Ўзбекистон мусулмонлари идораси

2025 йил 19 июль шанба куни АҚШнинг Жоржия штати пойтахти — Атланта шаҳрида илк бор ҳалол таомлар фестивали бўлиб ўтади. Машҳур “Atlantic Station” майдонида ташкил этиладиган фестивалда 50 дан ортиқ ҳалол таом маҳсулотлари сотувчиси иштирок этиши кутилмоқда.

Фестиваль иштирокчилари томонидан Яман, Яқин Шарқ, Жанубий Осиё, ҳатто Ўзбекистон ошхоналарига хос кабоб, бургер, дуккаклик маҳсулотларидан тайёрланган таомлар (фалафул) ва турли хил ширинликлар таклиф этилади.

Ушбу тадбир Атланта мусулмонлари фестиваллари уюшмаси томонидан ташкиллаштирилмоқда. Фестиваль айни пайтда шаҳардаги АҚШ божхона ва миграция сиёсатига қарши норозилик намойишлари орасида муҳожирлар маданиятини нишонлаш имконини ҳам яратади.

Фестиваль ташаббускорларидан бири — Ҳасанейн Лакҳани бундай деди:

“Атланта шаҳрида илк ҳалол овқат фестивалини ўтказиш — жуда ҳам ҳайратланарли ва ажойиб фикрдир. Мен бу шаҳарда доимий истиқомат қилувчи сифатида мусулмон жамоасига яқинлигимни ҳар доим ҳис қилганман. Рамазон овқат фестиваллари каби кичик тадбирлардан то ошхона ва кўчмас мулк соҳаларидаги фаолиятгача иштирок этиб келаман”.

Унинг таъкидлашича, фестиваль – мусулмонлар ва мусулмон бўлмаганлар учун бир жойда тўпланиб, шаҳарнинг маданий хилма-хиллигини нишонлаш, шу билан бирга мусулмонлар турмуш тарзи ва ҳалол таомлар билан танишиш имконини беради.

Лакҳани Атланта яқинидаги Лоренсвилл шаҳрида жойлашган “BurgerFi” ресторани соҳибидир. У, шунингдек, ушбу ресторан — Грузия штатидаги ягона ҳалол сертификатига эга бургер шоҳобчасидир.

Илёсхон Аҳмедов,
тайёрлади.

Янгиликлар

Ҳожи – тинчлик ва маънавият тарғиботчиси

17.07.2025 7890 3 min.

#Сайёр_йиғилиш

Хабарингиз бор, шу йил ҳаж мавсумида хурматли Президентимиз Ўзбекистон мусулмонлари идораси раиси, Шайх Нуриддин Холиқназар ҳазратлари билан телефон орқали мулоқот қилиб, ҳожиларнинг ҳол-аҳволларини сўрадилар.

Бу йил юртимиздан ҳажга борган юртдошларимиз Арафот водийсида муфтий, Шайх Нуриддин Холиқназар ҳазратлари бошчиликларида юртга қайтгач, «Янги Ўзбекистоннинг тинчлик ва маънавият тарғиботчилари бўламиз» деган эзгу ташаббусни илгари сурган эдилар.

Шу ташаббус айни кунларда амалга кўчиб, ҳожиларимиз маҳаллаларга кириб, тинчлик ва маънавиятни тарғиб этмоқдалар.

Бугун, 16 июль куни Мирзо Улуғбек туманида сайёр йиғилиш ўтказилди.

Тошкент шаҳар бош имом-хатиби Абдуқаҳҳор домла Юнусов олиб борган йиғилишда Ўзбекистон мусулмонлари идораси Тошкент шаҳар вакиллиги масъул ходимлари, туманлар бош имом-хатиблари, уламолар, отинойилар ҳамда «Ҳаж 2025»да ҳажга борган ҳожи оталар ва ҳожи оналар иштирок этишди.

Дастлаб Тошкент шаҳар бош имом-хатиби раисликларида туманлар бош имом-хатиблари, шунингдек, тажрибали имом-хатиблардан иборат Ишчи гуруҳ шакллантирилди.

Абдуқаҳҳор домла амалга ошириладиган ишлар кўлами, Ишчи гуруҳ аъзолари ҳамда имом-хатиблар ҳамкорлигининг муҳим жиҳатлари хусусида йиғилганларга тушунчалар бердилар.

Шундан сўнг тумандаги барча имом-хатиблар ҳожилар билан биргаликда ҳудуддаги 20 та маҳаллага чиқиб, юзга яқин хонадонга киришди.

Ажрим ёқасига келиб қолган бир оилага кирилиб, уларга ҳожилар зарур тавсияларни беришди. Оила бошлиқлари хато қилганларини англаб етдилар.

Тадбир доирасида жисмоний имконияти чекланган онахонга махсус аравача ҳадя қилинди. Онахон кўзидаги қувонч ёшлари билан шу хайрли ишларнинг бошида турган азиз инсонларни алқаб, уларга миннатдорлигини изҳор қилди.

Эҳтиёжманд бир оилага замонавий телевизор ҳамда рўзғор учун зарур бўлган озиқ-овқат маҳсулотлари етказиб берилди.

Ёш оилага адабий-бадиий китоблар улашилди.

Кўнгли ўксик инсонлар ҳолидан хабар олингани тадбирга ўзгача файз бағишлади.

Бугунги тадбирни ўтказишдан мақсад юртимизда инсон қадри, шаъни улуғ эканини, одамларга яхшилик улашиб яшаш, юртимизда ҳукм сураётган тинчликнинг қадрига етиш, ўзаро ҳамжиҳатликни таъминлаш, ёшларимизни турли ёт ғоялардан асрашда ҳожиларимизнинг хизмати беқиёс эканини кўрсатмоқда.

Аслида имом-хатибларимиз ҳар куни шундай хайрли ишларни амалга оширмоқдалар. Бугунга келиб бу иш тизимли ва кенг кўлам касб этиб, такомиллашиб бормоқда.