Анқара университети профессори, мотуридийшунос олим Сўнмез Кутл (Туркия) "Дунё" АА учун интервьюсида Ўзбекистон Президентининг 2025 йил 14 мартдаги "Имом Мотуридий таваллудининг 1155 йиллигини кенг нишонлаш тўғрисида"ги қарори ҳақидаги фикрларини билдирди:
– Бугун жуда ҳам қувончли хабар эшитдим. Ўзбекистон Президенти Шавкат Мирзиёев "Имом Мотуридий таваллудининг 1155 йиллигини кенг нишонлаш тўғрисида" қарор қабул қилгани, шу муносабат билан кўплаб илмий-маданий тадбирлар, жумладан, "Мотуридийлик – бағрикенглик, мўътадиллик ва маърифат таълимоти" мавзусида халқаро анжуман ўтказилиши мени бағоят мамнун қилди.
Президент Шавкат Мирзиёев ханафий-мотуридий таълимоти атрофида бирлашган туркий давлатлар етакчилари орасида Имом Мотуридий ва мотуридийлик таълимотига энг катта эътибор қаратиб келаётган давлат раҳбари сифатида алоҳида ажралиб турибди. Бунинг учун мен мамлакатингиз раҳбарига самимий миннатдорлик билдираман.
Имом Мотуридий Аллоҳ таоло томонидан инсониятга берилган энг улуғ инъом, бебаҳо туҳфадир. Зотан, у бағрикенглик ва мўътадилликка асосланган қарашлари, маърифий ғоялари билан нафақат ислом цивилизациясига, балки умумбашарий тамаддунга бебаҳо ҳисса қўшган буюк алломадир. Унинг тафаккури марказида инсон эрки, ақл ва илм туради.
Аллоҳ таоло инсонни энг гўзал суратда яратган. Инсон ҳурмат ва эҳтиромга лойиқ мавжудотдир. Барча инсонлар Одам Атонинг фарзандлари бўлгани сабабли, инсонийлик жиҳатидан ўзаро биродар ҳисобланадилар. Улар орасидаги мусулмонлар динда ҳам биродардирлар. Инсонларнинг ўзаро устунлиги ахлоқий фазилатлар, таълим-тарбия билангина ўлчанади.
Президент Шавкат Мирзиёевнинг Имом Мотуридий таваллудини кенг нишонлаш ҳақидаги қарори алломаларга юксак эҳтиром ифодаси ўлароқ ёш авлодни мутаассиб оқимлар таъсирига тушиб қолишининг олдини олишга ҳам хизмат қилади. Зеро, X асрда мўътадил таълимотни инсониятга тарғиб қилган Имом Мотуридийни хотирлаш орқали бугун жамиятда ҳар қачонгидан ҳам кўпроқ эҳтиёж сезилаётган тинчлик, бағрикенглик, мўътадиллик маданиятини таъминлаш сари муҳим қадам қўйилади.
Умрининг катта қисмини Имом Мотуридий ҳаёти ва илмий меросини ўрганишга бағишлаган бир инсон сифатида мен бу борада ҳар қандай вазифага ҳисса қўшишни шараф, деб биламан.
"Дунё" АА
Муборак ҳаж сафари давомида Ўзбекистон мусулмонлари идораси Кутубхона бўлими бошлиғи Камолиддин Маҳкамов, Термизий халқаро илмий-тадқиқот маркази директори Музаффархон Жониев, Ҳадис илми мактаби ректори Барот Амонов Мадинаи мунавварадаги Масжидун Набавий кутубхонаси билан танишиш баробарида муассаса бўлим бошлиғи Аҳмад Наим Мулла мулоқот қилишди.
Учрашув асносида улуғ алломаларимизнинг илмий мерослари жой олган “Ўзбекистон бурчаги” ташкил этилди. Шу муносабат билан ушбу кутубхона вакилларига Имом Бухорийнинг “Саҳиҳи Бухорий” ва Имом Термизийнинг “Сунани Термизий” ва бошқа китоблар топширилди.
Мулоқот чоғида “Саҳиҳи Бухорий” ва “Сунани Термизий” асарлари “Олти саҳиҳ ҳадислар”даги ўрни, ислом оламидаги олти буюк муҳаддисдан икки нафари Мовароуннаҳрдан етишиб чиққани, буюк аждодларимизнинг динимиз тараққиётидаги хизматлари эътироф этилди.
Шунингдек, бугунги кунда Ўзбекистонда диний соҳада олиб борилаётган сиёсат юқори баҳоланиб, Кутубхонага тақдим этилган ўзбек тилидаги ҳадислар тўпламлари шарҳлари Ҳаж ва Умра зиёратига келувчи зиёратчиларга муҳим манба бўлиб хизмат қилиши айтиб ўтиди.
Ўзбекистон мусулмонлари идораси
Матбуот хизмати