Ёшлигимни сақлаб қолдим
Доктор Муҳаммад Ротиб Нобулсий айтадилар: “Дамашқлик устозим 97 ёшда бўлсаларда, тетик, ҳатто тишлари ҳам соппа-соғ, кўзлари равшан эди. Қизиқиб бунинг сабабини сўраганимизда: “Ёшлигимизда аъзоларимизни гуноҳлардан асрагандик, қариганимизда Аллоҳ таоло уларнинг хизматидан бизни маҳрум этмади”, деб жавоб бердилар”.
Аллома Табарий раҳимаҳуллоҳ 70 ёшида ҳам кемадан қуруқликка сакраб тушардилар. Ёшлар таажжубланиб: “Бунча куч-қувват қаердан?” деб сўрашганда, у зот: “Биз аъзоларимзни ёшлигимизда гуноҳлардан сақлаган эдик, қариганимизда эса Аллоҳ таоло уларни биз учун сақлаб қолди”, дедилар.
Тобеъин Ҳасан Басрий раҳматуллоҳи алайҳ ёшлари 90 дан ошган бўлсада далада ишлардилар. Буни кўрган одамлар: “Ёшлигингни қандай сақлаб қолдинг?” деб сўрашди. Ҳасан Басрий раҳимаҳуллоҳ: “Мен ёшлигимни сақлаб қолдим, Аллоҳ эса кексалигимни сақлаб қолди”, дедилар.
Расулуллоҳ соллаллоҳу алайҳи васаллам: “Кўзнинг зиноси – (номаҳрамга) қарашдир”, деганлар. Бошқа бир ривоятда “Кўз ҳам зино қилади. Кўзнинг зиноси (номаҳрамга) қарашдир”, дейилган (Имом Бухорий ривояти).
Даврон НУРМУҲАММАД
Хоразмда диний таълим муассасаларига кириш имтиҳонлари бошланди
Бугун, 7 август куни Ўзбекистон мусулмонлари идораси тасарруфидаги олий ва ўрта махсус диний таълим муассасаларига 2026-2027 ўқув йили учун 4-ҳудуд — Хоразм вилояти бўйича кириш тест синовларига старт берилди.
Имтиҳонлар Урганч туманидаги Билим ва малакаларни баҳолаш агентлигининг Хоразм вилояти бўлими биносида юқори савияда ташкил этилмоқда. Маълумотларга кўра, мазкур ҳудуд бўйича тест синовларида жами 289 нафар абитуриент иштирок этиши белгиланган.
Мазкур жараёнларнинг очиқ, адолатли ва тасдиқланган низомлар асосида ўтишини таъминлаш мақсадида Ўзбекистон мусулмонлари идораси раҳбарияти, Дин ишлари бўйича қўмита масъуллари, диний таълим муассасалари раҳбарлари, соҳа мутахассислари ҳамда мустақил кузатувчилар жалб этилган.
Манзил: Урганч тумани, Юқориовул ҚФЙ, Юқоридўрмон МФЙ. Мурожаат учун телефон: +99 899 775 93 45
Қабул жараёнлари бўйича расмий канал: t.me/qabulmuslimuz
Ўзбекистон мусулмонлари идораси
Матбуот хизмати
