23 Май, 2025, 25 Зулқаъда, 1446
23 Май, 2025, 25 Зулқаъда, 1446
Бош котиб, Мусулмон уламолари уюшмаси раиси, шайх доктор Муҳаммад бин Абдулкарим Ал-Исо ушбу қарор дунёда хавотирли салбий қараш кучайиб бораётган бир шароитда жуда муҳимлигини таъкидлаб, “Ислом раҳм-шафқат, бағрикенглик, адолат ва осойишталик дини сифатида тинчлик, поклик, инсонийлик, меҳр-мурувват, ватанпарварлик, илм олишга чақирувчи дин” эканини қўшимча қилди.
Уюшма экстремистик ғояларга қарши кураш, тинчлик, биргаликда яшаш, дин ва цивилизациялар ўртасидаги ўзаро ҳурмат ва қадриятларни рағбатлантиришга қаратилган ҳар қандай халқаро саъй-ҳаракатни қўллаб-қувватлашини яна бир бор тасдиқлади.
Эслатиб ўтамиз, жорий йил 15 март куни БМТ Бош Ассамблеяси исломофобияга қарши кураш резолюциясини қабул қилди. Покистон томонидан тақдим этилган ҳужжатда, жумладан, ушбу масала бўйича махсус вакил тайинлашга чақирилган.
Муслимларга нисбатан зўравонликка қарши курашга мувофиқлаштирилган ёндашувни ҳам талаб қиладиган резолюцияни 113 давлат ёқлади. 44 давлат бу масалада бетарафлигини билдирди. Ҳеч бир давлат қарши овоз бергани йўқ. Бош Ассамблея Европанинг бир неча давлати томонидан таклиф қилинган, резолюция матнига жузъий ўзгариш киритиш, масалан Махсус вакил ўрнига Координатор тайинлаш, муқаддас китобни таҳқирлаганга қарши чора кўриш тўғрисидаги ҳаволани олиб ташлаш чақириғидан иборат тузатишларни қабул қилмади.
БМТ Бош котиби Антониу Гутерриш ўз баёнотида одамларни ажратувчи, фактни бузиб кўрсатувчи риторика бутун аҳоли қораланишига олиб келиши, халқаро ҳамжамият муросасизлик, стереотип ва тарафкашликка қарши курашиш учун бирлашиши кераклигини уқтирди.
“Онлайн нафрат сўзлари реал ҳаётда зўравонликни кучайтиради”, дея рақамли платформалар нафратни ифодалайдиган контентни ўзгартириши, фойдаланувчиларни таъқибдан ҳимоя қилиши шартлигини таъкидлади.
– Биз ақидапарастликка қарши туришимиз, ҳар қандай салбий кўринишларни йўқ қилишимиз керак, – таъкидлади БМТ раҳбари. – Раҳбарлар ғазаблантирувчи сўзни қоралаши, диний эркинликни ҳимоя қилиши лозим.
Дарвоқе, 15 март – Халқаро исломофобияга қарши кураш куни. БМТ бу санани 2019 йил Янги Зеландиянинг Крайстчерч шаҳридаги масжидларга 51 кишининг ўлимига сабаб бўлган ҳужумлар уюштирилиши муносабати билан белгилаган.
Муҳаррама Пирматова, ЎзА
Ибн Жавзий раҳимаҳуллоҳ айтади: “Бир ажойиб ҳолат ҳақида фикр юритдим: баъзида мўминнинг бошига бир иш тушса, у астойдил дуо қилади, аммо дуоларининг ижобати кўринмайди. Умидсизликка тушай деганда, унинг қалбига қаралади. Агарда у Аллоҳнинг фазлидан умидини узмагани ҳолда тақдирига рози бўлса, дуонинг ижобати тезлашади. Бу маънолар Аллоҳ таоло нозил қилган ояти каримада ўз ифодасини топган: «...Ҳатто Пайғамбар ва иймонли кишилар: “Аллоҳнинг ёрдами қачон (келар экан)?» деган эдилар. Огоҳ бўлингки, Аллоҳнинг ёрдами (ҳамиша) яқиндир”»[1].
Шундай ҳолат Яъқуб алайҳиссалом билан ҳам бўлган. У зотнинг ўғиллари Юсуф алайҳиссалом дом-дараксиз йўқолиб қолганида, кушойиш келишидан ноумид бўлмаганлар. Кейинги ўғиллари ҳам тортиб олинганида, у зот Аллоҳнинг фазлидан умидларини узмаганлари ҳолда: «...Шоядки, Аллоҳ уларнинг (Юсуф, Бинямин ва Мисрда қолган ўғлимнинг) барчаларини (бағримга) қайтарса...»[2], деганлар.
“Дуойимнинг ижобат бўлиш муддати узайиб кетди”, деб қайғурманг. Аллоҳ таоло сизнинг тазарруингиз, ялиниб-ёлворишларингизни кўришни ирода қилмоқда. Сизни қилган сабрингизга ажр ила мукофотламоқчи. Сиз шайтон билан жанг қилишингиз учун ҳам дуойингизнинг ижобатини кечиктириш ила сизни синаяпти.
Гоҳида Аллоҳ таоло сизнинг азиймат, қатъиятингиз нақадар қувватли экани ва балога қанчалик сабрли эканингизни кўриш учун ҳам дард бериб имтиҳон қилади. Агар сабр қила олсангиз, демак, сиз итоаткор бандалар сафидасиз. Борди-ю, иродасизлик қилсангиз, зиёнкорлардан бўласиз. Сабрдан кейин фақат ва фақат ечим, ёруғ кунлар бор.
Алий ибн Абу Толиб розияллоҳу анҳу: “Сабр қилсанг, ажрга эга бўласан, барибир ёзилгани бўлади. Сабрсизлик қилсанг, гуноҳкор бўлиб қоласан, барибир ёзилгани бўлади”, деганлар.
Шоир айтади:
Балою имтиҳон келса, аларга ҳар он ризо кўрсат,
Синов берган сиҳатни ҳам Ўзи бергай аниқ, албат.
Бандасига не ҳукм этса, ҳикмати бор, итоат қил,
Битганидан қутулмоқлик чорасиздир, бил, эй ғофил!
Ноумидлик ханжарини кўкрагингга урма аммо,
Ки Аллоҳнинг қудратила ечилгайдир ҳар муаммо.
Аллоҳдан умидингизни узманг. Синовларга сабр қилинг, шундагина улкан ажрларни қўлга киритасиз. Фазл ибн Саҳл айтади: “Касалликларда неъматлар бор”. Бу борада қуйидагиларга эътиборли бўлинг:
– гуноҳлардан тозалаш;
– савобни қўлга киритиш;
– ғафлатдан уйғониш;
– соғлик неъматини эслаб қўйиш;
– тавбага шошилиш.
Ҳассон Шамсий Пошонинг
“Жаннат бўстонидаги оилавий оқшомлар” номли китобидан
Ғиёсиддин Ҳабибуллоҳ, Илҳом Оҳунд, Абдулбосит Абдулвоҳид таржимаси.
[1] Бақара сураси, 214-оят.
[2] Юсуф сураси, 83-оят.
Иймон 
Намоз 
Рўза 
Закот 
Ҳаж 
Қуръон 
Ислом сабоқлари 
Aлоқа