тўхталиб ўтди. Хусусан, сўнгги йилларда Президент Шавкат Мирзиёев ташаббуси билан Ўзбекистондаги Ислом цивилизацияси маркази, Самарқанддаги Имом Бухорий мажмуаси ва инновацион музейи каби йирик лойиҳалар амалга оширилаётгани миллий ва диний-маънавий меросимизни дунёга танитишда муҳим аҳамият касб этаётганини таъкидлади.

Шу билан бирга, Ўзбекистондаги Ислом цивилизацияси марказининг жаҳондаги энг йирик Ислом цивилизацияси музейи сифатида Гиннесснинг рекордлар китобига киритилгани — мамлакатимизнинг тарихий ва маданий меросини халқаро миқёсда намоён этиш борасидаги саъй-ҳаракатларининг юксак эътирофи экани қайд этилди.

Нотиқ ўз сўзида Самарқанд шаҳрида Имом Мотуридий инновацион музейининг ташкил этилиши ҳам ушбу эзгу ташаббусларнинг мантиқий давоми эканини, бу эса буюк мутафаккирнинг илмий меросини замонавий усуллар орқали кенг жамоатчиликка етказишга хизмат қилишини алоҳида айтиб ўтди.

Мулоқот жараёнида экспозиция материалларини ташриф буюрувчиларга замонавий ва интерактив шаклларда тақдим этиш, музейдаги изоҳ ва ёзувларнинг илмий аниқлиги, тили ҳамда услубини такомиллаштириш юзасидан муҳим таклифлар билдирилди.

Тадбир якунида билдирилган фикр ва таклифлар умумлаштирилиб, музей экспозициясининг илмий-маърифий мазмунини янада бойитиш бўйича галдаги муҳим вазифалар белгилаб олинди.

Ўзбекистон мусулмонлари идораси 
Матбуот хизмати