Буюкларнинг оналари: Хонзодабегимнинг матонати
Қадим ва кўҳна Бухоро – авлиёлар, Ислом оламига муносиб ҳисса қўшган уламолар маскани, бутун дунёдан сайёҳлар зиёрат учун келадиган шариф шаҳар. Уни шарафлантириб турган аждодларимиз орасида Абдулхолиқ Ғиждувоний ҳазратлари алоҳида ўрин тутади.
Абдулхолиқ Ғиждувоний номини тилга олар эканмиз, ҳар сафар: “Уст-бошингизни меҳнатингиз билан безанг”, “Кўнгил фироғини муҳаббат олови билан ёқинг” каби гўзал васиятлари қулоғимиз остида жаранглайди.
1103 йили асли румлик Шайх Абдулжамил ва Малатия подшоҳининг қизи Хонзодабегимнинг никоҳидан “Абдулхолиқ” исмли пок ўғил дунёга келди. Бақо эшигидан киргунига қадар фақат Аллоҳ зикрида бўлган валий зот Абдулхолиқ Ғиждувоний ҳазратлари “Хожаи Жаҳон” номига мушарраф бўлган.
Барча улуғ зотларнинг ортида муштипар аёл – тақводор ва фидойи оналар туради. Абдулхолиқ Ғиждувонийнинг онаси Хонзодабегим ҳам Шайх Абдулжамил билан беш йилча бирга ҳаёт кечирган. Хонзодабегим йигирма бир ёшида бева қолиб, умрини шу биргина фарзандининг илм олиши ва тарбиясига бағишлади. Подшоҳнинг қизиман, демасдан ҳаётнинг паст-баландликларини шукр ва сабр билан енгиб ўтди. Меҳнаткашлиги, қатъиятлилиги ёш Абдулхолиқнинг келгуси ҳаётида бутун умрига татигулик даражада ўз таъсирини ўтказди.
Ҳар доим Аллоҳга илтижо қилди. Бошқаларга бориб арз қилмади, отасининг юртига қайтиб кетмади, яхши гумонда бўлиб, буни бир хайрли тақдирга йўйиб, чиройли сабр қилди...
Она фарзандини ўзидан узиб бирор ерга юбориш у ёқда турсин, бир неча соатга бўлса-да, бошқага бериб кетолмайди. Балки шундан бўлса керак, Пайғамбар алайҳиссалом: “Жаннат оналар оёғи остидадир”, деганлар (Имом Қузоъий ривояти). Хонзодабегим ҳам йўқотса-да, аёллик иффатию ор-номусини ва маънавиятини йўқотмади. Бутун умрини, илмини, куч-қувватини фарзандининг камолоти йўлида сарфлади. Олис юрти, ота-она соғинчи қалбини қанча ўртамасин, фарзандининг ёнида қолди.
Она номини пок сақлай олган аёлларимиз бор экан, ҳаёт мунаввар. Бунинг учун ҳар бир муслима ўзининг асосий бурчи илм ва тарбияни маҳкам тутмоғи лозим. Зеро, қўлига китоб тутган халқни, миллатни аввало аёл тарбиялайди. Сизу бизнинг зиммамиздаги вазифалар юки оғир бўлса ҳам, шарафи юксакдир. Шундай экан, олиму уламоларнинг меросхўрлари сифатида уларга муносиб фарзанд бўлайлик!
Норбиби МАРДОНОВА,
Ғиждувон тумани бош отинойиси
"Мўминалар" журнали 2-сонидан
Имом-хатиблар ўртасида билимлар беллашуви ўтказилди
Мустақиллигимизнинг муқаддас 35 йиллиги арафасида Тошкент вилоятида имом-хатиблари ва имом ноиблари ўртасида "ЗАКОВАТ" интеллектуал мусобақаси бўлиб ўтди.
Вилоятнинг турли ҳудудларидан ташриф буюрган 6 та жамоа таркибидаги соҳа вакиллари ўзларининг теран билими, мулоҳазакорлиги ва мантиқий фикрлаш қобилиятини синовдан ўтказдилар. Ҳар бир савол нафақат интеллектуал билим, балки бой тарихимиз, диний-маърифий қадриятларимиз ва халқимизнинг маънавий меросини ёрқин акс эттирди.
Муросасиз ва қизғин кечган баҳс якунига кўра ғолиблар аниқланди:
Ғолиб жамоалар:
1-ўрин — "Билимдонлар" жамоаси
2-ўрин — "Зиёлилар" жамоаси
3-ўрин — "Фаоллар" жамоаси
Диний соҳа вакилларининг бу каби соғлом рақобат ва интеллектуал беллашувларда фаол иштирок этиши жамиятда маърифат нурини янада кенгроқ ёйилaшига хизмат қилади.
Ғолиб ва иштирокчиларни чин қалбдан табриклаймиз!
Илм-маърифат йўлидаги хайрли ишларига Аллоҳ таоло барака берсин, масъулиятли фаолиятларида куч-ғайрат ёр бўлсин!
Тошкент вилояти вакиллиги
Матбуот хизмати
