Бугун, 14 ноябрь куни Ўзбекистон мусулмонлари идораси раиси, муфтий Шайх Нуриддин Холиқназар ҳазратлари Тошкент ирригация ва қишлоқ хўжалигини механизациялаш муҳандислари институти раҳбарияти, профессор-ўқитувчилари ва талабалари билан  учрашув ўтказдилар.

Илмий-маърифий суҳбатда сўнгги йилларда барча соҳалар қатори диний-маърифий жабҳада жуда катта ўзгаришлар амалга оширилгани, юртимизда 100 та янги жоме масжид очилгани, кўплари ҳавас қиладиган даражада обод бўлгани, Қуръони карим курсларида бир неча ўн минг фуқаро Қуръони каримни мутолаа қилишни ўргангани, ҳаж-умра сафарига борган кишилар сони сезиларли ошгани кабиларни айтиш баробарида оят ва ҳадислар асосида мана шундай неъматларга шукр қилиш зарурлиги билдирилди.

Учрашувда илм ва касб-ҳунарга тарғиб қилувчи шаръий далил ва ҳаётий мисоллардан келтириб, ҳар бир ота-она фарзандига элу юрт учун керак бўладиган ҳунар ва фойдали илмларни ўргатиши лозимлиги тушунтирилди. Шунингдек, ёш авлод онгига она юртга муҳаббат, тинч-осойишта ҳаётимизни қадрига етиш ҳамда шукроналик туйғуларини сингдириш кабиларга урғу қаратилди. 

Мулоқот давомида Муфтий ҳазратлари ўқитувчи ва талабаларнинг илм, оила, ижтимоий ва ибодатга оид саволларига батафсил жавоб берилди. 

Ўзбекистон мусулмонлари идораси
Матбуот хизмати