Ўзбекистон тараққиётининг янги даврида виждон ва эътиқод эркинлигини таъминлаш, диний-маърифий соҳада кенг кўламли ислоҳотлар амалга ошириш борасида тизимли ишлар амалга оширилмоқда. Айниқса, “Ҳаж” ва “Умра” сафарларини ташкил этиш ва зиёратчиларга қулай шароитлар ҳозирлаш сифат жиҳатидан янги босқичга кўтарилди.
Хабар берганимиздек, мамлакатимизда ҳаж мавсуми жорий йил 13 май кунидан бошланди. (https://t.me/muslimuzportal/41370)Айни кунларда Мадинаи мунавварада ибодатларини ниҳоясига етказган юртдошларимиз бирин-кетин Макка шаҳрига йўл олмоқдалар.
17 май куни навбатдаги зиёратчилар Маккаи мукаррамага шинам автобусларда етиб келди. Бўлғуси ҳожиларга муқаддас шаҳардаги “Аброж Дана” ва "Вафақ ал-Саҳа" меҳмонхоналарида зам-зам сувлари, хурмо, ширинликлар, гуллар ва ҳадялар улашилиб, иззат-икром қилинди.
Мана шундай илтифотлардан кўнгиллари кўтарилган юртдошларимиз Аллоҳ таолога чексиз шукроналар айтиб, уларга бўлган катта эҳтиром ва эътиборни нафақат мамлакатимизда, балки олис Макка шаҳрида ҳам чин дилдан ҳис этишди.
Шу кунларда ушбу муқаддас шаҳарда тоат-ибодатларини адо этаётган юртдошларимиз ҳар қадамда давлатимизнинг ғамхўрлигини ҳис қилиб, ўз дуоларида юритимизга тинчлик, халқимизга фаровонлик тиламоқдалар.
Ўзбекистон мусулмонлари идораси Матбуот хизмати
Муқаддас Рамазон ойи муносабати билан Ўзбекистоннинг Россиядаги элчихонаси ташаббуси билан Москва шаҳридаги “Антек” МЧЖ қурилиш компаниясида меҳнат қилаётган ватандошларимиз учун ифторлик тадбири ташкил этилди. Ушбу маънавий тадбирда элчихона дипломатлари билан бир қаторда, юртимиздан махсус ташриф буюрган Бухоро шаҳридаги “Халифа Худойдод” жоме масжиди имом-хатиби Одилжон Садиллоев иштирок этди.
Тадбир давомида сўзга чиққанлар юртдошларимизни муборак ой билан қутлаб, давлатимиз раҳбариятининг самимий табрикларини етказдилар. Мусофирчиликда турли қийинчиликларни сабр билан енгиб, ҳалол меҳнат орқали оиласига ризқ улашаётган ҳамюртларимизга алоҳида миннатдорлик билдирилди. Шунингдек, Президентимиз ташаббуси билан мамлакатимизда Рамазон ойини муносиб ўтказиш ва эҳтиёжмандларни қўллаб-қувватлаш бўйича қилинаётган хайрли ишлар ҳақида сўз юритилди.
Шу билан бирга, ифторлик асносида маърифий суҳбат ўтказилиб, фуқароларимизнинг ёт ва бузғунчи ғоялар таъсирига тушиб қолмаслиги, ёшларни турли диний оқимлардан асраш ва доимо огоҳ бўлиш зарурлиги алоҳида таъкидланди. Иштирокчилар ўз навбатида, кўрсатилаётган бундай юксак эътибор ва ғамхўрлик учун миннатдорлик билдириб, ушбу учрашув ватандошлар ўртасидаги ўзаро ишонч ва ҳамжиҳатликни мустаҳкамлашга хизмат қилишини эътироф этдилар.
Ўзбекистон мусулмонлари идораси
Матбуот хизмати