Шу йилнинг 5-6 ноябрь кунлари Боку шаҳридаги Бутунжаҳон диний етакчилар глобал саммити доирасида Ўзбекистон делегацияси бир қатор учрашув ва мулоқотлар ўтказди.
Ўзбекистон Республикаси Президенти маслаҳатчиси Музаффар Комилов, Ўзбекистон мусулмонлари идораси раиси, муфтий Шайх Нуриддин Холиқназар ҳазратлари Озарбайжон Республикаси Бош вазири Али Асадов билан учрашди. Мулоқотда Ўзбекистон ва Озарбайжон ўртасидаги ўзаро манфаатли ҳамкорликни ривожлантириш, мамлакатларимизнинг анъанавий яқин ва дўстона муносабатларини янада мустаҳкамлаш, илм-фан, маданият ва диний-маърифий соҳаларидаги ҳамкорликни ривожлантириш масалалари юзасидан фикр алмашилди.
Учрашувда Бутунжаҳон диний етакчилар глобал саммитининг аҳамияти ҳақида сўз юритилиб, мазкур тадбир халқлар ва турли дин вакиллари ўртасидаги муносабатларни мустаҳкамлашга катта ҳисса қўшиши, бу борада қардош мамлакатлар диний етакчилари ўртасидаги ҳамкорлик жуда ҳам муҳим экани таъкидланди.
Али Асадов ўз сўзида икки мамлакат ҳукуматлари, шунингдек, Ўзбекистон Республикаси Президенти Шавкат Мирзиёев томонидан амалга оширилаётган ижобий ўзгаришларни юксак баҳолаб, бундан кейин ҳам Ўзбекистон Озабайжоннинг энг яқин ишончли ҳамкори бўлиб қолишига катта ишонч билдирди. Шунингдек, у Ўзбекистон Республикаси Президенти ташаббуси билан Қорабоғнинг Фузулий шаҳрида умумтаълим мактаби бунёд этилганини эътироф этиш баробарида бу ажойиб мактабни озар халқига совға қилгани учун Президент Шавкат Мирзиёевга чуқур миннатдорлик изҳор этди.
Ўзбекистон мусулмонлари идораси
Матбуот хизмати
Жорий йилнинг 6–7 ноябрь кунлари Ҳиндистоннинг Керала штатида «Глобал бағрикенглик – 2026» мавзусида халқаро саммит бўлиб ўтди.
Нуфузли халқаро тадбирда Америка Қўшма Штатлари, Ўзбекистон, Бирлашган Араб Амирликлари, Малайзия, Ҳиндистон ва бошқа давлатлардан диний-маърифий соҳа вакиллари, олимлар ҳамда мутахассислар иштирок этди.
Саммит давомида бағрикенглик, динлараро ва маданиятлараро мулоқот, жамиятда тинчлик ва ўзаро ҳамжиҳатликни мустаҳкамлашга доир долзарб масалалар юзасидан маърузалар тингланди.
Халқаро саммитда Ҳадис илми мактаби ректори Барот домла Амонов ҳам иштирок этиб, «Бағрикенгликдан ўзаро бир-бирини тушуниш сари: замонавий Ўзбекистонда мулоқот ва тинчлик маданиятини шакллантиришда Набавий услуб ва Мовароуннаҳр меросининг аҳамияти» мавзусида маъруза қилди.
Маърузада Ўзбекистонда бағрикенглик тамойиллари давлат сиёсатининг устувор йўналишларидан бири экани, мазкур тамойиллар жамиятда тинчлик, барқарорлик ва ижтимоий ҳамжиҳатликни таъминлашнинг муҳим ҳуқуқий ва маънавий асоси бўлиб хизмат қилаётгани таъкидланди.
Шунингдек, юртимизда қадимдан шаклланган турли миллат ва дин вакилларининг аҳил ва тотув яшаш анъаналари бугунги кунда ҳуқуқий ҳамда сиёсий жиҳатдан янада мустаҳкамланиб бораётгани, бу жараён «Инсон қадри учун» ҳамда «Инсон – жамият – давлат» тамойиллари асосида амалга оширилаётгани қайд этилди.
Шунингдек, Мовароуннаҳрдан етишиб чиққан буюк алломалар меросида намоён бўлган васатийлик ва мўътадиллик тамойилларини бугунги жамиятда кенг тарғиб этиш исломшунос ва диншунос мутахассислар олдида турган муҳим вазифалардан бири экани таъкидланди.
Мазкур халқаро саммит турли мамлакатлар вакиллари ўртасида илмий ва маърифий мулоқотни ривожлантириш, бағрикенглик ва тинчлик ғояларини кенг тарғиб этиш ҳамда бу борадаги халқаро тажриба алмашинувини мустаҳкамлаш учун муҳим майдон бўлди.
t.me/muhaddisuz