Мадинага мактуб!
"Макка бўлмаганида сени ташлаб кетмас эдим!!!"
Мадина! Сенга йиллар талпингандик, соғингандик, сени ҳажрингдан кўз ёшларимизни тўккандик. Сени севмаган мўмин борми дунёда, сенга интилмаган муслим борми дунёда.
Сени гоҳо тушларимизда кўрардик, бу тушлардан ҳеч-ҳеч уйғонгимиз келмасди, сени нега яхши кўрамиз, сени нега юракдан севамиз!?
Чунки сенда энг яхши кўрганимиз, суюклигимиз, соғинганимиз, сени шарафлантирган Расулуллоҳ алайҳиссалом борлар!
Чунки сенда биз дунёга келмасимиздан туриб бизни соғинган, бизни яхши кўрган Зот бордир.
Чунки сенда, охирга нафасларида ҳам "умматим, умматим" дея ғариб умматларини ҳолидан ташвишланган Зот бордир.
Яна сенда, агар Расулуллоҳ алайҳиссалом айтган бўлсалар мен ҳаммасига ишондим дея Сиддиқ мақомини топган Зот бордир, Расулуллоҳ алайҳиссаломни амакиси иймонга келишини яхши кўрган, Расулуллоҳ сут ичганларида чанқоғи босилган Абу Бакр розияллоҳу анҳу бордир.
Яна сенда, юрган кўчасидан шайтон қочган, сўзларини Қуръон тасдиқлаган, "Умар хато гапирди" дея олган Амирул мўминийн бордир.
Яна сенда фаришталар ҳаё қилган Зуннурайн Ҳазрати Усмон, вафоти Расулуллоҳни кўзларини ёшлатган ўғли Иброҳим, қизлари Умму Кулсум, Руқайя, Фотима, Азвожу мутоҳҳарот оналаримизни ва яна ўн минга яқин саҳобани бағрига олган Жаннатул Бақеъ бордир.
Бизни яхши кўрадиган, биз уни яхши кўрадиган, Саййиди шуҳада Ҳазрати Ҳамзани бағрига олган Уҳуд тоғи бордир.
Яна сенда, тақво асосида барпо қилинган, унда ўқилган икки ракаат намозга умрани савоби бериладиган Масжидил Қубо бордир.
Сендаги фазилатларни санасам тугамайди. Сенда саҳобаларни излари бордир, Расулимизни ҳидлари бордир.
Аллоҳга ҳамд бўлсинки, ошиқ маҳбубига етганидек сени висолингга етдик, суюклигимиз живорига келдик, яхши кўрганларимиз бўйларига тўйдик.
Сендан ҳеч кетгим келмайди, Мадина!
Чунки, “Расулуллоҳ соллаллоҳу алайҳи ва саллам: “Кимки Мадинада вафот эта олса, унда вафот этсин. Чунки, унда вафот этган кишини шафоат қиламан” дедилар” (Абдуллоҳ ибн Умар розияллоҳу анҳудан Имом Термизий ривояти).
Мадина! Макка бўлмаганида сени ташлаб кетмас эдим!!!
ТИИ “Қуръон илмлари” кафедраси ўқитувчиси Адҳам Юсупов
Қашқадарёда устоз ва мураббийларга юксак эҳтиром кўрсатилди
Жорий йилнинг 18 сентябрь куни Қашқадарё вилояти Китоб туманида жойлашган «Хожа Бухорий» ўрта махсус ислом таълим муассасасида «1 октябрь — Ўқитувчи ва мураббийлар куни» муносабати билан маънавий-маърифий байрам тадбири ташкил этилди.
Тадбир Ўзбекистон мусулмонлари идорасининг Қашқадарё вилоятидаги вакиллиги ҳамда «Вақф» хайрия жамоат фонди вилоят филиали ҳамкорлигида ўтказилди. Унда вилоят бош имом-хатиби Раҳматилло домла Усмонов ва «Вақф» фонди филиали раҳбари Ражабали домла Норқўчқоров иштирок этди.
Йиғилишда сўз олганлар таълим муассасасида фаолият юритаётган мударрислар ҳамда фахрий устозларни қутлуғ айём билан самимий муборакбод этиб, уларнинг ёш авлодга соф исломий илмлар, одоб-ахлоқ ва эзгу қадриятларни етказиш йўлидаги фидокорона меҳнатларини алоҳида эътироф этдилар.
Тадбир доирасида устоз ва мураббийларга чуқур ҳурмат-эҳтиром рамзи сифатида байрам совғалари ҳамда моддий рағбатлантириш маблағлари топширилди.
Маърифат улашувчи, миллат келажагини тарбияловчи устозларни эъзозлаш ва қўллаб-қувватлашга қаратилган бундай хайрли ташаббуслар жамиятда меҳр-оқибат ва миннатдорлик туйғуларини янада мустаҳкамлашга хизмат қилади.
Ўзбекистон мусулмонлари идораси
Матбуот хизмати
