Наманган вилоят вакиллигида йиғилиш ўтказилди
2024 йил 18 декабрь куни Ўзбекистон мусулмонлари идорасининг Наманган вилоят вакиллигида вилоят бош имом-хатиби раҳбарлигида вакиллик мутахассислари, Наманган шаҳар ва туманлар бош имом-хатиблари ҳамда бош мутахассислари иштирокида йиғилиш ўтказилди.
Йиғилишда жорий йилнинг 12 декабрь куни Ўзбекистон мусулмонлари идорасида Уламолар Кенгашининг навбатдаги йиғилиши бўлиб ўтгани, унда бир қатор тавсия ва кўрсатмалар берилгани юзасидан батафсил тўхталиб ўтилди.
Йиғилишда Ўзбекистон мусулмонлари идораси тасарруфидаги имом-хатиблар меҳнат самарадорлиги, маънавий-маърифий йўналишдаги тадбирлар ва маҳаллабай ишлаш тизими ҳамда ижтимоий кўмакка муҳтож шахслар билан ишлаш жараёнига оид умумий фаолиятни ўрганиш ва баҳолаш тизимини жорий қилиш бўйича «KPI – Имомларни баҳолаш мезони» лойиҳаси ишлаб чиқилгани айтиб ўтилди.
Бундан ташқари Ўзбекистон мусулмонлари идорасининг 2024-йил 14-декабрдаги 11/3113-сонли топшириғига асосан ҳар бир масжид ўзи жойлашган ҳудуддаги Ҳудудий электр тармоқлари корхонаси ва Ҳудудгазтаъминот АЖ бўлимларига 2025-йил электр энергияси ва табиий газ учун янгиланган таъриф бўйича шартнома тузиш ва лимит олиш ишларини ташкил этиш вазифаси топширилди.
Бош имом-хатиблар бош мутаваллилар орқали масжидларга ишга қабул қилинган ва вазифасидан озод этилган ходимларни буйруқ чиққан санадан бошлан уч кун муддатда ЯММТ (Ягона миллий меҳнат тизими)га киритилишини таъминлаши таъкидлаб ўтилди.
Шунингдек, масжидлар имом-хатиблари ва имом-ноиблари ўзларига бириктирилган МФЙларда ҳожилар билан амалга оширишлари лозим бўлган ишларни янада яхшилаш алоҳида урғу қаратилди.
Ўзбекистон мусулмонлари идораси
Наманган вилоят вакиллиги
Матбуот хизмати
Ўзбекистон ва Индонезия зиёрат туризми соҳасида ҳамкорликни кенгайтирмоқда
Туризм қўмитаси раиси Абдулазиз Аққулов Индонезия Республикаси Ҳаж ва Умра вазири Муҳаммад Ирфан Юсуф билан учрашди.
Учрашувда туристик алмашинувни кенгайтириш, зиёрат туризмини ривожлантириш, тўғридан-тўғри авиақатновларни йўлга қўйиш ва туроператорлар ҳамкорлигини кучайтириш масалалари муҳокама қилинди.
Туристик оқимни ошириш мақсадида Тошкент–Жакарта, шунингдек, тарихий шаҳарларни тўғридан-тўғри боғловчи авиақатновларни йўлга қўйиш масаласи муҳокама қилинди.
Мулоқот давомида Давлат раҳбари томонидан илгари сурилган янги авиақатновларни субсидиялаш бўйича механизмларни қўллаш мумкинлиги қайд этилди. Шунингдек, Индонезиядан сайёҳ жалб қилган маҳаллий туроператорларга ҳар бир сайёҳ учун 100 АҚШ доллари миқдорида субсидия ажратилиши ҳам таъкидланди.
Индонезияда ҳар йили 2 миллиондан ортиқ фуқаро Ҳаж ва Умра зиёратига йўл олади. Ўзбекистондаги 1 200 дан зиёд зиёрат маскани, жумладан, Имом Бухорий, Имом Мотуридий, Имом Термизий ва Баҳоуддин Нақшбанд мероси Индонезия бозори учун муҳим туристик салоҳият ҳисобланади.
Индонезия Ҳаж ва Умра вазирининг ташрифи доирасида Самарқанд ва Бухородаги зиёрат масканлари билан танишув ташкил этилди. Бухоро ва Самарқандни Индонезия бозорида зиёрат туризми йўналишлари сифатида тарғиб қилиш, махсус турлар ишлаб чиқиш, Ҳаж ва Умра операторлари билан B2B учрашувлар ўтказиш бўйича келишувларга эришилди.
Имом Бухорий мажмуаси ҳудудида индонезиялик инвесторлар иштирокида “Hadith Hotel” беш юлдузли меҳмонхонасининг ишга туширилиши ҳам икки мамлакат туризм соҳасидаги ҳамкорликнинг амалий натижаларидан бири бўлди.
Тўғридан-тўғри авиақатновлар, “Умра плюс” дастури, туроператорлар ўртасидаги ҳамкорлик ва зиёрат туризми инфратузилмасини ривожлантириш Ўзбекистоннинг Индонезия бозоридаги мавқеини мустаҳкамлаш ҳамда туристик оқимни оширишга хизмат қилади.
Ўзбекистон мусулмонлари идораси Матбуот хизмати