“Ҳаж – 2026” мавсуми зиёратчилари учун нимча тайёрлаб берувчи корхоналар ўртасида танлов
Ўзбекистон мусулмонлари идораси “Ҳаж – 2026” мавсуми зиёратчилари учун нимча (камзул) тайёрлаб берувчи корхоналар ўртасида танлов эълон қилади.
I. Танловда қатнашиш учун қуйидаги ҳужжатлар талаб этилади:
- Танловда иштирок этиш бўйича хат;
- Корхона гувоҳномаси ва раҳбарининг паспорт нусхаси;
- Банкдан К-2 шаклидаги маълумотнома;
- Эркак ва аёллар учун биттадан нимча намунаси;
- Тижорат таклифи;
- Корхонанинг сўнгги бир йилда банкдаги пул маблағлари айланмаси ҳақида маълумот;
- Боғланиш учун телефон номерлари;
Амалдаги қонунчиликка мувофиқ зарурат бўлса қўшимча ҳужжатлар талаб этилиши мумкин.
II. Маҳсулотлар (эркаклар ва аёллар нимчаси) учун қўйилган талаблар:
- Нимчалар 50, 52, 54, 56 ва 58 ўлчамларда тикилиши лозим.
- Нимчаларнинг олди қисми тугмали бўлиши шарт.
- Нимчанинг орқа юқори қисмида Ўзбекистон Республикаси байроғи акс эттирилган бўлиши керак.
- Байроқнинг тепа қисмида, орқа томонда лотин алифбосида “UZBEKISTAN” ёзуви жойлаштирилиши талаб қилинади.
- Ҳар бир нимчанинг оғирлиги 190–220 грамм зичликдаги матодан тайёрланган бўлиши керак.
- Нимчалар мовий (оч кўк) рангда бўлиши лозим.
- Олд қисмида учта чўнтак бўлиши: икки томонда (ён чўнтаклар) ва юқори чап қисмида битта қўшимча чўнтак.
- Олд юқори чап чўнтак устки қисмида Ўзбекистон мусулмонлари идораси ҳузуридаги “Ҳаж” ва “Умра” маркази логотипи жойлаштирилган бўлиши шарт.
Танловда иштирок этиш истагида бўлган корхона ва ташкилотлар 2025 йил 31 октябрь кунига қадар юқоридаги талаблар асосида ҳужжатларни Ўзбекистон мусулмонлари идорасига тақдим этишлари мумкин.
Манзил: Тошкент шаҳри, Олмазор тумани, Қорасарой кўчаси, 47-уй. Телефон: 71-240-04-75, 98-140-04-75
“Associated Press of Pakistan” АА: I Халқаро ислом цивилизацияси форуми иштирокчилари Ўзбекистон Президентига мурожаат йўллади
Покистоннинг “Associated Press of Pakistan” ахборот агентлигида I Халқаро ислом цивилизацияси форуми якунларига бағишланган мақола эълон қилинди, деб хабар бермоқда “Дунё” АА.
Мақолада шу йилнинг 7–11 июль кунлари Ўзбекистонда Ислом цивилизацияси бўйича биринчи халқаро форум бўлиб ўтгани, анжуман якунида форум иштирокчилари Президент Шавкат Мирзиёев номига мурожаат йўллагани таъкидланган.
Қайд этилганидек, мурожаатда Президент Шавкат Мирзиёев ташаббуси ва бевосита қўллаб-қувватлови билан ташкил этилган ушбу форум нафақат нуфузли илмий анжуман, балки инсониятнинг умумий маънавий ва интеллектуал меросини асрашга қаратилган глобал ҳамкорликнинг янги босқичини бошлаб берган тарихий воқеа сифатида баҳоланган.
Мурожаатда форумнинг Тошкент, Самарқанд ва Термиз каби буюк цивилизация марказларида ўтказилгани чуқур рамзий аҳамиятга эга экани қайд этилиб, айнан шу заминда жаҳон илм-фани тараққиётига улкан ҳисса қўшган алломалар етишиб чиққанлиги алоҳида таъкидланган.
“Форум иштирокчилари БМТ Бош Ассамблеясининг 72-сессиясида Президент Шавкат Мирзиёев томонидан илгари сурилган Ўзбекистондаги Ислом цивилизацияси марказини ташкил этиш ташаббусини сўнгги ўн йилликдаги энг муҳим халқаро гуманитар ташаббуслардан бири сифатида эътироф этди. Улар мазкур марказ келгусида жаҳоннинг етакчи олимларини бирлаштирувчи йирик халқаро илмий-маърифий масканга айланишига ишонч билдирди”, — дея фикр юритилган материалда.
Мақолада ёзилганидек, Ўзбекистонда тарихий меросни асраш, фундаментал илм-фанни ривожлантириш ва цивилизациялар мулоқотини мустаҳкамлаш борасида амалга оширилаётган кенг қамровли ислоҳотлар юксак баҳоланган.
Хусусан, Ўзбекистондаги Ислом цивилизацияси маркази, Имом Бухорий ёдгорлик мажмуаси, Имом Бухорий, Имом Мотуридий ва Имом Термизий халқаро илмий-тадқиқот марказлари ҳамда Халқаро ислом академияси фаолияти ушбу сиёсатнинг ёрқин намунаси сифатида қайд этилган.
Ўзбекистон мусулмонлари идораси Матбуот хизмати
- «
- »