Юздан зиёд оилага кирилди
2024 йил ҳаж мавсумида муҳтарам Президентимиз Шавкат Мирзиёев Ўзбекистон мусулмонлари идораси раиси, муфтий Шайх Нуриддин Холиқназар ҳазратлари билан телефон орқали мулоқот қилиб, ҳожилар ҳолидан хабар олиб, ҳожилар Ўзбекистонга қайтгач, жамиятимиздаги меҳр-оқибат муҳитини мустаҳкамлаш, жаҳолатга қарши маърифат билан курашиш, ёшлар тарбияси ва оилалар тотувлигида ибрат бўлишларига умид билдирган эдилар.
Шайх Нуриддин Холиқназар ҳазратлари мазкур кўрсатмалардан келиб чиқиб, муҳтарам Юртбошимизга ҳожилар билан бирга мурожаат йўллаган эдилар.
Мурожаатда Ватанга қайтгач, ҳар бир ҳожи маънавият ва маърифат тарғиботчиси бўлиши таъкидланган эди.
Ҳожилар имом-хатиблар билан бирга маҳаллаларга, оилаларга кириб, халқимизнинг маънавияти, маърифати юксалишига хизмат қиляптилар.
Бугун Тошкент шаҳар бош имом-хатиби Абдуқаҳор домла Юнусов пойтахтимизнинг Учтепа туманидаги «Ҳазрати Али» жоме масжидига ташриф буюрдилар.
Тошкент шаҳар туманлари бош имомлари, Учтепадаги масжидлар имом-домлалари, маҳалла фаоллари, ҳожи оталар, ҳожи оналар ҳам дастлаб мазкур масжидда йиғилдилар.
Сўнгра Абдуқаҳҳор домла бошчилигида имом-домлалар, маҳалла фаоллари, ҳожи оталар, ҳожи оналар бўлиниб, тумандаги 22 та маҳаллага кириб бордилар.
Абдуқаҳҳор домла муайян сабабга кўра жазо муддатини ўтаб қайтган бир йигит билан гаплашиб, унга зарур тавсия ва йўл-йўриқлар бердилар.
Шунингдек, тадбир иштирокчилари нотинч хонадонлар, ажрим ёқасига келиб қолган оилалар билан ҳам суҳбатлар олиб бориб, уларга зарур кўмак бермоқдалар.
Бундай хайрли ишлар изчил давом эттирилиб, пойтахтимизнинг ҳар бир маҳалласида ўтказиляпти.
Шу пайтгача имом-хатиблар, отинойилар, маҳалла фаоллари, ҳожи оталар, ҳожи оналар биргаликда 50 мингдан ортиқ хонадонга киришди.
Тадбирлар тугагач, имомлар, маҳалла фаоллари, ҳожилар яна «Ҳазрати Али» масжидига қайтиб келиб, амалга оширилган ишлар юзасидан ўзаро фикр алмашдилар. Келгусидаги ишлар режасини белгилаб олдилар.
Ўзбекистон мусулмонлари идораси
Тошкент шаҳар вакиллиги
Матбуот хизмати
Луқмони Ҳакимнинг ҳикматли сўзларидан
1. Аллоҳга тақво қилишни тижорат деб бил, шунда у сенга молсиз фойда келтиради.
2. Ўзингни сенга муҳтож бўлмаган, лекин сен унга муҳтож бўлган кишининг ўрнига қўй.
3. Харсанг тошларни жойидан кўчириш, онгсиз одамга англатишдан осонроқдир.
4. Жаннатни талаб қилишда олий ҳимматли бўл.
5. Аллоҳдан шундай умид қилки, у билан Унинг макридан омонда бўлма ва Аллоҳдан шундай қўрқки, у билан Унинг раҳматидан умидсиз бўлма.
6. Мен ҳеч қачон сукутдан афсусланмадим. Агар гап кумуш бўлса, сукут — олтин.
7. Ҳикмат камбағалларни подшоларнинг мажлисларида ўтказган.
8. “Ё Роббим, мени мағфират қил” — деб кўп такрорла, зеро Аллоҳнинг бир соати борки, у вақтда сўровчи рад этилмайди.
9. Ким ёлғон гапирса, юзининг сувини (обрўйи) кетади, кимнинг хулқи ёмон бўлса, ғам-ташвиши кўпаяди.
10. Аллоҳдан қўрқ, лекин қалбинг фожир бўлатуриб, одамлар сени ҳурмат қилишлари учун ўзингни уларга Аллоҳдан қўрқадиган қилиб кўрсатма.
11. Амал фақат яқиний ишонч (эътиқод) билангина мукаммал бўлади, кимнинг эътиқоди заиф бўлса, амали ҳам заиф бўлади.
12. Ёлғон гапиришдан эҳтиёт бўл, зеро у пиширилган чумчуқ гўшти каби иштаҳалидир, лекин кўп ўтмай эгасини ичини ёндиради.
13. Мажлисни кўзинг билан кўриб танла, агар Аллоҳ зикр қилинадиган мажлис бўлса, у ерда ўтир. Агар олим бўлсанг, илминг наф беради, агар жоҳил бўлсанг, сенга ўргатишади, агар Аллоҳ у мажлисга раҳматини нозил қилса, сен ҳам шу раҳматдан баҳраманд бўласан.
14. Қарздорликдан эҳтиёт бўл, чунки у кундузи хорлик ва тунда ғамдир.
15. Тўқлик устига овқат емагин — чунки ундай таомни егандан кўра итга ташлаган яхшироқ.
16. Агар шайтон сенга шубҳа ва гумон орқали келса, уни яқиний ишонч ва насиҳат билан енг, агар у танбаллик ва зерикиш томонидан келса, қабр ва қиёматни эслаб енг, агар у хоҳиш ва қўрқув томонидан келса, унга дунё тарк этиладиган ва қолдириладиган нарсадир, деб айт.
17. Тилингдан чиққан гапларга эҳтиёт бўл, сукут қилган киши омонда бўлади, фақат фойдаси бор гапларни гапир.
18. Юзингни ниқоблашдан (яъни шубҳали қиёфадан) сақлан — чунки, у кечаси одамларни қўрқитади, кундузи эса хўрлик келтиради.
19. Мен тош, темир ва оғир юкларни кўтардим, аммо ёмон қўшнидан оғирроқ нарсани кўрмадим.
Ҳомиджон қори ИШМАТБЕКОВ