15 Сентябр, 2026, 4 Рабиъус сони, 1448
15 Сентябр, 2026, 4 Рабиъус сони, 1448
Мамлакатимиз мустақиллигининг 34 йиллик тантаналари арафасида “Ватан учун, миллат учун, халқ учун!” шиори остида Жиззах вилояти масжидларида фаолият юритаётган диний соҳа ходимлари ўртасида “Заковат” интеллектуал ўйини ўтказилди.
“Заковат” ўйини Ўзбекистон мусулмонлари идорасининг барча ҳудудий вакилликлари доирасида ўтказилиб, интеллектуал беллашуви билан бир қаторда спортнинг футбол, стол тенниси, шахмат ва шашка турлари бўйича ҳам мусобақалар ташкил этилади.
Жиззах вилояти бош имом-хатиби Меҳмонали домла Жабборов, вилоят ҳокимлиги котибият мудири Нурали Раимов ва бошқа мутасаддилар интеллектуал беллашув бошланиши арафасида сўзга чиқиб, юртимиз истиқлол айёми муносабати билан ўтказилаётган мусобақанинг аҳамияти ҳақида сўзладилар ҳамда иштирокчиларга омад ва зафарлар тиладилар.
Мазкур мусобақа ва беллашувлар диний соҳа ходимларининг ақлий ва жисмоний фаоллигини ошириш, ўзаро жамоавий ҳамфикрлигини қўллаб-қувватлаш, ҳамжиҳатликни мустаҳкамлаш, илмий салоҳиятларини ошириш мақсадида Ёшлар иттифоқи ташкилоти ҳамда маҳаллий ҳокимликлар билан ҳамкорликда тасдиқланган дастур асосида ўтказилмоқда.
20 та жамоа иштирок этган “Заковат” қизғин баҳс-мунозараларга бой тарзда ўтди. Интеллектуал ўйиннинг якунида 1-ўринни Жиззах шаҳар масжидлари ходимларидан иборат “Имом Бухорий”, 2-ўринни Пахтакор тумани масжидлари ходимларининг "Пахтакор" ҳамда 3-ўринни Шароф Рашидов тумани имом-хатибларидан тузилган "Шароф Рашидов" жамоаcи қўлга киритиб, ғолибларга диплом ва эсдалик совғалари топширилди.
ЎМИ Матбуот хизмати
Вазирлар Маҳкамаси ҳузуридаги Имом Бухорий халқаро илмий-тадқиқот марказида "Ислом маърифати, ҳадис илми ва Имом Бухорий мероси" ўқув курси ўтказилди. Мутахассислар томонидан ёдгорлик мажмуаси гид-экскурсоводлари учун ўтказилган машғулотлар доирасида экскурсия фаолияти билан боғлиқ ҳуқуқий, назарий ва амалий масалалар кўриб чиқилди, хабар бермоқда “Самаркандский вестник” нашри.
- Бу ерга ташриф буюрган ҳар бир зиёратчи фақат ибодат қилиш учун эмас, балки маънавий "озиқ" олиш учун ҳам бориши керак, - дейди Имом Бухорий халқаро илмий-тадқиқот маркази директори Ш.Зиёдов. - Бу ерда фаолият юритаётган гидларнинг малакасини ошириш тизимини йўлга қўяр эканмиз, уларга Имом Бухорийнинг бизга қолдирган меросини, бу мероснинг тарихий манбаларини чуқур ўргатишимиз шарт.
Курс доирасида мажмуага биринчи марта ташриф буюрган меҳмонлар билан мулоқотнинг ўзига хос хусусиятлари муҳокама қилинди. Хорижлик зиёратчиларга нафақат Имом ал-Бухорий ҳаётидаги фактлар ва диний қадриятларимизни етказиш, балки бой маданий меросимизни асраб-авайлаш ва етказиш каби долзарб масалалар кўтарилди.
Гид-экскурсоводлар ҳам ўз тажрибалари билан ўртоқлашиб, келгусидаги ишларни ташкил этиш бўйича таклифлар бердилар. Бу бевосита экскурсияларни ўтказиш пайтида юзага келадиган масалаларни муҳокама қилиш имконини берди.
Курс Ўзбекистон Республикаси Вазирлар Маҳкамаси ҳузуридаги Дин ишлари бўйича қўмита, Диний таълим соҳасида кадрлар малакасини ошириш ва қайта тайёрлаш институти, Имом Бухорий халқаро илмий-тадқиқот маркази, вилоят ҳокимлиги ҳамда Имом Бухорий ёдгорлик мажмуасини сақлаш ва унинг атрофини ободонлаштириш департаменти томонидан ташкил этилди.
Тарихий обидалар ва зиёратгоҳлар туризм салоҳиятининг муҳим қисми бўлган Самарқанд вилояти учун малакали мутахассисларни тайёрлаш алоҳида аҳамиятга эга. Меҳмонга ташриф буюриладиган жойнинг тарихи қанчалик тўлиқ ва тушунарли очиб берилиши гиднинг профессионаллигига боғлиқ. Шунинг учун ҳам гид-экскурсоводларнинг малакасини мунтазам ошириб бориш, уларнинг касбий билим ва кўникмаларини такомиллаштириш ҳамда замонавий хизмат кўрсатиш стандартларини жорий этиш Самарқандда туризм хизматлари сифатини оширишда устувор йўналишлардан бири бўлиб қолмоқда.
Ўзбекистон мусулмонлари идораси Матбуот хизмати
Иймон 
Намоз 
Рўза 
Закот 
Ҳаж 
Қуръон 
Ислом сабоқлари 
Aлоқа 