Рўзанинг 8 ҳикмати
1. Ихлос ва тақво
Рўза – Аллоҳ учун қилинган ибодатдир. Унда риё ва намойишкорлик бўлмайди, чунки рўза тутган одамни фақат Аллоҳ билади. Қуръонда бундай дейилган: “Эй иймон келтирганлар! Сиздан олдингиларга фарз қилинганидек, сизга ҳам рўза фарз қилинди. Шоядки, тақволи бўлсангиз!” (Бақара, 183).
2. Сабр ва ирода кучини мустаҳкамлаш
Рўза инсонни нафсига қарши мустаҳкам қилиб, унинг иродасини кучайтиради. Очлик ва чанқоққа сабр қилиш орқали киши ҳаётдаги бошқа синовларга ҳам чидамли бўлади.
3. Шукр ва қадриятни англаш
Инсон одатда неъматларнинг қадрини уни йўқотганда билади. Рўза тутиш орқали киши таом, сув ва бошқа неъматларнинг аҳамиятини ҳис қилади ва Аллоҳга шукр қилишни ўрганади.
4. Ҳақиқий бойлик тақвода эканини тушуниш
Рўза тутган одам, хоҳ у бой ёки камбағал бўлсин, бир хил аҳволга тушади. Бу эса инсонга моддий бойликдан кўра маънавий бойлик муҳимроқ эканини кўрсатади.
5. Соғлиқ ва тиббий фойдалари
Рўза организмни тозалайди, ҳазм тизимини дам олдириб, турли касалликлардан ҳимоя қилади. Илмий тадқиқотлар рўзанинг токсинларни йўқотишга ва метаболизмни яхшилашга ёрдам беришини кўрсатган.
6. Рўза ва ижтимоий бирдамлик
Камбағаллар ва муҳтожларнинг аҳволини ҳис қилиш орқали инсонда меҳр-оқибат, хайрия ва закот бериш ҳисси уйғонади. Бу жамиятда ҳамдардлик ва бирдамликни мустаҳкамлайди.
7. Дуоларнинг қабул бўлиши
Рўзадорнинг дуоси рад этилмайди, чунки у Аллоҳ учун сабр қилиб, унинг розилигини истаган ҳолда ибодат қилади. Расулуллоҳ соллаллоҳу алайҳи васаллам: “Учта одамнинг дуоси рад этилмайди: рўзадорнинг ифтор вақтидаги дуоси, одил подшоҳнинг дуоси ва мазлумнинг дуоси” (Имом Термизий ривояти).
8. Руҳий покланиш
Рўза нафақат жисмоний, балки руҳий покланишдир. У инсонни гуноҳлардан тийишга, яхши хулқ-атворга, гуноҳ ва ёмонликлардан узоқлашишга ўргатади.
Рўза инсон ҳаётининг барча жабҳаларига ижобий таъсир кўрсатувчи улкан ибодатдир. У нафақат савобли амал, балки инсонни маънавий ва жисмоний жиҳатдан юксалтирувчи буюк ҳикматдир.
Аллоҳ барчамизга рўзанинг ҳақиқий ҳикматларини англаб, уни чуқур ҳис қилишни насиб этсин!
Ҳомиджон қори ИШМАТБЕКОВ
"Ислом гиёҳвандликка қарши" мавзусида семинар ўтказилди
#Семинар
#Гиёҳвандликка_қаршимиз
Ислом динида ақлни хиралаштирадиган, соғлиққа зарар етказадиган ва инсонни ўз-ўзини ҳалокатга бошлайдиган ҳар қандай зарарли одатлар, хусусан, гиёҳвандлик қатъий қораланган ва ҳаром қилинган.
Пайғамбаримиз Муҳаммад соллаллоҳу алайҳи ва саллам ҳар қандай маст қилувчи ва баданни бўшаштирувчи, соғлиққа зарар берувчи моддаларни истеъмол қилишдан қайтарганлар.
Бинобарин, гиёҳвандликка қарши курашиш, ёшларни бу офатдан асраш ва соғлом турмуш тарзини тарғиб қилиш ҳар бир мусулмоннинг бурчидир.
2026 йил 2 июль куни Тошкент шаҳридаги муҳташам "Шайх Муҳаммад Содиқ Муҳаммад Юсуф" жоме масжидининг мажлислар залида ўзгача бир файз ва илму маърифат шукуҳи ҳукмрон бўлди.
Ўзбекистон мусулмонлари идораси Тошкент шаҳар вакиллигининг "Ислом гиёҳвандликка қарши" деб номланган илмий-амалий семинари юқори кайфиятда ва кўтаринки руҳда ўтказилди.
Учрашувда диний-маърифий соҳанинг забардаст вакиллари, давлат ва жамоат ташкилотлари мутасаддилари ҳамда пойтахтимизнинг туман бош имом-хатиблари ва отинойилари жам бўлишди.
Қуръон тиловатидан сўнг Тошкент шаҳар бош имом-хатиби, йиғилиш раиси Абдуқаҳҳор домла Юнусов тадбирни очиб бердилар.
Сўнгра Дин ишлари бўйича қўмита бўлим бошлиғи Муҳиддин Ҳакимов, Тошкент шаҳар ҳокимининг жамоат ва диний ташкилотлар билан алоқалар бўйича ўринбосари, котибият мудири Абдуманнон Каримов, Кўкалдош ўрта махсус ислом билим юрти раҳбари Маъмуржон домла Эркаевлар иштирок этиб, кун тартибидаги муҳим масалалар юзасидан ўз фикр-мулоҳазалари ва қимматли тавсияларини айтиб ўтдилар.
Айтиш жоизки, маърифат ва иймон бирлашган жойда барака, тинчлик ва тараққиёт бўлади. Пойтахтимиз имом-хатиблари бугун халқимизга мана шу зиёни етказишда энг олдинги сафларда хизмат қилмоқдалар.
Суратлар орқали мазкур йиғилишнинг энг ҳаяжонли ва файзли дақиқалари ҳамда семинарнинг долзарб аҳамиятини кўриш мумкин.
MuslimShosh.uz
