Бир қизалоқ тақинчоқ дўконига кириб сотувчига қараб чиройли зирак кўрсатишини сўради. Сотувчи қизалоққа ҳайратланганча қараб тураверди. Шунда қизалоқ бир зиракни кўрсатиб: “Мана буни чиройли қилиб ўраб бероласизми?!”, деди. Сотувчи: “Пулинг борми?” деб сўради.
Қизалоқ чўнтагидаги бир нечта тангани чиқариб,:“Бор пулим шу, етадими?” деб сўради. Сўнгра у: “Биласизми, мен опамга шу зиракни совға қилмоқчиман. Чунки у онамиз оламдан ўтганидан кейин бизга ғамхўрлик қилиб келмоқда. Мен опамни хурсанд қилишни жуда хоҳлардим. Менда бори шу”, деди пулга ишора қилиб.
Бир неча сониядан сўнг сотувчи зиракни чиройли қутига солиб, қизчанинг қўлига берди. У хурсанд бўлганича уйига шошиб кетди.
Бир фурсатдан сўнг дўконга бир ўрта ёшли қиз кириб, дўкончига ўша қизалоқ олган зиракни кўрсатиб: “Буни сиздан олганмиди?” деб сўради. Сотувчи тақинчоқга қараб: “Ҳа” деб жавоб берди. Қиз тақинчоқни нархи қанчалигини сўради. Сотувчи: “Бу харидор ва менинг келишувим” деб жавоб қилди. У: “Синглимда бир неча танга бор эди. Бу эса жудаям қимматлигини биламан. Бунга пулимиз етмайди” деб зиракни қайтариб бермоқчи бўлди.
Шунда сотувчи: “Синглингиз бор будини берди. Бу нархни ҳеч ким бера олмайди”, дея тақинчоқни қизга қайтариб берди.
Акбаршоҳ Расулов таржимаси
Бугун Ҳаким Термизий мажмуаси музейида буюк алломанинг 1200 йиллик юбилейи муносабати билан китоблар кўргазмаси ташкил этилди.
Кўргазмада Имом Термизий халқаро илмий-тадқиқот маркази томонидан чоп этилган Ҳаким Термизийнинг илмий-маънавий меросига оид китоблар ўрин олди.
Ушбу нашрлар орқали буюк мутафаккирнинг илмий қарашлари, асарларининг мазмун-моҳияти ва бугунги кундаги аҳамиятини кенг жамоатчиликка етказишга алоҳида эътибор қаратилди.
Алломанинг бой илмий-маънавий мероси бугун ҳам ўз қийматини йўқотмаган. Унда илгари сурилган эзгулик, маърифат ва юксак ахлоқ ғоялари ёш авлодни миллий ва умуминсоний қадриятлар руҳида тарбиялашда муҳим манба бўлиб хизмат қилади.
Тадбир давомида иштирокчиларга Ҳаким Термизийнинг ҳаёти, илмий фаолияти ва маънавий мероси ҳақида ҳикоя қилувчи махсус видеолавҳа ҳам намойиш этилди.
Мазкур кўргазма алломанинг илмий меросини кенг тарғиб этиш, асарларини ўрганишга қизиқишни ошириш ҳамда аждодларимиз қолдирган бебаҳо маънавий хазинани келажак авлодларга етказишга хизмат қилади.
Имом Термизий халқаро илмий-тадқиқот маркази Матбуот хизмати